¹ Mən təl jepgədə muup muop ndung sarkavəl hə mən pən pak maa afe gə war fuat gə məriip məwəng wubias gə war lat gok muop nau. ² Zak mən bən lep muop mə mwan gə la ɓəlep yil-longNaan, a nyi zak mə la ɓəlep ɓə wugok muop mə kat kagam. ³ Laa də muop yen gu yigil də mwan na nyi ɓə gu mang məbi məu, kwət a kam ras gə shang, gə nawe, gə shagal nau, gu mang me məu. Zak ɓə gu kok lee ɓyang vəl məu. ⁴ Ɗin gu rwə me mə lə ɓə gu tuagat a nnəgən mwan gu fuat. ⁵ Dip pəsəm muop ndung mə lap gun məu ɓə gu yigil də nyit fər nanyi ɓə gu bwap orong kwakgu dewar nyi ɗee a bii tuamshik yii. ⁶ Mən mə yigil mwan-mwan shi wang-shi wang muop fu laa ɓəlep Naan də gurum muop fu kat kagam shipe-shipe. ⁷ Miskagam Hiridus kələng bii muop fu chan nyi mən wel nyi ba dən, nsa pak gurum muop mə la yen a Yahaya wudok mə tə nyi hə yagal wa wul. ⁸ Pak gurum mə yen a Iliya bən bat nyin kaashik, də pak mə yen kwət a me nɗəgən jep wula ɓəlep Naan muop wudok mok hə yagal wa wul. ⁹ Mən Hiridus la yen, "Dok a gap kaa Yahaya gwe, a wudang shi ndung an fu kələng vap muup kə jepbii muop nhə eh?" Mən tangkop dewar na nyi. ¹⁰ Jeplep yesu mə wakwul mən la də muup kə bii ndung du chan hə. Mə mwan gə muop ɗagat mə wak me mə pee wu bii mə yong shi Betsaida. ¹¹ Mə naa kam mən tung gurum muop gwet mə mwan gədə muup. Mən kaat muop, mən la ɓəlep tong gəyil Naan də muop, mən wugok muop zak mv kagam nsar muup. ¹² Fuup ep mən muop wu sarkavəl mə wakja duk gə nyi mə yen, "Gə bwət gurum muop mə wak də wang muop dungkat muop dukduk hə, dewar muop mə tang sə yi nsa pe ndung hə gurum muop nnəgən məu. ¹³ Mən la yen, "Gun gu mwat sə muop", mən mə yen, "Bii wu mən gə nyi ma gə kagam nawe paat gə chirep vəl məu," ɓagal ɓə mə mwan mə seet sə də gurum muop nhə nau." ¹⁴ Gurum muop mə wak rwə gəbii 5,000 hə. Laa də jeplep a fee muop yen, "Gu laa də gurum muop mə tuagat shi tung shi tung. Tung nanyi ɗin kwət gurum yagurum vəl gə sar (50). ¹⁵ A kam mən gurum mə tuagat tuagat muop nau gəbii ndung nyi la hə. ¹⁶ Kok nawe paat gə cherep vəl nanyi mən ep kaa muup gətəng mən dəkyil pən nNaan mən tarap ɗəgən pən jeplep afe muop mə mwan mwət ngurum muop sə. ¹⁷ Gurum muop nau mə sə agal mak muop mən gogot dee nɗəgən tugushi sarshikavəl (12). ¹⁸ Pa memə ɓit mən nyi fu ɗang Naan nyi gəmee mvn jeplep afe muop mə ja də muup, mən nang fu muop yen, "Gurum bii mə yong an a shi mee?" ¹⁹ Mə lap yen, "Bii mə yong gə a Yahaya wupin Kən gə am, pak gurum mə yen gə a Iliya, pak mə yen a mee ɗəgən wa la ɓəlep Naan muop wudok mok wa wul." ²⁰ La gə muop yen, "De dun bi gu yong an a nag eh?" Bitru lap yen, "Kristi la Naan." ²¹ Mən biyal muop wagap na yong mə la bəlep də mə gurum muop nau. ²² Yesu la yen, "Den dok wagap La Gurum yong gə sua təgərchiin muop, daskagam wu ntagam muop, ndawang muop gə wu shee bitət muop yong gə mə kas nyi, gə mə tə nyi, nau kam ndəgən bit kun bə yagal." ²³ Mən la də muop nau, "Burum tang kop mwan gədə na bə nyi niang kaashik muup, nyi mang shep beel afe lang gədə nə. ²⁴ Gurum wu demkop chin kəgən kagam afe bə kat wən ndang. Gurum ndung kat kagam afe nsa an bə a nyi chin kəgən kagam afe. ²⁵ Gə kat gəyil nau mən tooklang wən gə bə gə kien a me nəgən eh? ²⁶ Gurum ndung kaa muup waat də la bəlep anə pən gurum muop, bə La Gurum zak gə kələng waat kaa də pən twamshik nkaa muup kat sam wul bit ma afe gə nung Nda gə məwəng Naan wuret muop. ²⁷ A la naduk gə gun pak gurum ndəgən mu ndung mə diamdok nhə gə muut ndəng she mə, maa pelong Long Naan məu." ²⁸ Dungkat la bəlep gə bii pokokun dat mən mang Bitrus, Yahaya gə Yakub mən mə ka ya Pang "dewar nyi dang Naan yi. ²⁹ Nyi ndəgən dang Naan mən shik muup bat, lee afee muop bat wa piya. Mə məlep. ³⁰ Mən gurum vəl, muop fu bəlep gənyi, Musa muop Iliya. ³¹ Muop nanyi mə jaa dəgən maa nung Nda muop fu la bəlep dempe a fe dung nyi gə war chin muop Urushalima ma hə. ³² Zak mən Bitrus muop mə dak nsaam, mə yigil naa Yesu dəgən maa afe, gə Musa, gə Iliya muop pegəmee gə nyi. ³³ Musa muop gə Iliya me yigil yok lat mən Bitrus la yen, "Wupin lə dong din mə tuagat hə. Mə lə muop kun, nde a nəmak, nde a nung Musa de a nung Iliya. Man bi ndung nyi fu la nhə məu. ³⁴ La kam mən ligin waji ogot muop mə pe kwə lugut yak muop. ³⁵ Memə dəgəl tong pət gənaar ligin nanyi kwət "Ndung hə a la nə ndung a dem nyi swet hə, Gu kələng dəgəl muup." ³⁶ Dangkong dəgəl nanyi mən nyit Yesu de meshik muup. pe lang kəlok. Gəshi nanyi mə la bii wu taa də memə gurum muop məu. ³⁷ Daar mə fat shi pang waksam mən gurum gwet mə ja də kaat nyi. ³⁸ Memə gwə ep dəgəl muup mə la yen "Miskagam, a dang gə na chigir lanə, nyi a wutəs lanə. ³⁹ Gə na bii bə damuam mə ka shi muup bə gap muut. Bii roop bəlep man pe ndung nyi nnəgən hə məu zak bə shishik muup damm, bə fu muup pang dəfil zak. Gok nanyi bi wel nyi yoon." ⁴⁰ A dang jepgədə gə muop mə fuat gə damuam nanyi mən met gə kagam muop. ⁴¹ Yesu la yen, "Gun gurum satnə ndung pən naduk a gu kat hə! Gu naa gu kat a tong nlat gə gun a naa gun yah? Wa ji gə lagə nanyi." ⁴² Nyi nji mən damuam nanyi chit nyi balbal, shishik muup bən damm, mən Yesu biyal ta bəlep mən damuam nyit lala nanyi, kat kagam mən mang nyi pən nda muup. ⁴³ Muop nau mə app fu muop nsa mə naa maa nung Naan. Ndung mə kutni fu bəlep kə bi wu Yesu chin hə, mən la də jep gə də muup yen, ⁴⁴ "Ləng kom gu dongdong gu kələng bi ndung a la də gu yi, muop də mang La Gurum pən nsa gurum muop." ⁴⁵ Mən jepgədə muup muop mə man bii ndung nyi la hə məu. Mə sok muop yong mə man, mə luagat də nang. ⁴⁶ Kakan rə gə kang jepgədə Yesu muop nkwət a wudang yong gə kwət a wuyoon ndəgən muop eh? ⁴⁷ Yesu man endiye a muop n'eskogop muup. ⁴⁸ Mə la gə muop yen, "Gurum ndung lap lala wule gəbii ndung ndəgən səm nə bə lap an. Gurum ndung lap an hə bə lap gurum wu lep an hə zak. Gwə ndung nyi kat nau ndəgən gu hə a nyi a wuyoon." ⁴⁹ Mən Yahaya lap la yen, "Wu pin lə, mə naa mə nhə nyi fu chen damwam muop ndəgən səm gə mə dən shi nsa nyi ndəgən mu məu." ⁵⁰ Yesu la yen "Gu dən shi muup məu, gwə ndung niyang mən məu bə a nə muun. ⁵¹ Gə shi wukat pe wa kəbətəng afe en warə hə mən en muup wuyoon wa ya Urushalima. ⁵² Mən lep jeplep muop mə mwan ya ntagam dəgən la mə fər Samariyawa muop dewar mə miap pee nnyi. ⁵³ Mən gurum pe nanyi muop mə lap nyi məu nsa gə mwaan a Urushalima. ⁵⁴ Jeplep afe, Yakubu muop gə John na kam mən mə nang fu muup ya? ⁵⁵ Mən Yesu bat biyal muop. ⁵⁶ Mən mə yigil wak də memə pe nde. ⁵⁷ Muop nmwan gəwar mən mə mədagwə la gə nyi yen, "A mwaan gədə nau pe ndung gu mwan nəgən hə." ⁵⁸ Yesu lap yong, "As laar muop gə fung a muop, yer gətəng muop gə pe-turəp a du mən La Gurum nyi gə pe den kaa muup məu." ⁵⁹ La də nde dagwə, "gə mwaan gə də nə." Mən dagwə na nyi lap yen, "Nda, nyit an a wa a wum nda nə ndang." ⁶⁰ Yesu la gə nyi yen, "Nyit dagat wu dədəm muop mə wam shak, de gə mwaan gə la bəlep wul yil-long Naan yi." ⁶¹ Nde zak la yen, "A mwaan gə də gu Nda, dagat a la yi də mat nə muop gə jepnə ndang." ⁶² Yesu lap yen, "Dagwə wu biang sar muup shi chaan mar mən na dangkong muup bə yong gə bwət tong pe yil-long Naan məu.