Jing 21

1 Mǝ nyit muop lat mǝn mǝ ruo nchii am mǝ mwaan gǝyil Kos, ɗaar mǝ fwat mǝn gǝyil Rodes mǝn mǝ ɗyilǝng mǝ mwaan gǝfǝr Batara. 2 Mǝ kat chii am wu gǝ gapɗel mwaan nFinisha mǝn mǝ ruo nnǝgǝn. 3 Mǝ naa gǝyil Siprus mǝn mǝ nyit nyi gǝ sar dakul, mǝn mǝ ɗyilǝng mǝ mwaan ngan Siriya mǝn ji mǝ lat nTaya; chii am nanyi dok gǝ sam lee a nnǝgǝn. 4 Mǝ kat jepgǝdǝr, mǝn mǝ tugat nnǝgǝn ɓit pogovǝl. Mǝrip laa gǝ muop nkwǝt nua gǝ nyit Bulus mwaan nUrishalima mou. 5 Ɓit tugat gǝmu nnǝgǝn lat mǝn mǝ mwaan-mwaan gǝmu. Muop nau gǝ jep gǝ surǝp mǝ takdǝr mu fwat gǝnyi ndangkong gǝfǝr nanyi. Lat mǝn mǝ dugham fukong, mǝ ɗang Naan 6 mǝn mǝ kwap sun gǝ muop. Mǝ ruo nchii ɗeh muop mǝ wak yaa shilǝ. 7 Mǝ tugun chii gǝyil Taya jya mǝ ruo gǝyil Tolamiyas. Mǝ nang mǝjepnǝgǝn mu muop, mǝn mǝ chin ɓit gǝme nnǝgǝn. 8 Ɓit ɓang mǝn mǝ nyit pee nanyi mǝ mwaan gǝyil Kaisariya. Mǝ ruo lǝ Filip wu shakɓǝlǝp Naan, dok nyi gǝnaar muop wu pogovǝl; mǝn mǝ tugat shiɓǝt muup. 9 Dagwu nanyi gǝ jǝraapduan feer wu gǝ mǝ laa ɓǝlǝp Naan hǝh. 10 Mǝ chin pak ɓit dat nnǝgǝn mǝn mǝ lalepnaan, sǝm muup a Agabus, tong gǝyil Yahudiya sam yi. 11 Ji dǝr mu mǝn ji mang tǝngɓuǝn Bulus. Ɓugat sarshik gǝ kwakshik gǝnyi mǝn yen, "A kam, Mǝrip Wuret laa yen 'Yahudawa Urishalima muop ge ɓugat wupin tǝngɓuǝn hǝh, gǝ mǝ pǝn nyi ntak gǝsar mǝjong.'" 12 Mǝ kǝlǝng lǝfu nhǝh mǝn, mǝn gǝ gurum wu nnǝgǝn hǝh, mǝ ɗwak Bulus ya nmwaan gǝyil Urishalima mou. 13 Bulus lap yen, "Gun fu chin a mǝ kam yi, gun fu wal ɗǝh gu dam took nǝ ya? A mang gwe nbǝzung nǝ, a ɓugat dat mou, mǝ ntǝh an nsa sǝm ndamu Yesu ɓǝh a ɗes dat." 14 Mǝ laa mǝbi shizak mou nsa nyang gwe yong mǝgwu gǝ ɗwak jin mou; mǝ yen, "Mang Naan chin bii wu took muop ɗem." 15 Ndangkong ɓit muop nanyi mǝn mǝ kok lau amu mǝ mwaan nUrishalima. 16 Pak gurum Kaisariya mǝ mwaan gǝdǝr mu. Muop nanyi mǝ wul gǝ me dagwu wu gǝ mǝ tugat gǝme, sǝm muup a Manason, a gurum Siprus wu dok waa lagǝdǝr Yesu dat lee hǝh. 17 Jya mǝ ruo nUrishalima mǝn mǝjepnǝgǝnmu mǝ kaat mǝn gǝ tookpya. 18 Ɗaar mǝ fwat mǝn Bulus nau gǝ mǝn mǝ mwaan dǝr Yakubu, mǝnan muop nau nnǝgǝn. 19 Tǝl muop lǝ gǝshak lat mǝn yakdang bii wu Naan chin gǝnaar Mǝjong gǝmek-gǝmek, nnǝgǝn ɓǝlang gǝfe hǝh. 20 Mǝ kǝlǝng kam mǝn mǝ pyap Naan mǝn mǝ yen, "Gǝ naa mou, emnǝgǝnmu, Yahudawa gwet mǝ shen naduk. Mǝ ɗem kang bi-tǝt. 21 Mǝ kǝlǝng ɓǝlǝp kaa gǝ, nkwǝt gǝ shee Yahudawa gǝ Mǝjong mǝ nyit war Musa, gǝ laa gǝ muop mǝ nook kwap dǝp jepmuop mǝn mǝ nook jepe dokmok. 22 Mǝ chin a na gǝdet sǝ yi? Yi gǝ mǝ kǝlǝng wul gǝgǝ a tiit. 23 A waa nnyi chin bii wu mǝ laa gǝgǝ. Mǝn gǝ daas feer wu mǝ twarfu du hǝh. 24 Kwat muop ɗǝh mǝ zughum gǝ yi, ɓǝh mǝ kwaar kaa du. A kam ɓǝh gurum mǝ ɗyee nkwǝt ɓǝlǝp wu dok mǝ kǝlǝng hǝh a wurum. Ɓǝh mǝ naa mǝ kat gǝ zak fu kang bi-tǝt. 25 Nung Mǝjong muop mǝ mwǝn naduk hǝh, mǝ yil gwe nmuop nkwǝt nua nigit bii wu mǝ took naatoon gǝnyi hǝh, gǝ tǝgǝm, gǝ lua wu mǝ maghar took hǝh, gǝ ɓuaar wubaan." 26 Lat mǝn Bulus kok daas muop nanyi, ɗaar mǝ fwat mǝn zughum shik muop gǝpe gǝme gǝ muop mǝn rǝ yaa nlǝwap, mǝn duam ɓit zughumshik ɗe waa gǝ rǝ a par ɓit wu mǝ mwǝn bi-wap gǝsǝm muop dip yi. 27 Ɓit pogovǝl nanyi gǝwar lat mǝn pak Yahudawa muop mǝ tugat gǝyil Asiya sam yi, sam mǝ naa Bulus nɗǝgǝn lǝwap mǝn mǝ ɗen jaghar gǝnaar gurum wu kǝrgǝi, mǝn mǝ yaa Bulus. 28 Mǝ ɓwap wuwaghar mǝ yen, "Daas Izraila muop, gǝ epɓǝt mu. A dagwu hǝh fu sheepee gǝ jepe wu gǝ dam gurum, gǝ bi-tǝt gǝ lǝwap hǝh. A kam dat mou, chin kok gurum Hellenawa muop jya mǝ dam pee wuret hǝh." 29 Mǝ laa kam a nsa dok mǝ naa Trofimus dagwu Afisa gǝpe gǝme gǝ Bulus mǝn mǝ ɗyee kat kot Bulus mang nyi mwaan gǝnyi nɗǝgǝn nlǝwap wuyoon. 30 Lat mǝn gǝfǝr nanyi yagal kam mǝn gurum mǝ suo jya mǝ yaa Bulus. Mǝ del nyi mwaan nlǝwap wuyoon gǝnyi, mǝn mǝ aghat fulǝ bǝr. 31 Muop npe tǝh Bulus dat mǝn long mǝpin kangpe muop kǝlǝng ɓǝlǝp nanyi nkwǝt kwal yagal nUrishalima. 32 Lat mǝn kok sojya gǝ mǝnan gǝmuop bǝr, mǝn mǝ suo sam dǝr gurum wu kǝrgǝi. Gurum mǝ naa long sojya gǝ pak sojya, mǝn mǝ nook Bulus. 33 Lat mǝn long sojya nanyi mwaan gǝ yaa Bulus mǝn sat nmuop mǝ ɗyan nyi shi tǝng shaghal. Lat mǝn many ɗǝgǝl Bulus gǝ bii wu chin hǝh. 34 Pak gurum gǝnaar muop wu kǝrgǝi fu laa ɓǝlǝp dǝɗyak-dǝɗyak. Lat mǝn long sojya kat yi gǝ ji ɗarshi mǝbi mou mǝn sat muop mǝ mang Bulus ruo fukǝrang gǝnyi. 35 Jya mǝ wul npe kaa gǝtǝng, mǝn sojya mǝ many nyi nsa lǝk gurum wu kǝrgǝi. 36 Gurum gwet dok mǝ yigil lǝng gǝdǝr, muop fu er ɗǝgǝl du mǝ yen, "Gu baa gǝnyi." 37 Muop gǝwaar mwaan gǝ Bulus gǝkǝnpe mǝn laa gǝ long sojya muop yen, "A laa mǝbi gǝgǝ a?" Dagwu lap yǝn "Gǝ ɓoot ɗǝgǝl Hellenawa a? 38 Kan gǝ a dagwu Masar wudok rwangpe mǝn pǝt gǝ "Mǝ-tuope" muop wakdǝr gǝgǝr gǝnyi mou mǝ?" 39 Bulus lap yen, "An a mǝgwu Yahudawa wu tong gǝyil Tarsus nnǝgǝn Silisiya. An a gurum gǝfǝr wuyoon. Shenpe n-an a laa lǝfu yi gǝ gurum muop." 40 Dagwu shenpe nnyi mǝn yagal ɗar gǝɓengpee mǝn ep sar npe laa lǝfu yi. Gurum mǝ ɗok kit ɗǝh mǝ kǝlǝng nyi yi, mǝn laa ɓǝlǝp gǝmuop gǝ ɗǝgǝl Yahudawa. Yen,