EP fe 3

1 Guh nah khan dem dhi Ndah Naan nih khi nih npeh mu de khi yong mun a jep Na'an dih, bhi mun asih feh. Bih dhi lhi de yil sih man mun mah bhi a peh dhi mu man nih mah. 2 Sha'ar dem fhinmu, khidetsih bhi mun a jep Naan, dang bhi kot mun peh tong anang nthikhim - oh, bhi mu nin mun gwe mah, dak-ko bhi mu man dhi par dhi khi nin shini bhi mun peh bor a khi pe ni sih, peh dhi mun peh naa'ah nih a khipe dhi ni di sih. 3 Gwo dhi nih bwakhat phizung nih den a wurret asih khider Naan bhi, ni den shini a wu bang, khipe dhi Naan nih a wu bang sih dih. 4 Gwo dhi nih a gu shin shikbis bhi ni agu ghakharshik. 5 Gu man dhi mu shin ni shin sam a peh deh ni mang shikbis funmu dih, dang bhi ni khi shikbis mah. 6 Gwo dhi nih phi tong khi yar mhi Naan bhi nih phi shin shikbis mah. Gwo dhi nih phi shin shikbis bhi nin dhi sham na-ah Naan mah, peh dhi asi bhi man Naan mah. 7 Jep nhi mu wu diyen, yak me gurum khi gwam gun. Gwo dhi nih phi shin wurret, bhi a gu shin wurret wai a khipe ndhi la-Naan Jesu gu ba-am nih a gu shin wurret sih. 8 Gu shin shikbis bhi nih a mhi sha-ar fwom, peh dhi a she bhi sha-ar-fwom nih a gu shin shikbis wai deh asi deh la-Naan sam peh deh nih sam rakhap shi-it ngu shikbis feh shin ba dih. 9 Gwo dhi nih a lah mhi Naan bhi nih khi shin shikbis mah, npe dhi riin khi Naan nih but muk, yakhal nin dhi nih a lah wu la but Naan gweh. 10 Asih fe bhi mu khi na-ah niyen dhi mu a jep Naan, dik khi jep sha-ar fwom mu dhi mu phi shin shik wurret mah, npeh dhi nih a mhi Naan mah, shin nih phi dem emnhighin nih mu mah. 11 Ndhisi ani a bhilip ndhi mu khiling pe gyet nshe, nah mu dem sun/shak. 12 Yak mu deh a khipe Kayinu dhi nih a mhi gu shikbis deh mwan khi thi emnhighin nihndih sih mah. A peh meh deh thi emnhighin nih dih yeh? A peh dhi shi-it khimuk a wubis, dang mhi emnhighin muk a wuret. 13 Yak khi deh a bi a-ap pwo gun, mah emnhighin nhi mu, kat dhidhin yil sih nih phi niyang gun. 14 Mun mu man gwe dhi mu ten mu del phi mu-ut, mu mwan mu kat se-en npeh dhi mun phi dem emnhighin mu - mu, shin mu man dhi gwo dhii nih khi dem gurum mah bhi nih phi tong a phitong mu-ut. 15 Gwo dhi nih phi niyang emnhighin nih bhi nih a gu thi gurum, shin gu man dhi gu thi gurum bhi nih khikot khi se-en wu tai-tai mah. 16 Demshak sih dih dhi mu man bhi nih a khipe ndhi nih shin se-en nih npeh mu, bhi nih ret deh mun mu shin se-en mu npeh emnhighin mudi zak. 17 Gwo dhi nih khi bi kat sar nih, deh na-ah emnhighin nih khi nih mah, bhi yakhal kup yit nih, bhi shin nang, deh dem khi Naan khitong phizung muk-eh? 18 Jep nhi mu wu diyen, tap bhi yak gu nin dem shak shi pwo mah, gu nin nyit nbut mwan, khi shi-it dhi gun phi shin khi gurum mu. 19 Khat mu shin asih bhi mu nin dhi mun a nin ze-en, shin mu lap asi thikhim Naan. 20 Khat phizung mu nin dhi mu shin shikbnis bhi ni asi, peh dhi Naan nih a wuma, shin man bi mu khidhing. 21 Sha-ar dem fhinmu, khat phizung mu nhin dhi mu shin shikbis mah, bhi mu mwan thikhim Ndah Naan khi dem dhi nih khi nih npeh mu. 22 Mun phi khat bih dhi mu dang der muk peh dhi man phi ya wa-ar khimuk, shin mun phi shin bi dhi nih phi dem. 23 Bhilip khi muk nin nah mu shin ze-en sim khi La muk Jesu gu ba-am fun, shin mu dem shak khipe dhi nih phi dem mun sih. 24 Gwo dhi nih a gwo ya wa-ar khi Naan bhi nih a gu tong khi yil, shin Naan nih a wukhime khi nih. Kat mu shin asih bhi mu niyen dhi Naan nih but mu, peh ri-in dhi shin mun.