¹ Dangkong kam, Yesu gə jepgəgə muup muop sar ka vəl, mə mwanɗok nɗəgən tugun gə saryit wang nɓəl, muop fu la ɓəlepnaan gə la ɓəlep wushang kə Yil-long Naan. ² Surəp nɓəl dung Yesu lat gok a muop, muop fu mwan gəmee gə muop. Nɗəgən muop a Maryamu dung bi mə yong Magadaliya, dung pət gə sogot pogovəl nshik muup, ³ gə Yuwana mat Kuza wudər Hiridus, gə Suzanatu gə pak surəp nɓəl. Nɗəgən bii sar muop, mu mwət nmuop. ⁴ Memə ɓit mə təl kə gurum nɓəl, wa nsa gurum mə tuagat nɗəgən nɓəl fu jaa na Yesu. La ɓəlep gə muop nchiin. ⁵ Memə wukop, mwaan kop. Nyi nɗəgən kop kop mən pak chirem watɗək kəwar, mən gurum mə tangtang ka muop, layer muop mə ɗigin pak. ⁶ Pak zak mə wat kə pang pe ndung nyi gə yil məu. Mə fat lat məɓəm fiar, mən gəɗes mən mə fƒiya wa nsa mə kat bii wuzugum məu. ⁷ Pak chirem zak mə wat kə nikien muop, mə fat gəmee gə nikien, mən mə yak muop dung mu fiar məu. ⁸ Zak pak chirem mə wat kə yil wuret, mə fiar gəret, mə mwət jep gəret har yagurum sar." Dung Yesu la lat mən yong muop, "Gwə ndung nyi gə kom ɓə kələng." ⁹ Mən jepgədə Yesu mə nang fu muup nyi la əgəs ɓəlep a muup. ¹⁰ La yen gə muop "mə ɗem gun gə man pak wusəsok nung yil-long Naan. Zak gə gogot gurum bii wu a la ɓəlep a nkwaan, wa nsa ko ɗin mə na ɓə mə mankang məu." ¹¹ Bəlep-kwoomkaa na nyi fu nin a kam. Chirem a nyi a ɓəlep Naan. ¹² Chirem wu wat gə war a muop a gurum ndung mə kələng ɓəlepNaan mən ndangkong shaidan mang ɓəlep nəshak fu muop yong mə mwətnaduk də mə kat bar. ¹³ Mən chirem wu wat kə pang a muop a gurum dung muop fu kələng ɓəlepNaan ɓə mə lap gə tookpiya. Zak muop gə tugus məu, bi mə mwət naduk a nung pee til dat, mə kat təgərchiin ɓə mə pələp. ¹⁴ Chirem dung mə wat nɗəgən nikien, a muop a gƒurum dung mə kələng ɓəlepNaan, mwantagam dat mən mə nyit jepbii gəyil maa kaa muop gəbii biilong, gə kələngshang, mən sa mə ɓwət mwət jep wu mak bi məu. ¹⁵ Zak chirem dung mə wat kə yil wuret, a muop a gurum dung mə kələng ɓəlep, mə lap gə buzung muop gəmee, mə jaa ɗong-ɗong, mə mogor pe mwət jep. ¹⁶ Yong mə ep wus Tilngong, mən ogot shi yer ah, ko ɗen nbədə Gəɓin. Zak ɓə mə lang kə pəlang a muup də gurum dau wu rə gəpang ɓə kat npee saan. ¹⁷ Mbii nyi wusə-sok dung yong niang mə bwan dang məu, ko memə en dung ɗin niang mə ep. ¹⁸ Gu mwan lele kə bii ndung gun fu kələng, wa nsa wu pin bi ɓə mə mwət nde nyi, gwə wu bi wən ɓə lap nsar muup." ¹⁹ Mən nnəgən Yesu gə məjepeməgən muup muop mə ja də muup, mə ɓwət fu ja duk gə nyi məu wa nsa gurum. ²⁰ Mən məgwə la də muup, "Nəgən gə, gə mə jepemnang mə ɗyamɗok gəɓang, mə tangkop naa gə." ²¹ Zak Yesu lap fu muup, "Nəgən nə gə məjepemna a muop ndung fu kələng ɓəlepNaan chin ɓəlang gə nyi." ²² Memə ɓit Yesu rə chii'am, nyi gə jepgədər muup, la də muop "A tangkop ɗin mə taa mə kaa fu nde liss nhə." Mən mə mwan də tăka. ²³ Zak ding muop nmwan mən saam mang Yesu, mən memə kogom wu ɓal wul kə lis nəshak, mən chii gam gə am muop zak də pal. ²⁴ Mən jepgədə Yesu mə jaa mii nyi nsaam. Mə laa gə nyi, "Miskagam! Miskagam! Mən də ɗwam!" Mən yagal la ɓəlep gə kogom mən ɗar gə difil am. ²⁵ A nyi mən la də muop "Ɗee mwət naduk a gwe? Lugut yak muop mə sə mamaki gə wu taa hə. Mə laa də shik muop, "A wuɗang shi nhə dung laa ɓəlep gə kogom gə am mən mə kələng nyi eh?" ²⁶ Mə jaa saryil Garasinawa, dung nyi duk gə Galili. ²⁷ Dung Yesu sam n'yil, memə məgwə kat nyi. Dagwə nhə nyi gə sogotmuop. Dagwə na nyi nook ruwan twən nsəng, bi tuagat gəpang məu. Bi tongɗok a kə gəcher. ²⁸ Ndung naa Yesu, buwap gəwagar, dugum ntagam muup gə ɗəgəl wuyoon yen, "A chin a meh gəgə eh, Yesu Lanaan wumaa? An fu ɗang gə yong gə mwət təgərchiin n'an!" ²⁹ Yesu la də sogot mə fat nshikmuup, shak sogot nəshak mə yak nɓəl. Ko mə buagat nyi shi teng bə gap. Məriip wubis bii mə chenni mwan ngəgər. ³⁰ Mən Yesu nag fu muup, "A mee a səm gə eh?" Mən lap yen "Səm nə a mən ɓəl" La yen a kam wa nsa sogot nɓəl mə rwə shi dagwə nəshak. ³¹ Sogot nəshak mə dung Yesu yong ba nyi nkon muop nɗəgən fung wu səsəng. ³² Muop fu lap tap Lade dəduk gə muop. Sogot nəshak mə dung Yesu də nyi nyit muop, mə rwə shik Lade muop, nyi zak ɗem gə muop. ³³ Sogot muop nəshak mə nyit dagwə nəshak mə rwə shi Lade muop, mən Lade muop mə suwo pələp nɗəgən kong, mə ɗwam nnəgən. ³⁴ Gurum ndung muop fu tap Lade wu taa mən mə swə! Mə mwan la gə gurum nɗəgən tugun kə bii wu taa gə pee wu duk gə muop. ³⁵ Wa nsa kam, gurum dung mə kələng, mə yigil jaa də naa bii wu taa hə, mə mwan npee dung Yesu nyi nnəgən hə, mə naa gwə dung sogot mə fat shik muup. Mə kat ɗar ɗok gə lee nshik muup, mə kat nyi nɗəgən endiye wuret, mən lugut yak muop. ³⁶ Gurum dung mə naa bii wu taa hə mə laa də pak gurum muop, kə mə lat gok dagwə nəshak ndung dok nyi gə sogot muop. ³⁷ Mən gurum saryil Garasinawa gə wu duk gə muop mə ɗang Yesu də nyi nyit saryit yil a muop wa nsa lugut yak muop shi naduk. Nnəgən Yesu gə jepgədə muup mə rwə chii'am mə yok. ³⁸ Dagwə dung sogot mə fat shik muup ɗang Yesu yen, "Gə nook an a mwaan gəmee gə gə", Yesu nook nyi nnəgən yen, ³⁹ "Wa gə laa də məgurum agə jepbii wu gə naa ndung Naan chin də gə." Nnəgən mən dagwə na nyi wa nyi fu la də gurum dəgən dip, bii dung Yesu chin də muup. ⁴⁰ Dung Yesu wawul hə, gurum mə kat nyi, nsa muop dip fu kang nyi. ⁴¹ Mən ga memə gwə dung səm muup a Yayirus, gəmee nɗəgən mənan Ləwap, ji duk gə Yesu, gəm ka nyil. Ɗangƒ nyi də nyi nwul lə muup, ⁴² Wa nsa reep muup dung nyi gə yii sarshika-vəl nyi də muut, a nyi a wutəs lareep muup. Zak mən wa nsa nyi fu mwan, gam gurum muop fu tugun nyi. ⁴³ Memə mat nyi nəgən dung nyi təgəm fu sə nyi də yii sarshikavəl. Tə shagal a muup nau fu wudak muop, də mə lat gok a muup, mən memə gwə bwət lat gok a muup məu. ⁴⁴ Bat gədə Yesu bəm Təgoo afee. Nnəgən dat mən təgəm a muup lang. ⁴⁵ Yesu yen "A wudang ɓəm'an eh?" Dung muop gəmee gə nyi mə yen a dun məu, Bitrus la yen. "Miskagam, gurum məɓəl muop fu duk gə." ⁴⁶ Zak Yesu la yen, "A man, məgwə ɓəm an, nsa maa pət nɗəgən nə." ⁴⁷ Dung namat nəshak man gə di bwət də sok məu, mən wul də muup nlugut. Dugum ntagam Yesu la ntagam gurum muop dip bii ndung sa di ɓəm shik Yesu, mən nnəgən dat gok a muup lat. ⁴⁸ Mən la də namat nəshak "Lareep, mwətnaduk a yii latgok a yii. Wa mbi yii!" ⁴⁹ Nyi nɗəgən ɓəlep dat, mən meməgwə nlə miskagam Ləwap wul, la yen, "Reep gə muut gwe, weel məu miskagam." ⁵⁰ Dung Yesu kələng kam, mən la də muup yong nyi nlugut, mwətnaduk ɓə reep gə yong gə bar" ⁵¹ Dung wul lə muup, nook gurum mə rwə gəmee gə nyi məu de a Bitrus gə Yahaya gə Yakubu gə nəgən lareep gə nda muup. ⁵² Gurum nnəgən muop fu eer nsa mə wel gə lareep wu muut hə. Zak Yesu la gə muop "Gu nook eer! Nyi muut məu, nyi a fu saam!" ⁵³ Gurum mə swar kaa muup fu zhal nyi, nsa mə man lareep muut gwe. ⁵⁴ Mən yaa sar muup yong nyi yen "Lareep yi yagal." ⁵⁵ Gədes hə mən məriip a muup rə nshik muup mən yagal. La də muop, gu mwət sə nyi sə. ⁵⁶ Wumiya fe muop, mə sə mamaki, zak Yesu la dv muop na yong mə la də məgwə kə bii ndung taa hə.