¹ u dhe a nyen kam bih ndhi an phi shin,khi phe an ndhi phi dhing Nda Jesu. ² Khi detsih an phi plang gun nphe ndhi gun phi kik dersuk khi an.A plang gun nphe ndhi gun phi ya fyar bhal bhal khi bih ndhi a shin ngun. ³ Khi detsih an phi dem dhe gun gu man ndhi Jesu nih a kha mhi lih daas khiding,yahal mis a kha mat,khi phe ndhi Nda Naan a kha khi Jesu Kiristi. ⁴ Mhe mis ndhi khi dang phi Naan kot koos bih khi kha nih a wu ohot bhi shin yon nkha shin mah. ⁵ Dangbhi mat ndhi dang phi Naan kot mhe bhi khi kha dhi nnohot ohot bhi shin yon nkha sat mah. Nphe ndhi dhe a khiphe ndhi kum kha dhi sih. ⁶ Nphe ndhi khat mat khi ohot kha dhi mah,bhi nwak ndhi gos pak shohop kha dhe nnih dhe a wukhip dhi.Khat a bih khakul dhe nnih gos pak shohop kha dhi kot kum khiding oh,bhi nwak ohot kha fhe. ⁷ Nphe dhi mis khi ohot kha nih mah,nphe ndhi nih a mhiriin Naan.Dangbhi mat a bih ret nyit khi mis. ⁸ Nphe ndhi Naan dak mis a nbut mat mah.Dangbhi mwo shang mat a nbut mis. ⁹ Nphe ndhi mwo shang mis a nbut mat mah.Dangbhi mwo shang mat a nbut mis. ¹⁰ A bih ndhi lih dhe kot a tiit dhe mat ohot kha dhi dhe nnih nin ndhe nih khi gurum nkha dhi dih,nphe jep lep khi Naan mwo. ¹¹ Dau khi ndhi a sih,nder Naan bhi mat a ntikhim mis,mis khi dar mhi kha shin nnohot nmat mah. ¹² Nphe ndhi mat put a nbut mis,a sih zak mis put a nbut mat.Yahal jep bih khiding put a nder Naan ¹³ Gu tok dyel nkha suk:Ret dhe nmat dang phi Naan nnohot ohot kha dhi mhi? ¹⁴ Phitong ndhikhin yil sih nih phi nin ngun ndhi khat mis yit shohopkha nih kwan kwan bhi khi sam khi yon khimuk ma'a? ¹⁵ Phitong ndhikhin yil sih nin ngun ndhi kat mat yit shohopkha dhi a wu kwan bhi khi shin tikhin nnih ma'a?Nphe ndhi shohopkha ndhi mwo shin nnih a phe ohot kha muk. ¹⁶ Dang khat mhe gurum nih phi dem gaharshik khidhel ndhisih,bhi mun khi mhe bih ndhi nih a wuden khidhel fhe mah,shin lih Naan khi nih mah duk. ¹⁷ Dangbhi nphe bih kam ndhisih,bhi an nphe plang gun mah.Dang khat gu ji nder shak,bhi a nphe ret fhe mah,a nphe sihit tihkook. ¹⁸ Nphe ndhi nshe,a khiling ndhi khat gu ji shishak nlih Naan,bhi bakshak khinaar gu,bhi a shin zehen npak mwo. ¹⁹ Nphe ndhi a tiit khi kot bakshak nnaar gu,dhe mwo ndhi mwo bun bhi dhe a bih nah nyit khinaar gu dhi. ²⁰ Nphe ndhi khat gu ji nder shak bhi gun phi siih a siih kik der mhi Naan mah. ²¹ Khat gu siih,bhi gwo sih phi siih min dheshe gohotshi mwo siih mut dhi.Mhe gurum khi nehen yahal mhe gurum shu am fhinih ba khi lang nkha muk. ²² Gun khi lih gu mwo nphe siih khi shu mah mhi?Gun phi shin yon nlih mhi Naan mah,yahalgu nyam mwo ndhi khi mhe bih mah.An nphe sat a mhe ngun yeh?A plang gun kho woh?An a plang gun mah. ²³ Nphe ndhi an a lap a nder Naan bhi ndhi an phi shin ngun,ndhi Jesu,nlih par ndhi mwo sehet khi nih bhi mang beredi. ²⁴ Khi dangkong ndhi shin plang,bhi trap yahal sat nnah, ''Ndih sih a shohopsan,dhi a shingun.Gu siih dhe ngun gu kik dersuk khi an dhi.'' ²⁵ A sih zak,bhi mang dah khi dangkong siih,yahal sat nnah, Dah sih a twarshik wupwo ndhi nbut tikhim fhin.Gu wet phi shu fhe dhe ngun gu khik dersuk khi an dhi.'' ²⁶ Nphe ndhi khat gu siih bereti sih yahal gu shu am ndhi nla dah sih,gun phi leng a muut Nda Jesu dheshe wawul khi muk dhi. ²⁷ Gwo ndhi khat siih beredi sih,kot shu a am nbut la dah khi Nda Jesu nyar ndhi bang mah bhi dhel khidhel nshohopshik khi tikhim mhi Nda Jesu. ²⁸ Bhi ret dhe ngurum bil shin dang dhe nih she siih beredi yahal shu am ndhi nbut la dah sih dhi. ²⁹ Nphe ndhi gurum khat siih yahal shu nnohot ndak phitong fhi nih bhi nih phi shu a dyel khidhel shin. ³⁰ A bhi ndhi lih dhe gurum mwo bwer nnaar gu mwo khi bhal mah shin kaham khaat yahal pak gu dwan gwe. ³¹ Dang khat mu tap khi sun,bhi mwo khi tok dyel nmun ma'a. ³² Dang khat a Naan tok dyel nmun,bhi lih nmun mu sam khi kha mu yak mwo ntihkook khi mun a wu khimeh khi dhikhin yil sih. ³³ Nphe ndhi a sih,emnihinneh mwo,khat gu ji nder shak nphe siih fhe bhi gu tap phi shak. ³⁴ Khat mhe gurum khi nehen,bhi siih khi pang lih nih,dhe ngun khat gu ji ndershak bhi khi kot a phe tok dyel mah.Yahal nphe pak bihmwo ndhi gu ran bhi a shin kam khidhel fhe khat a wul.