¹ An phi dem yit gun nkwoo mah emnah mwo ndhi nda mwo mu gyet nbhider limin libhim yahal duk duk mwo mwan nkong am teku. ² Mwo khiding mu shin baptisma nbut Musa ndhikhin khi am teku, ³ yahal khiding khi mwo mu siih siih mhi riin. ⁴ Shin khiding khi mwo mu shu am mhi riin wu khimeh.Nphe ndhi mwo shu am nbut pang ndhi khi riin ndhi mwan nder mwo,bhi pang fhe a Jesu Kiristi. ⁵ Dangbhi ret nyit Naan nder wuyon khi mu mah,yahal kum mwo dhe tiit dhi nnaar dem. ⁶ Khi detsih bhi sih a nphe dhe nmun mu kam mhe bhi nbut,yak mu ndhe a nyen tik khi dhel bhi ndhi a mhi shohopshik. ⁷ Tap gu ndhe a nyen dhik yil nkum,khiphe nyen wugyet mwo mah.Ndhi sih a khiphe bih ndhi a wuran ndhi sat nnan,''Gurum fhe mwo twahat a phe siih khi shu,khi shap.'' ⁸ Tap mu nshin tihleet khiphe mwo wugyet mu shin.Nbut puus khimeh bhi gurum dubu ya gurum khi kun mwo dwan nkop fhe. ⁹ Tap mu nkam tuhur Jesu,khiphe mwo wugyet mwo bwer mu shin yahal nwoo tyo mwo. ¹⁰ Khi zak,tap gu nshin shap peel khiphe dhi mwo wugyet mwo shin yahal la lep muut mhi Naan tyo mwo. ¹¹ hidetsih bih sih gyet tah a phe dhe nnih kam en nmun ndhi.Mwo ran mu nphe dhe nnih dhe a bih kam nmun-nphe mu ndhi lat khi yil ji gwe sih. ¹² Nphe ndhi a sih,gwo ndhi nih phi nah jin a khiphe dar,tap yak npaal. ¹³ Mhe kam tuhur sham met nbhal fuk ndhi mwo sham nah ndhikhin yil sih gwe mah.Phikop winih bhi Nda Naan dar khidhel zehen.Khi yit nmwo kam tuhur gu ndhi khi met bhal fuk mah.Dau khi kam tuhur fhe bhi khi nin yar put,dhe ngun gu suhul dhi. ¹⁴ Nphe wunih,gun ndhi an phi dem,gu sho nsar dhik yil nkum. ¹⁵ An phi lap bilip khi gun a khi phe gurum ndhi mwo man jep er phe,khat a sih bhi gu shin leng khidhel bih ndhi an phi sat. ¹⁶ La dah bih wuret ndhi mwo phi shin sih,a tikhim Nda Jesu mun phi koo ma'a?Dhe gilaas ndhi mun phi koo a sih a nan shohop shik Nda Jesu Kiristi ma'a? ¹⁷ Khiphe ndhi beredi a khimeh ,mun bwer dak ko dangbhi a shohopshik wu khimeh.Mun phi siih bereti ndhi khimeh fhe khishak. ¹⁸ Gu nah Isarila ndhi nih a khiphe nan sih.A mwo ndhi phi siih bhizuhum khi Naan a phi kat mut khiphe shin fhe ma'a? ¹⁹ An phi sat a meh?Kum a bih kyen mhi?Kot siih ndhi mu shin zuhum khi nih nkum a bhi kyen yeh? ²⁰ Dangbhi an phi sat bilip a khidhel bih zuhum ndhi nyen ndhi mwo man Naan mah phi shin nkum,a Naan ma'a.An phi dem dhe ngun gu kot nder nyen dhik yil nkum mah. ²¹ Gu shu ndah Naan shin ndah kum mah.Gu tong khi phe siih Naan shin gu tong khi phe siih kum mah. ²² Kot mun phi dem tuhur nung Naan khi tihlik khimuk mhi?Mu bhal met nnih mhi? ²³ ''Bih khiding khi waar khidhel,'' dangbhi a bih khiding khi kyen mah.''Bih khiding khi waar,'' dangbhi a bih khiding khi dik ngurum mah. ²⁴ Tap ngurum mu tang a bih ndhi ret nmwo det mah,nkop wunih bhi mu tang a bih ndhi tinglih fun mwo khi khat kyen dhi nbut. ²⁵ Gu siih jep bih khiding ndhi mwo phi seet khi nih nlihtuk nnohot ntal dhe ndhisih a meh? ²⁶ Nphe ndhi dhikhinyil sih a mhi Naan khi jep bih ndhi mwo nbut fhe khiding. ²⁷ Khat gurum ndhi nih khi shin zehen mah yong ghi dhe ngun gu siih siih khishak dhe ghi phi dem mwan fhe,bhi ghi siih bih ndhi shin nghi khiding nnohot tal dhe ndhisih a meh. ²⁸ Dang khat gurum sat nghi nnah,''Mwo shin bhizuhum khi ndhi sih,'' bhi tap ghi nsiih nphe ndhi ret ndhi sat nghi yak ghi ntanko. ²⁹ Tanko khi gwo ndhisih,an phi sat,a mak mah.A mhe khi lih dhe a gurum khi sat bih ndhi an phi dem dhi yeh? ³⁰ Khat a siih siih fhe khi plang,a mhe lih dhe mhe gurum khi tihkook khi bhizung nih nphe bih ndhi a shin plang khidhel yeh? ³¹ Nphe ndhi a sih, kot ghi siih, kot ghi shu, kot gu shin a mhe, bhi gu shin nbut phe bang khi Naan. ³² Tap gu nkot khi rap ntikhim Yahudawa khi Helenawa yahal ntikhim nyen mwan nder Naan mah. ³³ A sih zak, an phi dem shin bih wuret ntikhim gurum mwo khiding. An phi tang a kyen nphe kha san det mah, a mhi gurum khiding. An phi shin a sih dhe pak nnohot mwo khat bar khi sehen dhi.