¹ Dok me mǝ ɓit mǝn Yesu nyi fu ɗang Naan nme mǝpe mǝn me lagǝdǝr muup laa gǝnyi yen, "Miskagam, shee men ge ɗang Naan kabi wu Yahaya shee jepgǝdǝr muup hǝh." ² Yesu laa gǝ muop yen, "Ɗǝ gu yigil dǝr ɗang Naan ɓǝ gu yen, "Ndaa, mang sǝm gǝ waa wusǝsaar. Mang yil-long gǝgǝ wul. ³ Pǝn sǝ nung shiɓit-shiɓit nmǝn. ⁴ Vang wubyas amu kabi wu mǝn mǝ vang nung gurum wu mǝ chan wubyas nmen heh. Gǝ nyit mǝn mǝ ruo nɗǝgǝn kamshii mou.'" ⁵ Yesu laa gǝ muop yen, "A wudang nɗǝgǝn gu nkwǝt gǝ wushaar mǝn nwul dǝr muup npechagat mǝn nyen 'shaar nǝ pǝn ɗang ɓǝgil naweh kun n-an ⁶ nsa me wushaar nǝ lemwar gǝɗet hǝh mǝn an gǝ mǝbi dǝr pǝn nyi mou.' ⁷ Bǝ nyi wu nɗǝgǝn lǝ lap yen, Gǝ weel an mou. A ogot fulǝ gwe, mǝn gǝ jepnǝ mǝ yak pǝturǝp gwe. A ɓoot npǝ yagal pǝn naweh ngǝ mou.' ⁸ A laa gǝgun, ɗagat nǝ nyagal nmwǝn naweh ngǝ nsa gǝ a shaar muup mou mǝn gǝ nyit kaawaat mǝn gǝ weel nyi veet bǝ gǝ yagal npǝn biling naweh gwet wu gǝ ɗemkop hǝh. ⁹ An zak fu laa, gǝ nang ɓǝ gǝ mǝ mwǝn gun; gu tang ɓǝ gu kat, gu kwak fulǝ ɓǝ gǝ mǝ ep ngun. ¹⁰ Nsa gurum wu nɗang ɓǝ mǝ mwǝn nyi; gurum wu ntang ɓǝ gǝ kat; gurum wu kwak fulǝ ɓǝ gǝ mǝ ep nnyi. ¹¹ A nda mǝnang nɗǝgǝn gu laa muup nnang cherep fumuup bǝ mwǝn woo nnyi? ¹² Mǝn n-nang aas koo bǝ mwǝn dagar nnyi? ¹³ Ɗǝ gun gurum wu chan wuyas man pǝ pǝn bii wuret njep gu ɓǝ ɗe Nda fu wu fugǝtǝng gǝ pǝn Mǝrip Wuret nmuop wu mǝ ɗang mou a?" ¹⁴ Lat mǝn Yesu fu chen damwam fuɓǝm. Damwam nanyi pǝt dat mǝn dagwu wudok fu muup ɓǝm hǝh epfu laa lǝfu mǝn gurum wu kǝrgǝi mǝ kat a bi-ɗyeer. ¹⁵ Men pak gurum mǝ yen, "Nyi fu chen damwam a shi Belzubul, long damwam muop." ¹⁶ Pak muop mǝ katshii muup, mǝ tang mǝbi ɗyeer fugǝtǝn dǝr muup. ¹⁷ Yesu man enɗyee gǝmuop mǝn laa gǝ muop yen, "Yil-long wu gapɗǝgǝn shik nsa jaghar ɓǝh gǝ lat baan, gǝlǝ wu gapɗǝgǝn shik gǝ kwal ɓǝh gǝ pǝtkaa mou. ¹⁸ Ɗəh Shetan ngapɓəgən shik bǝ chin a shime yil-long gəfe nrəgət yi? Gu yong an a chen damwam a shi Belzebul. ¹⁹ Dǝ a chen damwam a shi Belzebul ɓəh dee gurum gǝdǝr gu mə chen muop a shi me? A ɓələp nang gənə həh gə waa wusheep gun. ²⁰ Dǝ a chen damwam a shi sar Naan, ɓǝ yil-long Naan waa kat gun. ²¹ Ɗǝ megwu wuɓal gǝ lee lek nkang gǝ lǝ gǝnyi ɓǝ lee afe gǝ lǝn mou, ²² ɗǝh mǝgwu wu ɓal ma nyi nrǝ kaa muup ɓǝh ɗuan lee lek mǝn kok biilong gǝfe. ²³ Məgwu wu gə lap gədər nə mou ɓəh nyi a wu nyang an; məgwu wu təp an waghar lə gǝshak mou ɓəh nyi a fu ber. ²⁴ Ɗǝ damwam npǝt nɗǝgǝn mǝgwu ɓǝh mwaan gǝ tang pee wufii ɗǝ nyak yi. Ɗǝ nkat mǝ mou ɓǝ yen, 'A waa a yaa lǝnǝ wudok a tong a pǝt nnǝgǝn hǝ.' ²⁵ Waaji kat mǝ nkum pee nanyi mǝn mǝ nmyap nyi kweet. ²⁶ Men mwaan gǝ kok nde damwam pogovǝl wubis ma nyi, wakjya mǝ tugat muop nau nnǝgǝn. Ɓǝ dagwu nanyi gǝ yer nma wudok pel hǝh." ²⁷ Nyi fu laa dat kam mǝn me namat ep ɗǝgǝl ɗǝ gǝnaar gurum wukǝrgǝi yen, "Ɓǝt namat wu laa gǝ ge yughur muup wu gǝ sua hǝ a sǝsaar." ²⁸ Mǝn Yesu lap yen, "Gurum wu mǝ kǝlǝng ɓǝlǝp Naan mǝn mǝ lap ɗem hǝ, a muop a wuǝsaar." ²⁹ Gurum wukǝrgǝi mǝ taa fu kaam mǝn Yesu laa yen, "Seen gurum muop nhǝ a seen wubis. Nyi fu tang bi-nyin, gǝ bi-nyin wu ma nung Jona mou. ³⁰ Kabi wudok Jona waa bi-nyin ngurum Nineva muop hǝh, a kam shizak La Gurum gǝ waa bi-nyin n-seen nhǝ. ³¹ Mat-long gǝsar gan-wang par gǝ yagal par ɓit sheep mǝn nvak gǝ seen gurum wu gǝɗet hǝ nsa dok tong gǝpe wusǝng ji kǝlǝng soon Sulemanu yi, megwu wu ma Sulemanu nyi npeen. ³² Gurum Nineva par gǝ mǝ yigil par ɓit sheep mǝn mǝ nvak gǝ seen gurum wu gǝɗet hǝ, nsa dok mǝ bat nyit wubyas amuop shi wu Jona shakɓǝlǝp Naan nmuop hǝ, mǝgwu wu ma Jona nyi npeen. ³³ Mǝgwu gǝ ɓil pitila ɓǝ sok ɗagat ɓǝ ɗen ntugushi mou, bii ɗen a gǝdangsaan ɗe war nyi saanpe yi. Yit gu a wus wusaan shik. ³⁴ Ɗyin yit gu a wuret ɓǝ shik gu saan. Ɗǝ yit gu nkot a wuret mou ɓǝ shishik gu nyi nkwoo. ³⁵ A waa nnyi, gu kang yi ba pee wusaan gǝgu nwaa kwoo. ³⁶ Dǝ shishik gu dau nkot a sǝsaan, gan mǝpe nyi nkwoo mou, ɓǝ shishik gu nau gǝ saan kabi pitila bii saanpe ngun hǝ. ³⁷ Laa ɓǝlǝp lat mǝn me mǝgwu Farisiyawa dwam nyi gǝ sǝ lǝ muup, mǝn Yesu mwaan gǝ tong. ³⁸ Ɓǝlǝp rǝng dagwu Farisiyawa nanyi nsa kat Yesu vang sar mou mǝn ta a fu sǝ dat. ³⁹ Mǝn Yesu laa gǝnyi yen, "Gun Farisiyawa bii gu vang dangkong jang gǝ dangkong ɗa sǝ mǝn gu nyit ɗak, gǝ jepe wubis nnǝgǝn. ⁴⁰ Soon wǝn ngun. Dagwu wu chin dangkong hǝ a nyi chin ɗǝgǝn mou a? ⁴¹ Gu pǝn bii wu nɗǝgǝn hǝ ngurum wupya muop bǝ gogt jepe dip wubǝɓang dat dǝr gu. ⁴² Lat nkaa gu Farisiyawa, nsa bii gu lapkaa sǝ gǝ nung jeptǝng mou nau mǝn gu kon naduk gǝ ɗempe Naan. Ɗong ɗyin gu chan muop dip, mǝn gǝ chin naduk gǝ ɗem Naan a lengwaar. ⁴³ Lat nkaa gu Farisiyawa muop nsa gu ɗemkop tugat ntagam nnɗǝgǝn lǝwap mǝn gu ɗemkop gurum mǝ nang gun gǝlǝtuk. ⁴⁴ Lat nkaa gu, nsa gun a kabi gǝcher wu gurum mǝ naa mou mǝn mǝ mwaan-mwaan gǝkaa nsa nǝ mǝ nman hǝ." ⁴⁵ Me mǝgwu wupin shee bi-tǝt nang fu muup yen, "Wusheepe, gǝ laa kam ɓǝ gǝ dam took mu zak." ⁴⁶ Yesu la yen, "Lat nkaa gu, wupin shee bi-tǝt. Nsa bii gu pǝn lee wutegen ngurum ɗǝ gun bii gu ɓǝm wa shi raapsar gu mou. ⁴⁷ Lat nkaa gu nsa gu ɗyak gǝcher jeplepnaan wu nakǝǝ gu mǝ tuo muop. ⁴⁸ Wawu gu ɗem mǝn gu lapgǝdǝr ɓǝlang nakǝǝ gu, nsa muop mǝ tuo mǝn gun gu ɗyak gǝcher. ⁴⁹ A waa nnyi Soon Naan yen, 'Gǝ a lep gǝ jeplepnaan, mǝn gǝ mǝ tuo twang muop mǝn mǝ ntuo pak muop.' ⁵⁰ Seen gurum wu gǝɗet hǝ paa gǝ mǝ nang kop tǝgǝm jeplepnaan wu sǝm-bǝdok gǝ tuo muop yi fu gu, ⁵¹ shee shi nung Habila gǝ nung Zakariya wudok mǝ te nyi gǝkang rǝk gǝ pee-wuwaar hǝ. A laa gǝgun, par gǝ mǝ nang kop muop fu seen gurum wu gǝɗet hǝ. ⁵² Lat nkaa gu mǝsheepe gǝ bi-tǝt Yahudawa nsa gu sok bii ep fulǝ biiman; gun gu ruo mou mǝn gu dǝn ruo shi gurum wu mǝ tangkop hǝ. ⁵³ Yesu yagal nyit pee nayi mǝn yilpee muop gǝ Farisiyawa mǝ ɓagal nyi gǝkaa jepe gwet, ⁵⁴ ɗe war mǝ yaa nyi yi nɗǝgǝn ɓǝlǝp gǝfe.