¹ An a kwaram ma'a?Khi Jesu Kiristi ma'a?A nah Jesu ndhi nih a Nda mu ma'a?Gun a sar shiit fhin nbut sim khi Nda Naan ma'a? ² Khat an a la lep khi Jesu nder gohotshi gurum mu mahbhi nder gu muk an a la lep khi muk.Nphe ndhi gurum mwo khi man ndhi an a la lep khi Jesu a nphe gu. ³ A nih a bih put khi eskha nih nder nyen ndhi mwo phi bil shiit ndhi a shin. ⁴ Mun khi yar ndhi mu siih shin mu shu khimhi? ⁵ Mu ke ndhi mu pan emnihin mu wurep ndhi a mat khiphe gohotshi jep lep khi Jesu yahal emnihim mu daas mwo nbut Nda Naan,yahal kefas ma wai mhi? ⁶ Kot a Barnabas khi an det ndhi mu ke ndhi mu shin shiit ma yeh? ⁷ A weh khi shin lyak shi bhal khashin yeh?A weh khi jwal ting bhi yahal siih nbut la fhe ma yeh?Kot a ngu tap tihim ndhi neh khi shu yuhur mhi tihimfhe mu ma yeh? ⁸ An phi sat bih sih mwo a shi bhal kha san det mhi?Kot waar sat bih sih mwo nmum duk eh? ⁹ Nphe ndhi nih a wuran nbut waar khi Musa ndhi ''Tap gu ohot phi mis randong ndhi nih phi dahas shu ngun ma'a.''Leng khi Naan dhe a nder randong fhe met mhi? ¹⁰ Nih phi sat a mun ma'a?Gyet mwo ran a phe mu,nphe ndhi gwo ndhi nih phi sak mar bhi nih phi dye a bih ndhi jin nphe khat ntikhim,yahal gwo ndhi nih phi bwap shu bhi dhi phi leng ndhi jin nphe khat min dhi nbut fhe. ¹¹ Khat mu kop bih nbut riin nnaar mu,bhi khi lapwo dhe nmun mu khat bih mhi shohopshik dhi nbut feh nder gu mhi? ¹² Khat pak guruum mwo phi khat bih mwo nder gu,bhi mun nphe khat bih nder gu ndhi dhel met nmhi mwo ma'a?Dang mun mu wal nkop ma duk.Nkop Wu nih bhi mun mu shin mohor khi jep bih mwo khiding yak mu ntrap kwahap bilip Naan ndhi mu ji khi nih ngun. ¹³ Gun khi man ndhi mwo ndhi phi shin shiit Naan phi khat bih ndhi mwo khi siih a khi nphe shiit fhe ma'a? ¹⁴ A sih zak,Nda Naan sat nnah mwo ndhi phi shin shiit Naan bhi mwo khi khat siih fut a khi phe fhe. ¹⁵ Dangbhi an a shin shiit khi yar ndhi sih nphe khat siih khi shu nphe khasan mah.Yahal an phi ran bih sih ngun a nphe dhe ngun gu shin mhe bhi dhi khidhel nnan mah.Khiret met dhe nnan a muut dhi-Mhe gurum khi bwap shahap nih nnan mah! ¹⁶ Nphe ndhi khat a kop bilip Naan bhi an khi mhe phi shi ndhi a bwap shahap nih mah,nphe ndhi a tiit dhe nnan a shin dhi.Khizak,khi ret nnan mah khat a kop bilip Naan fhe mah. ¹⁷ Nphe ndhi khat a shin khi bhizung nih khimeh bhi a khat wuret fhe.Dhe khat a shi dem fhin mah bhi,an khi shiit wuyon tikhim nkha nih ndhi a wuden nnan. ¹⁸ A mhe a wuret ndhi an phe kat yeh?Ndhi khat a kop bilip Naan bhi an phi shin bilip sih nnohot nkwat bhi par a khat phishi kop bilip khi Naan. ¹⁹ Dau khi ndhi meh bhi bhal shi nih mah,a dhe a kwaram mhi khiding dhe nnan a dhil en gurum wuyon mwo dhi. ²⁰ Nder Yahudawa mwo bhi a dhe a khiphe mwo sih,dhe nnan a dhil en mwo dhi.Nder mwo ndhi waar trang mwo,a dhe a khiphe meh meh nnar mwo dhe nnan a dhil en mwo dhi.A shin bih sih dau khi ndhi waar ten an mah. ²¹ Nder nyen ndhi waar bem mwo mah,bhi a dhe khiphe mwo sih dau khi ndhi an a put nbut waar khi Naan shi kha san mah,dangbhi a waar mhi Jesu Kiristi.A shin a sih nphe dhe nnan a dhil en gurum mwo ndhi mwo man waar khi Naan mah shin waji dhi. ²² Nder mwo ndhi khi riin mah,bhi riin man sam tohor ndhe nnan adhil mwo shin waji khi yar dhi.A dhe a bih mwo bwer ngurum mwo dik dik,dhe nnohot pak mu khat bar mhi sehen dhi. ²³ An phi shin bih mwo nphe bilip khi Naan,dhe nnan par a kot nnaar nyen khat wuret dhi. ²⁴ Gun khi man ndhi nnaar nyen nashosho bhi khiding khi mwo phi sho dangbhi a gurum khimeh nphe put zar/khorrong/peel.Nphe wunih bhi gu sho dhe ngun gu khat wuret fhe dhi. ²⁵ Nyen shin shap khi shohopsat mwo phi yak khasut khi mohor.Mwo phi shin a sih nphe lap bih wuret ndhi khi tihkook,dangbhi mun phi shin mun a phe lap wuret ndhi khi tihkook mah. ²⁶ Dangbhi an phi sih man a nnohot nphishi mah,an phi jwal kep nih nyil a khiphe gwo ndhi nih phi nas pihip zak dhet mah. ²⁷ Dangbhi an phi yah shohop san yahal a dhe a khi phe kwaram sih dhe khat a lat kop bilip Naan bhi an shi kha san a khat dhel khiting Naan.