¹ Mən Yesu, gam gə məriip wuret, wawul nkong Urdun, mən məriip wuret mwaan gənyi ngəgər. ² Bit yagurum vəl, shaidan nyi fu kam nyi. Nbitmuop nəshak Yesu yaa sənfu ji, ɓəlak ya nyi ndangkong ɓit muop nəshak. ³ Shaidan laa də muup, "In gə kwət a la Naan wagap, ɓə gə laa də pang nhə dewar wa nawe ngə gə kat gə sə yi." ⁴ Yesu lap yen, "Mə yil, gurum bii bar a shi nawe dat məu." ⁵ Mən shaidan mwaan gənyi nmemə pang wufyer, mən niin long gəyil dip nyi. ⁶ Shaidan la də muup, "Yong a mwət maa ngə kə jep bii muop nhə dip, gə maa a muop dip. Yong a chin kam wa nsa mə mwət muop dip n'an ɗee maa ka muop. A bwət də a mwət duk ngwə dung took nə dem. ⁷ Wa nsa kam, in gə dugum gə furəm gə, gə wap an, ɓə a mwət ngə dip. ⁸ Mən Yesu lap fu muup yen, "A wuyiyil gwe, "Gə wap a Naan a gə dat gəme, a nyi dat gə saam nyi." ⁹ Mən shaidan mwaan gə Yesu n'Urushalima, ɗar gə nyi ngəsung lənaan, mən la də muup, "In gə kwət a Lanaan ɓə gə paar gə pal n'yil. ¹⁰ Wa nsa mə yil, 'Yong gə mwət ɓəlep nməwəng a muup də mə ya gə,' ¹¹ Yong mə mang gə gətəng gə sar muop yang ba nas kwak gə shi pang." ¹² Yesu nɗəgən lap fu muup yen, "Mə yen, Gə kam Miskagam Naan məu." ¹³ Ndung shaidan lat kam Yesu mən nyit nyi də nde ɓit. ¹⁴ Yesu wa də Galili ngam gə maa nung məriip, ɓəlep gə fuu muup yaltak nsa yit yil pee nəshak. ¹⁵ She bishe nlənaan, mən gurum dau mə saam nyi. ¹⁶ Me mə ɓit wul n'Nazaret, nɗəgən tugun wu nyi makbi nnəgən hə. Gəbi dung chin hə, rə Ləwap paa ɓitnyak, mən yagal də naa naabil (bii-ran). ¹⁷ Mə mwət naabil Ishaya, ep mən na pee dung mə yil, ¹⁸ "Məriip Naan nyi nka nə, nsa sugup an də a laa ɓəlepnaan gə wupiya muop. Lep an də a shakɓəlep katpe gə gurum dung mə diyan muop, gə apyit wuvagam muop, gə fat gə muop dung muop nɗəgən təgəchiin, ¹⁹ gə laa ɓəlep yii mwaan chindong Naan." ²⁰ Mən ogot naabil, mwət nwupian ɓəlang lənaan, mən mwaan gə tong. Dip gurum dung muop ləwap mə ap yit muop fu na nyi. ²¹ Mən ɓəm ɓəlep gə muop, "Chini ɓəlep naabil gam nkomgu." ²² Dip gurum dung muop nnəgən mə kələng, lugut yak muop gə ɓəlep dung fu fat nfu muup hə. Muop fu yen, "Dunghə a laa Yusufu moo, ko a kam moo?" ²³ Yesu la də muop, "Yong gu laa ɓəlep hə də nə, 'Wudak, bə gə lat gok kəsak. Dip jep bii dung mv kələng gə chan n'Kafarnahum, ɓə gə chin zak lə gə." ²⁴ Bən la yen, "An fu laa də gu, lalepnaan bi kat səm nləmuup məu." ²⁵ fu laa gə gun, gun gə surəp kaa nɓəl gənaar nyil Israila dokshi Iliya, shi ndung mə ogot gəbətəng də yii kun gə gogot mə lai fan məu, yii dung mə chin gəzəm dibit nyil Israila ²⁶ mə lep Iliya də me muop məu, mə lep a də matka ndung nyi nɗəgən Zarifat n'Sidon ²⁷ Wutəlogom muop nɓəl n'Israila nzamani Elisha, mən mə lat gok me muop məu, mə lat a gok Na'aman meməgwə Suriya. ²⁸ Difil mang muop dip dung muop nnəgən nləwap wa nsa bii dung mə kələng kwan ɗək. ²⁹ Mə yigil tugun nyi gəbang ɗəgən tugun, mə mwaan gə nyi fu pang dung mə ɗik ɗəgən tugun aka də mə zwam nyi. ³⁰ Mən bat gənaar muop mwaan tagam. ³¹ Mən mwaan Kafarnahum, memə yil n'Galili. Mem bit wapnaan nifu shee gurum muop nlənaan. ³² Lugut yak muop gə bishee a muup wa nsa ɓəlep afee nyi gə kamshik. ³³ Meməgwə nyi nləwap ndung nyi gə məriip wubis, ep ɗəgəl wuyoon, ³⁴ Ah! A mee weel mən gə gə eh, Yesu la Nazarat? Gə wul a də gə mwət təgərchiin nmən ah? A man gə! A gə wuret nung Naan!" ³⁵ Yesu laa ɓəlep gə məriip wubis na nyi yen, "Ɗokkit, pət nɗəgən muup!" Mən məriip wubit nyit dagwə nəshak gənaar muop, pət nɗəgən muup mwət gok nyi məu. ³⁶ Dibit gurum mə sə mamaki, muop fu la ɓəlep kə bii dung taah gənaar muop. Mə yen, "A wame ɓəlep kam eh? La ɓəlep gə məriip wubis mən mə fat." ³⁷ Wa nsa kam, mə laa ɓəlep a muup sar yityil dibit. ³⁸ Mən Yesu nyit ləwap rə lə iman. Mən kat səgər Siman teer ɗok gə Lapiep, mən mə ɗang nyi də muup. ³⁹ Mən dar kaamuup, laa ɓəlep gə Lapiep, mən Lapiep nook nyi mən yagal ɓəm ɓəlang də muup. ⁴⁰ Dung fuus taa, gurum mə jaa gə wugok muop nnyi. Lang sar nka muop mən lat gok muop. ⁴¹ Damwam wubiyas muop mə fat npakmuop mə eer, "A gə a la Naan!" Yesu la ɓəlep gə muop, mən dən muop gə ɓəlep, saa mə man anyi a Almasihu. ⁴² Tarmangbit, mwaan memə pee dung a nyi dat. Gurum nɓəl muop fu tang nyi. Mə jaa npee dung jetbii nyi nnəgən. Mə chin də dən waa shi muup. ⁴³ Mən laa də muop, "A tiit a laa ɓɓ‌ḅlepnaan npak məpee muop nɓəl, wa nsa a nyi a bii dung mə lep an akwat. ⁴⁴ Mən yakə la ɓəlpnaan a ləwap dibit saryil Yahudiya.