¹ Npeh pak bih mwo ndhi ghi ran khidhel: ''Ret dhe nmis dem mat mah.'' ² Dangbhi nphe pak tik mhi yit khidhel shorop,bih ret dhe nmis kot khi mat nih,yahal mat khi mis mat. ³ Ret dhe nmis shin shiit fhinih mhi mis nmat nih,yahal a sih zak mat gam waar mhi mat nmis dhi. ⁴ Mat khi nyang khidhel sat nmis dhe mah,a sih zak mis khi nyang khidhel shin nmat nih mah nphe ndhi shohopshik muk a nphe mat muk. ⁵ Tap gu nbyas khidhel shohopsuk nshak,kat a pwo rhi shak nphe mhe jep ter mwo dang.Ndhi gu shin a sih nphe ji khi mhe dang ntikhim Na'an khi dangkong wunih fhe bhi shin gu bwakgu wakya dhi nkop suk yak nshahar fwon khat yar nder gwo ndhi nih mohor/ya shik mah. ⁶ Dang an phi sat bih sih mwo ngun a khiphe kar sih,a waar mah. ⁷ An phi sha ndhi yeh khi kot gurum mu a khiphe an sih.Dangbhi Na'an shin jep bih mu mun dik dik.Na'an shin meh bih ngwo ndhisih yahal shin meh bih wukwa dik nmeh gurum zak. ⁸ Nphe gwo ndhi man lap mat mah khi mat ndhi mis muut nnih,an phi sat a lih yeh khi ret ndhi mwo twahat a sih nnohot ndik khiphe an sih. ⁹ Dang khat mwo mak phe yak khasut mah bhi mwo lap shorop mhabhi mwo mwan dyak.Nphe ndhi khi ret met mwo shin a sih a sih yak bha mwo ndhe a nyen tik. ¹⁰ Nphe nyen ndhi mu a nyen dik, a shin waar ndhisih, a an mah, a mhi Nda ndhi mat khi tih dik khi mis dhi mah, ¹¹ (damgbhi khat gap shak tah nnih khi mis dhi bhi shin mwan dik wukwa mah, nwak shin bah dhi nder mis wusihir fhe), yahal mis khi tih dik shi mat nih mah zak. ¹² Nphe gohotshi fhe mwo an a sat, a Nda Naan sat mah, ndhi khat meh emnah jhi mat ndhi nih khi shinzehen mah, damgbhi khat ret nyit muk nphe tong khi mat wu nih fhe bhitap nshen nih mah. ¹³ Khat mat nih khi mis ndhi shinzehen mah dangbhi ret nyit muk nphe tong ndik shi nih bhi tap ntih dik khi nih mah. ¹⁴ Nphe ndhi mis wu nih fhe mu den nih a nphe mat wu nih fhe, yahal mat ndhi khi shinzehen mah zak mwo den nih a nphe mis wu nih zak. Nphe ndhi khat a sih mah bhi jep fhe mwo nphe dhe a khi jep ndhi mwo nnohot ndah dangbhi a sih mah. ¹⁵ Dangbhi khat gwo ndhinah shinzehen fhe mah dhel bih nih, bhi yit mwan bih nih . Nbut phe wu nih fhe nhi dik khi mu yeh niha nphe put kyen/kha mah. Naan young phe nmun a phe tongshahap khi shak. ¹⁶ Mat, shin a neh dhe yih man ndhi mis yih nphe khat bar khi sehen a shi shik mah yeh? Mis, shin a neh dhe ghi man ndhi mat ghi nphe kat bar shi sehen a shi sak mah dhi yeh? ¹⁷ Khat a sih, khiphe ndhi Ndah shin nih shin nmun shi khimeh shi khimeh bhi mu shin bhi mu nyar ndhi Naan young phe nmun. ¹⁸ Mu pun mhe gurum ndhi mwo youn phe nnih nphe shinzehen mhi. Tap nnih dhe a khiphe gwo ndhi mwo pun nih mah sih. ¹⁹ Nphe ndhi a pun, kot shin khi pun dhe a meh bhi mah. Bih ndhi dih nbut fhe bhi a shin lohot nbut waar khi Naan. ²⁰ Yit dhi dhenmum mu dhe dhi nbut youngphe ndhi Naan young mun nphe shinzehen fhe. ²¹ Dok gun a kwaram ndhi Naan youngphe ngun a? Tap gu ndamphe nkhasuk shiwu nih fhe mah. Dangbhi khat gu kutdih a kwaram mah bhi gu shin shiit khi wu nih. ²² Gwo ndhi Naan youngphe nnih khiphe kwaram sih bhi kutdhi a kwaram sak mah. A sih zak, gwo ndhi dok nih a kwaram she she mu youngphe nnih dhi mah bhi khidetsih a kwaram khi Kiristi. ²³ Mu sehet gun, nphe wu nih tap gu ndhe a kwaram mhi gurum mu mah. ²⁴ Emnihin nih mwo, kot dok gurum a weh dheshe khat youngphe dhi bhi dhe a wu khimhe khi Naan. ²⁵ Nphe dwan mwo,an khi mhe waar nder Naan nphe gu mah.Dangbhi an nphe shin kar fhinih a khiphe gurum ndhi khat wuret khi Naan ndhi khi khiphe bwot mah sih. ²⁶ Dangbhi,nphe bih wubis ndhi nih nphe ji dih ntikhim sih bhi ret ndhe ngurum dar khi bhal dhi. ²⁷ Ghi khi mat mhi?Tap ghi tang yar tih dik.Khat ghi khi mat mah,tap ghi mat mah. ²⁸ Dangbhi khat ghi lap mat,bhi ghi shin shikbis mah,yahal khat dwan mwan dik bhi shin shikbis mah.Dangbhi ngu lap mat khi dwan ndhi mwan dik bhi mwo nphe khaat khi tik wunih fhe,a nphe nih dhe an phi dem waar gun dhi. ²⁹ Dangbhi an phi sat a sih emnihin nih mwo ndhi:Pong dhi mah.Dhi ntihim sih bhi nyen ndhi mwo khi shoropbhi mwo twahat a khiphe ndhi mwo khi nih mah sih. ³⁰ Mwo ndhi phi wulmuut bhi mwo shin a khiphe ndhi mwo phi wal mah,yahal mwo ndhi phi ret nyit bhi mwo shin a khiphe ndhi dun phi ret nyit mah,yahal mwo ndhi phi sarap jep bih mwo shin a khiphe ndhi dun nnohot nmhebih/sahar wen sih; ³¹ yahal mwo ndhi phi shin bih ndhi ndhikhin yil bhi mwo shin a khiphe ndhi dun phi shin shiit khi nih mah sih.Nphe ndhi yil ndhi khi detsih nih nphe laat. ³² An phi dem dhe ngun gu yit leng dhi.Gwo ndhi lap mat gwe mah bhi tong leng a bih ndhi a mhi Naan,khi yar ndhi khi ret nyit muk khi nih. ³³ Dangbhi gwo ndhi lap mat nih phe leng a bih dhikhinyil khi bih ndhi shin nphe ret nyit mat muk--- ³⁴ leng khi muk baknaar vil.Mat ndhi nwam dik gwe mah khi dwan leng khi mwo a khidhel bih ndhi a mhi Naan nyar ndhi mwo khi yit shohopshik khi riin du nphe shiit Naan.Dangbhi mat dik leng khi muk a khidhel bih dhikhin yil khi bih ndhi dhi shin nphe dhel en mis dhi. ³⁵ An phi sat bih sih mwo a nphe kyen fuk bah a nphe lih tikhin ngun mah.An phi sat a sehen ngun,dhe gun gu shin khasuk nphe shiit Naan nnohot nphe nah phe ndang kong. ³⁶ Dangbhi khat meh gurum nih phi tap dwan yahal shin yon nnih mah,khat dhel phi yih ndhi mang khat mwan dik gwe dhe kot a sih-bhi shin bih ndhi ji phi dem fhe.Nih phi shin a shikbis mah.Ret dhe nkhan mwo wunih mwo mwan dyak dhi. ³⁷ Dangbhi khat dar khi bhizung nih a wubal,khat mu lih tiit nnih mah yahal mu mak phe yah khasut yahal mang nbhizung nih nphe shin a sih dhe nnih pan dwan fhinih bhi shin bih wuret. ³⁸ Gwo ndhi lap dwan fhi nih shin bih wuret,yahal gwo ndhi khat ji lap min mah bhi khi shin bih ndhe ret met. ³⁹ Mat nih mis dhi ndhi kutdhi nkaham.Dang khat mis fhe muut bhi khi mak phe dik ngwo ndhi nih phi dem,dangbhi a nbut yar khi Naan. ⁴⁰ Dang nnah fhin bhi yeh khi ret nyit muk met khat tong shi kha sat.An phi nah a khiphe ndhi an khi riin mhi Naan duk.