¹ Gu demshak yahal gu dar a wuret nphe zuhum ndhi a mhi riin wubang,dhe gun gu shin shiit ngujakham dih. ² Nphe ndhi gwo ndhi nih phi sat bilip khi liis ndhi a min mah,nih phi sat a khi gurum mwo mah,nih phi sat bilip a khi Nda Naan.Nphe ndhi gurum mu nphe man bih ndhi nih phi sat mat,nphe ndhi bilip khi muk a nsok nbut Riin wubang. ³ Dang gwo ndhi nih a ngujakham nih phi sat bilip ngurum mwo a nphe dik mwo,nphe kaar mu,yahal nphe zuhum bhizung/mohor. ⁴ Gwo ndhi nih phi sat bilip khi liis ndhi a mhi muk mah,phi dik a kha shin,dang ngujakham nih phi dik a nyen mwan nder Naan. ⁵ Khidetsih an phi dem yeh gu sat bilip a khi liis ndhi a muk mah.Dang bih ndhi dhel met wunih bhi yeh gu kot/dhe a nyen Jakham.ngwo ndhi a ngu jakham nih nih khi nyen met ngu sat bilip shi liis ndhi a mhi muk mah(Wunih wal ndhi mhe gurum dih nphe sat phishi fhe dang sih dheshe mu kyen dih). ⁶ Dangbhi khidetsih,emnihin nhi mwo,dhe khat a ji nder gu dhe an phi sat bilip khi liis ndhi a man mah,bhi an nphe kot khi kyen ngun ah?An nphe kot khi kyen khat a ep a nin ngun mah,shin nih nphe kot khi man man,a bilip ngu jakham mah,shin a bih ndhi mu khi kam mah. ⁷ A sih zak,khat bih ndhi khi sehen mah nih phi put khi dhikhil khiphe bel,kot a ngwe neh ndhi khat pwat khi dhikhil dik dik mah,bhi gurum nphe man dhikhil tam fhe mah. ⁸ Nphe ndhi khat leh tam fhe put khi dhikhil fhe a wuret mah bih gurum nphe shin a nang dhe man ndhi phe ke dhel lyak dhi yeh? ⁹ A bih wu khimhe khi liis bilip,khat gu sat bilip ndhi put a wuret mah,bih mwo nphe man bih ndhi mwo pih sat a shi mhe?Bhi bilip fhe dhe a khi phe sham ndhi tong mu khi bhis a nkhom. ¹⁰ Liis dih bwer khi dhi khin yil sih ndhi khi phishi. ¹¹ Dang khat an a man phishi mhe liis mah bhi an nphe dhe a phi khom nder gwo ndhi nih phi sat bilip,yahal ngu sat bilip fhe a phikhom nder nih. ¹² A sih zak khi gun.Ndhi kan gun khi rihiit nphe khat Riin,bhi gu tang bih ndhi khi saam sim bilip Naan dhe nnih put khipong dih. ¹³ Nphe ndhi ngu sat khi liis ndhi a nmhi muk mah khi dang phi Naan dhe nnih man phishi fhe dih. ¹⁴ Nphe ndhi khat a dang phi Naan nliis ndhi a man mah bhi riin fhin dang phi Naan,dang bhi en nih khat kyen mah. ¹⁵ Bhi a shin a mhe?A dang phi Naan khi riin man,bhi shin a dang phi Naan khi en nih.A mang tam khi riin nhi,yahal shin a mang tam khi en nhi. ¹⁶ Khat a sih mah dhe khat ghi shin wuret Naan khi riin wu nih,bhi phikhom khi shin a nang dhe lap nnah, ''A sih wai'' dih khat gu shin plang dhe khat nih man bih ndhi gun phi sat fhe man yeh? ¹⁷ Nphe ndhi gun phi shin plang a wuret wai dangbhi gwo sih khat kyen nbut fhe mah. ¹⁸ A plang Naan ndhi an phi sat bilip khi liis mwo bwer met ngun. ¹⁹ Dangbhi nlih Naan bhi wak a sat bilip khi sahar bilip mwo pahat ndhi a man dhe nnan a kam ngurum mwo met nsahar bilip dubu kun nliis ndhi a man mah. ²⁰ Emnihin nhi mwo,tap gu ndhe a khiphe jep sih mwo nbut leng fuk.Dang khat a nphe bih wu bis bhi gu dhe a khiphe jep sih.Dang bhi nbut leng fuk,bhi gu dhe a khiphe gurum ndhi mu mak mhi khasut. ²¹ Nbut waar bhi nih a wuran ndhi Naan sat nnah ''Khi liis mhizep yahal kin dhikhil mhizep bhi a sat bilip khi gurum sih mwo,bhi mu khi kiling an mah.'' ²² Nphe ndhi a sih,liis mu phi nin mhe bih mwo ndhi khi shin zehen mah,a nnyen ndhi man mu shin zehen gwe mah.Dang bilip ngu jakham nih phi mhe bih a nyen ndhi man mwo shin zehen mah,a nphe nyen ndhi mu khi shinzehen. ²³ Dang khat,nyen mwan nder Naan khiding mu ji shishak yahal mwo sat bilip a khi liis ndhi a mhi mwo mah yahal phikhoom khi nyen ndhi man mwo shinzehen mah mu ji nnaar mwo bhi mu khital mu nnah dhe kha nyen sih mu nkhaham wai ah? ²⁴ Dang khat gurum ndhi nih khi shinzehen mah kot a mhizep ji khat gun khiding phi sat bilip khiphe nyen jakham mwo sih bhi khi shin zehen nbih ndhi nih phi khiling.Mu khi tok dyel nnih khidhel bih ndhi kiling khiding. ²⁵ Bih ndhi nsok nbhizung muk put khi dhanah.Nphe ndhi a sih bhi khi paal yahal siip yit nih bhi dhik yil ndha Naan.Khi sat nnah Naan dih khinaar gu. ²⁶ A mhe dhe dih yeh emnihin nih mwo?Khat gu ji shishak,bhi gun khi plang,khi kam,gun khi bih ndhi gu nin,khi liis mwo shingu mak phe sat phi shi fhe nau/dau.Gu shin bih khiding ndhi khi dik nyen nwan nder Naan. ²⁷ Khat mhe gurum phi sat bilip khi liis ndhi a mhimuk mah,bhi yit dhe mwo kot kun khat dohol dhe gwo sih phi sat min yahal gurum dih ndhi khi sat phi shi fhe. ²⁸ Dhe khat gurum dih nphe sat phishi fhe mah bhi mwo ohot phidu nlih Naan fhe.Yit nmwo sat bilip sih a dhikhin bhizung du a wu khi mhe khi Naan. ²⁹ Yit nnyen jakham mu vil mahbhi kun mu sat bilip,yahal gohotshi mwo ling khom du mwo kiling ndyer bih ndhi mwo bhi sat. ³⁰ Dangbhi khat Naan nin mhe bih ngurum ndhi khi tong bih nih bhi ohot phi nih dang. ³¹ Nphe ndhi gun shi khimhe shi khimhe gu mak phe sat bilip a khiphe nyen jakham mu sih dhe ngun gu kam mhe bhi yahal gu khat kar. ³² Nphe ndhi riin nyen jakham mu a wuman nder nyen jakham mwo. ³³ Nphe ndhi Naan khi riyep bih mu mah,nih phi dem a tongshap. ³⁴ Shorop mwo tong shahat nlih Naan.Nphe ndhi mwo shin pong nmu nphe sat bilip mah.Nkop wu nih bih mwo sam khi kha du khiphe ndhi waar sat. ³⁵ Khat mu phi dem kam mhe bih bhi mwo taal phi daas fhut mwo khipang lih du.Nphe ndhi a bih khakul dhe nmat lap bilip nlih Naan dhi. ³⁶ Khan a gun gu ji khi bilip Naan mhi?Ji rhi a nder gu det mhi? ³⁷ Khat mhe gurum phi nah kha shin a ngu jakham,kot nih a khi riin oh,bhi ret dhe nnih man ndhi bih ndhi an phi ran ngun a waar ndhi mwo phi ji a nder Naan. ³⁸ Dang khat mhe gurum phi dem lap fhe yah mah bhi tap mwo khi kiling nih mah. ³⁹ Nphe ndhi a sih,emnihin nih mwo,khi rhihit nphe koos bih mu,tap gu ndin mhe gurum ndhi nih phi sat bilip khi liis ndhi a mhi muk mah. ⁴⁰ Dang bhi,yit dhe nmu shin jep bih mu a wuret yahal khi yar fhe.