¹ Muop shifu dat kam mǝn gurum mǝ wul gǝr mǝn mǝ ɓǝl ba mǝ byak gǝshi shak, lat mǝn Yesu laa gǝ jepgǝdǝr muop ɗǝng pel yen, "Gu kang suk gǝ yisti Farisiyawa wu a mwǝng hǝ. ² Nsa mǝbi kwǝt a wu kaaɓǝm nǝ gǝ mǝ epkaa mou, mǝbi kot gǝsok wu nǝ gǝ mǝ nman mou. ³ A waa nnyi mǝbi wu gu laa nkwoo ɓǝ gǝ kǝlǝng gǝtal, bi wu gu laa nchiin nɗǝgǝn lǝ ɓǝ gǝ mǝ shak nyi gǝɓang. ⁴ A laa gǝgun shaar nǝ muop, gu yigil lugut gurum wu gǝ tǝ a dǝng shishik dat nlat ɓǝ muop gǝ bii chin zak mou. ⁵ Gǝ a laa gurum wu gǝ yagal lugut muup. Gu yigil lugut dagwu wu ɗǝ ntǝ dǝng shishik nlat ɓǝ tak nlǝwus. A laa gǝgun, gu yigil a lugut gurum nanyi. ⁶ Bii gǝ mǝ sarap gǝ jep yer paat a kobo vǝl mo? Mǝn muop gǝme lan Naan mou. ⁷ Naan kun suop kaa gu nau. Gu yigil lugut mou. Gu wuret ma jep yer gwet. ⁸ A laa gǝugn, mǝgwu wu laa bǝlǝp wuret kaa nǝ ntagam gurum be Laa Gurum ge laa wuret kaamuup ntagam mǝwong Naan muop; ⁹ mǝgwu wu chii yong ji man an mou ntagam gurum ɓǝ an zak gǝ a chin a kam ntagam mǝwong Naan muop. ¹⁰ Mǝgwu nlaa ɓǝlǝp wubaan kaa Laa Gurum ɓǝ gǝ mǝ vang wubis gǝfe, dǝ mǝgwu wu laa ɓǝlǝp wubaan kaa Mǝrip Wuret ɓǝ gǝ mǝ vang wubis gǝfe mou. ¹¹ Mǝ nmwaan gǝgun ntagam lǝwap, gǝ mǝnan gǝ mǝ kamshik ɓǝ gu weel kǝ bi wu gu laa gǝ bi wu guu pǝn kaasuk gǝ nyi mou, ¹² nsa shide ɓǝ Mǝrip Wuret shee gun gǝ bi wu laa hǝ. ¹³ Mǝn me mǝgwu nɗǝgǝn gurum wu kǝrgǝi la gǝnyi yen. "Wusheepe, laa gǝ emnǝgǝnnǝ shap biilong gǝ kop gǝ an." ¹⁴ Yesu lap yen, "Dagwuo, a ɗa ɗen an a wusheep gǝ gurum gekang kaa gu yi?" ¹⁵ Mǝn yen, "Gu lǝng en gu nya, yi ba dem-gǝshik nma kaa gu, nsa gurum gǝ kat nooklang a shi biilong geyil wugwet mou." ¹⁶ Lat mǝn Yesu laa me ɓǝlǝp-kwoomkaa gǝ muop yen, "Me dagwu wu lǝlong kat sǝ gwet nmar afe, ¹⁷ mǝn laa gǝ shik muop yen, 'Ɗǝ gǝ a chin a na, an gǝ pee pǝ chinkǝn sǝ gǝnǝ mou?' ¹⁸ Mǝn yen, "A man bii wu gǝ a chin hǝ. Gǝ a sharap mee gǝnǝ wudyen mǝn a ɗyak wunan, bǝ a chinkǝn ǝksǝ gǝ gogot lee gǝnǝ nnǝgǝn. ¹⁹ Lat ɓǝ a laa gǝ san a yen, "Dagwu, sǝ nyi gwet nmee npe yii nɓǝl. Nyak sak, sǝ, swa , gǝ man shang yi.'" ²⁰ Mǝn Naan la gǝ nyi yen, "Gǝ a wuyoghor, yi gǝ mǝ mang nook gǝ nlǝpar nhǝ, de biilong nanyi gekot a nung wudang ee?' ²¹ Mǝgwu wu chinkǝn biilong dǝr kaashik dat men nyi a lǝlong ntagam Naan mou ɓǝ nyi a kam." ²² Yesu laa ge jepgǝdǝr muup, yen, A waa nnyi a laa yi gǝgun, gu weel gǝ bii-gǝyil mou - bii wu gu sǝ gǝ shishik gu - lee ɓyang nshik. ²³ Nsa nooklang a wu ma sǝ, suopsuk a wu ma lee ɓyang. ²⁴ Gu naa shi dagaghap muop, bii gǝ mǝ kop sǝ ɗǝ mǝ ɗyip yi mou. Muop gǝ mee gǝ par mou, mǝn Naan bii sǝ gǝ muop. Gun a wu ma ɓǝl! ²⁵ Ɗe a wuɗang nweel ɓǝ del ɓit muut gǝfe yi? ²⁶ Ɗǝ gu ɓoot fu chin bii wu chom nanyi mou ɓǝ gu weel gǝ gǝshang a npe me? ²⁷ Gu pel pǝ fyar wung muop. Gǝ mǝ cin ɓǝlang ɗǝ mǝ bat shak yimou. Mǝn a laa gǝgun, Sulemanu ɓyang byaat wuret kabi pel gǝmuop mou. ²⁸ Ɗǝ Naan nruan lee wuret nwung wu bii nyi chinyi ɓǝ ɗaar fii mǝn ɗǝ ɓyal wus gǝ nyi dat, ɓǝ chin a nang npǝn lee ngun mou yi? Pǝn naduk agu kat! ²⁹ Na yong gu weel kaa bii wu gu sǝ ge bii wu gu sua mou. ³⁰ Gurum gǝyil dau muop fu tang jepe nanyi, Nda gu man nkwǝt gu tangkop. ³¹ Gu tang a yil-long gǝfe ɓǝ Naan pǝn gogot jepe muop nhǝ nau ngun. ³² Gu yigil lugut mou nsa Nda gu ɗempkop mwǝn yil-long nanyi ngun. ³³ Gu sarap gǝ biilong a gu mǝn gu shen wu pya muop. Gu chin bang-shagal wu nǝ gǝ ndam, gu dǝk biilong gǝgu fugǝtǝng gǝpe wudung gǝ lat-lat mou hǝ, a nǝgǝn bǝ wat gǝ wul duk gǝ nyi mou mǝn dǝgǝrǝp gǝ aar mou hǝ. ³⁴ Nsa pee wu biilong age nnǝgǝn ɓǝ en gǝ gǝkot a nnǝgǝn. ³⁵ Gu ̵ɗyan teng ɓuǝn gu ɓal-ɓal, mǝn gu nyit pitila agu fu lap, ³⁶ mǝn gu tugat kabi muop wu fu kang miskagam gǝmuop ntong nwawul gǝpe gya mat, dǝ waaji nkwak fulǝ ɓǝ mǝ ep nnyi bǝr. ³⁷ Ɗǝ wupin lǝ waaji nkat muop nmeen ɓǝ muop a kumsal. A laa naduk gǝgun, gǝ ɓugat ɓuen muup, mǝn laa gǝ muop mǝ tugat npe sǝ, ɓǝ ji mwǝn sǝ nmuop. ³⁸ Ɗǝ wupin lǝ nanyi nwaawul kot a lǝpar oh, kot a kangǝɓit oh, mǝn nkat muop nmeen ɓǝ muop a wu kumsal. ³⁹ Gu man nkwǝt ɗǝ wupin lǝ nman shii wu wat gǝ wul ɓǝ nyit nyi rǝ nlǝ gǝfe mou. ⁴⁰ Gu tugat gǝ en gu nsa gu man shii wu Laa Gurum gǝ wul mou." ⁴¹ Bitrus yen, "Miskagam, gǝ fu laa ɓǝlǝp-kwoomkaa nhǝ a gǝ mǝn dat a gǝ gurum dip dat yi?" ⁴² Yesu laa yen, "A wuɓa a laatong wu naduk gǝ soon wu ɗǝ wupin lǝ afe mwǝn sǝ ɗe war nyi mwǝn yi ngogot jeptugat? ⁴³ Ɗǝ wupin lǝ gǝfe nwaawul mǝn nkat nyi fu chin kam ɓǝ nyi a kumsal. ⁴⁴ A laa gǝgun, gǝ ɗen nyi nkaa biilong gǝfe dau. ⁴⁵ Ɗǝ laatong nanyi nlaa gǝshik muup nyen, 'Wupin lǝ genǝ ya shi muup dogol' mǝn ntaa fu nas mǝnyee muup daas gǝ surǝp, mǝn nsǝ mǝn nsua ba muǝs ntǝ nyi, ⁴⁶ ɓǝ wupin lǝ gǝfe gǝ waa nwul nɓit wu nyi ɗen en gǝkaa mou hǝ, gǝ shii wu nyi man mou hǝ ɓǝ waaji tǝɗǝgǝn muup mǝn pǝs nde mǝgwu chin naduk nkop muop. ⁴⁷ Kurum wu man bii wu wupin lǝ gǝfe tangkop mǝn nyang chin ɓǝ gǝ lap nas gwet. ⁴⁸ Wudung man bii wu wupin lǝ gǝfe gǝtangkop mou mǝn chin wubis ɓǝ gǝ lap nas lee. Mǝgwu wu lap mǝbi gwet ɓǝ gǝ mǝ tangkop bii gwet fu muup, megwu wu mǝ nyit bii gwet gǝsar muup ɓǝ gǝ ɗemkop bii zak gwet fu muup. ⁴⁹ A wul a npe ɗǝk wus gǝyil, a chaa mang ɗyin nkot fu lap gwe. ⁵⁰ An gǝ kénpe wu gu me kén an gǝnyi, mǝn took nǝ dam badǝn ɗe a nyi par gǝ lat dat! ⁵¹ Gu nkwǝt a wul a tugat chagap gǝyil a? Hayǝu, a laa gǝgun, a wul a gǝ kwapshak. ⁵² Nsa gǝɗethǝ gurum ɗǝ mǝ nkot paat nlǝ ɓǝ mǝ kwap shak, gurum kun gǝ mǝ naa ngurum vǝl, muop wu vǝl hǝ gǝ mǝ naa ngurum kun. ⁵³ Nda gǝ nyang yit laa muup, laa gǝ nyang yit ndaa muup; nǝgǝn gǝ nyang yit reep, reep gǝ nyang yit nǝgǝn; nǝgǝn-mat gǝ nyang yit mat laa dǝ, mat laa gǝ nyang yit nǝgǝn mis dǝ." ⁵⁴ Yesu dok nyi fu gǝ gurum wu kǝrgǝi yen, "Bii gu naa ligin fu yagal ngan-fuuf rǝ ɓǝ gu yong, 'fan ya gǝ lai', mǝn bii waa naduk. ⁵⁵ Bii gu naa koghom tong gan-wang nkaa yi ɓǝ bii gu yong, 'fuus ya gǝ ɓaan', mǝn bii waa naduk. ⁵⁶ Gun a mweng, gu man yit jepe gǝyil gǝ fugǝtǝng, mǝn a me dǝn man shii jepe wu gǝɗes hǝ shi gu yi? ⁵⁷ A nang gu ɓoot sheep bii wu kǝr dǝ kasuk mou yi? ⁵⁸ Ɗǝ gun npe mwaan ntagam wusheep gǝ wu naa ngǝ ɓǝ gǝ gap dǝ gu laa ɗagat yong ba ndǝl gǝ nmwaan ntagam wusheep, mǝn wusheep nmwǝn gǝ ndogari mǝn dogari nɗen gǝ nlǝɓal. ⁵⁹ A laa gǝgǝ ɗagat nǝ gǝ kwat shaghal nanyi dau mou ɓǝ gǝǝ pǝt mou."