1 Lat mən Agripa laa Bulus yen, "Gə ɓoot npə kaar kə sak" Mən Bulus ep sar muup mən ɓəm pə kaar kəshik yen, 2 "Long Agripa, an gə tookpya nsa a ntagam gə chinyi npe pət gə kaa san nɗəgən pampee wu Yahudawa mə jya gənyi; 3 nsa gə a wuman was Yahudawa muop gə jepe chan gə muop. Waa nsa kam hə, a ɗang gə ɗyin gə mogor gə kələng an yi. 4 Yahudawa muop dip mə man pəyagal gənə gəyil gənə gə Urishalima, ɗaghat wa an nlaa wuchom. 5 Mə man an ɗagat nkugur, mən ɗong ɗyin mə lap nɗem nkwət an a gurum Farisi wudung a gəwur gurum wu war laafu badən hə. 6 Gəɗes hə a ɗarɗok npe ɗə mə sheep an yi nsa a ɗen en nə kə bi-laaɗen wudok Naan chin gə ndaamu muop hə. 7 A bi-laaɗen nanyi dok gəseen wu wu sarkavəl mə ləng en muop nkwət gə lap hə, kabi wu mə wap Naan nfuus gə ləpar hə. Long Agripa, a waa nsa ɗen en nanyi Yahudawa muop fu pam an yi. 8 A waa nme məgwuo gǝ ɗyee nkwət Naan gə ap mədiɗəm mə nyigil nkagam mou eh? 9 An dok a ɗyee nkwət gə a chan jepe gwet a dam səm Yesu wu a gurum Nazaret hə yi. 10 A chan kam nUrishalima. A ɗək mə pən naduk Naan muop gwet nləɓal shi wu ndaawang wunan muop mə shen fu n-an hə, mən ɗə mə ntuo muop ɓə a lap gədər. 11 A lə nogol nmuop kaa nɓəl dat nləwap, mən a saa muop mə la wubis kaa Naan. Bəzung bii yagal gə muop mən a twang nmuop ba mwaan a rə gəyil gəɓang. 12 An fu bii nanyi mən a mwaan nDamaskus, gə ɓwaghat bədər ndaawang wunan muop. 13 An gəwar dat, nfuus gənaar, mən namələp wu saan maa fuus hə tong kəbətəng mələp kaa nə gə muop wu mən gəpe gəme hə. 14 Mə pələp nyil mən a kələng ɗəgəl wu laa ləfu gə an nliis Yahudawa muop yen, 'Shawulu, Shawulu, a waa nme gə fu twang an eh? Ya gə laafu ngə gə tat ras goon bii-kang yi gə baa gənyi.' 15 Mən a yen, 'Miskagam gə a wuɗang eh?' Mən Miskagam lap yen, "An a Yesu wudung gə fu twang hə. 16 Gəɗet hə, yagal gətəng kə shii gə, nsa a nyin kəsan ngə a npe ɗə a ɗen gə yi a lalep gə wu twamshik gəkaa bii wu gə man kaa nə gə jepe muop wu shee a nyin ngə hə; 17 an zak yong a pən gə gəfu gurum muop gə Məjong muop wudung an npe lep gə dər muop hə, 18 ɗewar gə ap yit muop yi, ɗə gə bat muop yi gəpe wukwuo gə waa gə ji gə muop gəpe wusaan, ɗə gə tagat muop yi nsar Shetan gə waa gə ji gə muop dər Naan, ɗewar Naan vang wubyas gəmuop yi mən mə nkat bi-teerkop wu gə a mwən nmuop wu mə saar muop shi pən naduk n-an hə.' 19 Long Agripa, waa nsa nyi, a bak ɗəgəl Naan mou; 20 mǝn a laa gǝ muop nDamaskus dǝng pel, shee muop wu nUrishalima nau gǝ gəyil Yahudiya, gǝ Məjong muop nkwǝt muop mǝ bat wakjya dǝr Naan, mǝn mə chan jepe wu nyin bat nanyi. 21 A nsa nyi Yahudawa mə yaa an yi nləwap wyoon, mən muop npe tə an. 22 Naan jet nyi fu tǝpɓǝt nǝ, waa nsa kam hə, a twamshik yi ntagam gurum wuchee gǝ mənan kǝ məbi ma wudok jeplepnaan gǝ Musa mə yen yong gə kwət hə mou; 23 dok mə yen Kristo yong gə tǝgǝrchiin, mǝn a nyi yong gǝ kwǝt a wupel wu gǝ yagal gǝnaar mǝdidǝm mǝn nshak nlaa ɓəlep pee wusaan dər Yahudawa muop gǝ Məjong." 24 Bulus kaar kə shik lat mən Festus ep ɗəgəl bəɓal yen, "Bulus, kaa gə bat. Bii man agə wu swet yer gə" 25 Mən Bulus yen, "A kaa nǝ bat mou, Festus wukǝkǝgǝt, an fu laa ɓələp naduk gə enɗyee wu kər. 26 Nsa long nyi a wu man jepe muop nhə, a bii wu saa a laa yi gə tugurduan dər muup, nsa a man nkwǝt mee məbi wu a laa hə lan nyi mou; nsa mə chin mee ngulung mou. 27 "Long Agripa, gə pən naduk njeplepnaan a? A man gə pən naduk nmuop." 28 Agripa yen, "Nɗəgən la zaa pee nhə dat mən gə npe gwaan an a waa Krista yi a?" 29 Bulus yen, "A ɗang Naan nkwət ɗyin zaa njong ko njong muo ɓǝ gǝ, nau gǝ muop wu mə keləng an chinyi hə, mə nwak kabi an hǝ, ɗe a teng lǝɓal nhə dat nwǝn" 30 Mən long yagal dar gətəng, nau gǝ gwopna, gǝ Banis gǝ muop wu mə tughatɗok gǝpe gəme gə muop hə. 31 Mǝ fwat nyit lə sheep nanyi dat mən mə laa ɓələp dər shak mə yen, "Dagwə nhə chin məbii wu wal nkop muut məu, ko ɓwaghat məu." 32 Agripa laa dər Festus yen, "Ɗyin dagwo nhǝ lang sheep gǝnyi ntagam Siza duk mou ɓǝ ɗyin mǝ tak nyi."