¹ Khidetsih an phi dem sat ngun,emnihinnhi mwo ndhi,bilip Naan ndhi a sat ngun ,ndhi gu lap dhe gun phi dar khidhel, ² ndhi a nih khi shin bar khi sehen ngun,khat gu dar khi bhal khidhel fhe dhe gu kom shinzehen fuk mah. ³ Nphe ndhi a shin nih ngun khi yon khi muk khiphe ndhi a lap ndhi nih phi sat nnah Kiristi muut nphe shikbisfun khiphe ndhi nih a wuran, ⁴ ndhi mwo wum riih,yahal khi dangkong ter kun bhi yahal a khiphe ndhi nih a wuran. ⁵ Jesu Kiristi nin shin nkefas khi jep kam khi muk ndhi mwo sarkhavil; ⁶ yahal nin khashin ngurum ndhi mwo met ndari pahat npong wu khimeh.Mu bwer nkhaham dangbhi pak mwo dwan gwe. ⁷ Yahal nin shin nJamis khi jep lep khimuk khiding. ⁸ Nlat fhe nin shin nnan khiphe lah ndhi sam nmehen. ⁹ Nphe ndhi an a sihittis nnaar jep lep khimuk.A mak ndhi mu khi yong an a lah lep khi muk mah,nphe ndhi a shin jeel nnyen mwan nder Naan mu. ¹⁰ Dangbhi nphe wuret khi Naan bhi an a put gurum ndhi mu khi yong sim yahal wuret ndhi a khat khi dhe bih wuban mah.Phekop fhe bhi a shin shiit wuyon met nmu.A sih bhi a an mah,a wuret khi Naan ndhi nbhizung nhi. ¹¹ Nphe ndhi a sih,kot a an,kot a mu,bhi mu kop bilip Naan yahal gu shinzehen. ¹² Khat Jesu yahal khi phe ndhi mu sat sih bhi shin a nang dhe pak gu phi sat nnah mhe yahal dih nphe dih nphe nyen ndhi mu dwan dih mah yeh. ¹³ Dang khat yahal dih nyen ndhi mu dwan mah bhi Jesu shikha shin yahal mah, ¹⁴ dang khat Jesu Kiristi yahal mah bhi bilip Naan fun khi phishi mah,yahal shinzehen fun nih khi phishi mah. ¹⁵ Shin a sih zak,bhi tangting fun khidhel Naan a dung,nphe ndhi mun mu nah khi yit mu ndhi Naan yahal khi Jesu Kiristi khi dangkong ndhi muut.Bhi yahal khi nih mah,khat mwo khi yikhil khi mu ndhi mu dwam mah. ¹⁶ Nphe ndhi khat mu yikhil khimu ndhi mwo dwam mah bhi Jesu Kiristi shi kha shi nih yahal mah duk; ¹⁷ dhe khat Jesu Kiristi yahal mah,bhi shinzehen fuk dhe wuban,bhi gu kut dhi nbut shikbis fuk. ¹⁸ Mhi mwo ndhi mu dwam nbut Jesu Kiristi bhi mu kam. ¹⁹ Khat a nphe ndhi mun khi sehen dhe mun phi ling yit mu nphe Jesu Kiristi mah bhi nbut gurum mu khiding bhi mun a bih nah jeel. ²⁰ Dang khidetsih bhi yahal khi Jesu Kiristi khi dangkong ndhi muut a khiphe lahting ndhi nshe nbut nyen ndhi mwo dwam. ²¹ Nphe ndhi gyet muut ji a nphe gurum khimhe,bhi a nphe gurum khimhe bhi yikhil khi dangkong muut ji. ²² Nphe ndhi muut ji a nphe Adamu,bhi nphe Jesu Kiristi bhi gurum mu khiding mu khi khat sehen. ²³ Dang gurum khiding khi phe dar fut,Jesu nih a lah ting ndhi nshe yahal gurum ndhi mu dwam nbut sim khi muk mu khi kat sehen. ²⁴ Bih lat fhe khi ji ndhi Jesu khi shin yon Nda Naan yahal nih khi bah khi yon mhi yil sih khiding khi nyen phi tikhim mu. ²⁵ Nphe ndhi a tiit dhe nnih yah phetong wuyon ''dhe trang shahar fwom fhi nih khi kwak''. ²⁶ Shaharfwom ndhi nlat ndhi Jesu khi trang bhi a muut. ²⁷ Nphe ndhi ''Den bih khidhing nlhap shi nih''.Dang khat sat nnah ''Nih den bih mu khiding,'' bhi nih a wuman ndhi gwo ndhi den bih khidhing nih nbut mah. ²⁸ Khat bih mu khidhing a nsar muk,bhi lah fhe nih nsar gwo ndhi den khidhing khi sar nih,dhe nNaan dhe a kha bih mu khidhing dih. ²⁹ Khat a sih mah,bhi bih fhe nih nphe kot a nang nnyen ndhi mu shin baptisma nmu nbut muut yeh?Khat mu khi yikhil khi nyen ndhi mu dwam mah,bhi mu shin baptisma nmu a nkwat meh? ³⁰ A mhe lih dhe mun nbut bih ndhi mu lahpwoo dih yeh? ³¹ Muut nkha nhi shi bit shi bit.Kha nhi phi wup nphe sim khimuk emnihin nhi mwo nphe ndhi a nih a bih ndhi an khi nih. ³² An phi kyen a mhe a nnah khi yit gurum ndhi a lyak khi luu dem nAfisa,khat nyen ndhi mu dwam mu khi yikhil mah yeh? ''Bhi mu sih yahal mu shu dhe nmun daar mu dwam dih.'' ³³ Tap mu ngwam mun,nphe ndhi ''Shahar wubis khi tih tihkook khi en wuret.'' ³⁴ Gu tong khi en gu!Gu tong khi zehen!Tap gu ndheltikhim khi shin shikbis.Nphe ndhi pak gu mu man mhe bih khidhel Nda Naan mah.An phi sat bih sih khi khakul nphe gu. ³⁵ Dangbhi mhe gurum nphe sat nnah, ''Mu phi yikhil khi gurum ndhi muut dhe yahal a khi mhe shohopshik ndhi neh? ³⁶ Ghi a naan yohor!Bih ndhi ghi kop khi bhee mah khi muut dangsih. ³⁷ Bih ndhi gih kop a shohopshik ndhi khi kot mah,a sherem fhe.Khi put a alkama mah bhi mhe bih wukwa dik. ³⁸ Dangbhi a Naan khi shin shohopshik ndhi nih dem dik dik nmu. ³⁹ Shohopshik a bih wukhimhe khidhing mah.Khiphe ndhi nkhan shohopshik a khimhe nphe gurum mu,yahal mhe nkhan shohopshik nphe long,yahal wukwa nphe yer,shin mhe wukwa nphe sherep zak. ⁴⁰ Shohopshik mu dih nphe khiting naan yahal mhi dhikhinyil dih.Dangbhi phe bang khi shohopshik ndhi khiting naan dik khi phe bang khi shohopshik ndhi a mhi dhikhin yil. ⁴¹ Phe bang mhi puus nih dih,phe bang mhi tar dih yahal phe bang mhi zar dih.Nphe ndhi zar mu dih dik dik khi phe bang fhut. ⁴² A sih zak khi yahal khi nyen ndhi mu dwam.Bih ndhi mu kop nih khi tihkook,dangbhi bih ndhi mu yahal khi nih khi tihkook mah. ⁴³ Mu kop nih khi samshik mah,dangbhi mu yahal khinih nbut phe bang.Mu kop nih khi bhal mah,dangbhi mu yahal khi nih khi bhal. ⁴⁴ Mu kop nih khi shohopshik ndhi yit nah,dangbhi mu yahal khi nih khi shohopshik ndhi a riin.Khat shohopshik ndhi yit khi nah dih,bhi shohopshik ndhi khi riin dih. ⁴⁵ Khi phe ndhi a wuran,''Gurum ndhi nshe,Adamu kot khi sehen.'' Adamu ndhi nlat kot a riin ndhi khi shin sehen. ⁴⁶ Dangbhi a riin she wul mah a dhi yit khi nah she ndheshe riin dih. ⁴⁷ Gurum ndhi nshe a mhi dhikhin yil ndhi mu dak nih khi wan yil,gurum wu vil tonga khiting Naan sam. ⁴⁸ Khiphe ndhi mu dak khiyil dih,a sih zak mu ndhi mu dak khi yil yahal khi phe gurum ndhi khiting Naan dih,bhi mwo ndhi mu tong a khiting Naan. ⁴⁹ Khiphe ndhi mun khi mhiriin gurum ndhi mu dak khi wan (yil)mbhi a sih mu khat mhiriin gurum ndhi tong khiting Naan. ⁵⁰ Khidetsih a sat a sih emnihin nhi mu,ndhi nan khi tikhim mu khi khat phe khi phetong Nda Naan mah.A sih zak,bih ndhi khi tihkook siih kop bih ndhi khi nyang tihkook mah. ⁵¹ Gu nah ah,an a sat mhe bih fhiipwo ngun,mu dwam khidhing mah,dangbhi mu khi pring mun khiding. ⁵² Mu khi pring mun npong mhi dhip yit khat mu tah feer ndhi nat. Nphe ndhi mu khi tah feer yahal mu ndhi mwo dwam mu khi yikhil khi shohopshik. ⁵³ Ndhi khi tihkook/wam mah, yahal shohopshik ndhi khi wam sih mu khi pring nih shin wa ji nshohopshik ndhi khi wam mah. ⁵⁴ Dang khat shohopshik ndhi khi tihkook sih lep ndhi khi tihkook mah sih, yahal khat shohopshik ndhi khi wam sih khat rhuhun ndhi khi wam mah sih bhi simbilip ndhi mu sat a wuran ndhi nnah, ''Khohorrong daal muut.'' ⁵⁵ Muut, khohorrong fhe a neh? Muut, at phe fhi a neh?'' ⁵⁶ At phe khi muut a shikbis, yahal bhal khi shikbis a waar. ⁵⁷ Dangbhi mu plang Naan Nda ndhi shin khohorrong nmun nbut sim mhi Nda Jesu Kiristi. ⁵⁸ Nphe ndhi a sih emnihin nhi mu, gu dar khi bhal, tap gu ndung/yok mah. Gu wet phi shin shiit mhi Naan, nphe ndhi gu man ndhi shiit Naan khi kot a wuban mah.