1 Sha-ar dem fhin mu, a ri-in mu khidhing dhi mu shin zee-en mu mah; gu dhik a dhik deh gun gu nah kot a ri-in mhi Naan oh, peh dhi Nin-Naan dung mu bwer mu pwat khi yil sih. 2 Khat gu shin asih bhi, gu man ri-in dhi mhi Naan, dhi dem nah Jesu gu ba-am fun dhi sam nshik gurum, bhi a nih a Naan. 3 Ri-in dhi nin dem Jesu mah bhi a mhi Naan mah, wunih a ri-in mhi sha-ar fwom khi gu ba-am dhi gu khilhing dhi nih npeh wul, dang bhi khidet sih bhi, nih khi yil gweh. 4 Jep nhi mu wu diyen, gun muk a mhi Naan gwe, shin gu sih khohorrong khi kha bi wuni feh, peh bih dhi phizung guh, met nbal gwo dhi a mhi yil sih. 5 Muh, a mhiyil sih, asih deh muh phi bhilip a bhilip khikha yil sih dih, yakhal yil sih phi khiling mu. 6 Mun a mhi Naan; gwo dhi mhi Naan bhi, khi khilhing mun, yakhal gwo dhi a mhi Naan mah bhi khi khiling mun mah! A khah asih feh bhi, mu man ri-in mhi ze-en khi ri-in mhi dung. 7 Sha-ar dem fhinmu, guh dem shak, peh dhi demshak a mhi Naan. Gwo dhi nih phi dem gurum mu bhi nih a mhi Naan, yakhal bhi man Naan. 8 Gwo dhi nih phi dem gurum mu mah, bhi man Naan mah, peh dhi man Naan anih a dem-shak. 9 Asih de mu nin dem dhi Naan nih khi nih npe mu dhi Naan lep khi lah nih khime wuthis shin sam khi yil sih, peh deh mun mu khat se-en wu tai-tai dih. 10 Dem asih, peh dhi a mun mu dem Naan mah, anih dem mun deh lep khi lah nih shin sam khiyil peh deh nih mang shikbis fun dih, peh tong shakhap. 11 Sha-ar dem fhinmu, khipe dhi Naan nih dem mun sih, bhi nih ret deh nmun mu nin demshak dih. 12 Me gurum sham nah Naan mah dak ko bhi dang khat mun phi nin dem shak bhi dem khi Naan khi tong phizung mu, dem wu tai - tai. 13 Asih feh bhi mu man dhi mun phi twakhat but Naan shin Naan nih but mu, peh ri-in khi muk dhi shin mun. 14 Mu nah shin mu shin langthing dhi Ndah Naan lep khi lah nih shin sam peh deh nih sam bo-or ngu ba-am khi yil dih. 15 Gwo dih nin dem dhi Jesu nih a lah Naan bhi Naan khi tong phizung muk, yakhal nih but Naan. 16 Mu man shin mu shin zee-en khi kha dem dhi Naan nih phi nin mun; gwo dhi nih nin dem bhi bhi Naan khi tong but muk, shin nih nbut Naan. 17 Khat mu shin asih bhi dem khi Naan shin ji der mu khi gam; yakhal khi lap mun par dhi nih peh sam tok diyel khi yil sih. 18 Dem shak nih khi luhut but feh mah, npeh dhi dem khi ba khi luhut dangkong. Luhut a je-el peh dhi gu luhut bhi nih khi kot khi dem wu zen-zen mah. 19 Mun phi dem shak a peh dhi a nih she nin dem mun. 20 Gwo dhi nah jin phi dem Naan dang bhi nih phi dem emnhighin nih mah, bhi ni a da-dung. Peh dhi gwo dhi nih phi dem emnhighin nih dhi nih phi nah feh bhi khi shin nang deh dem Naan dhi nih phi nah ni - eh? 21 Dhisi anih a wa-ar dhi mu khat der muk, dhi nah gwo dhi nih dem Naan bhi nih dem emnhighin nih zak.