Jing 20

1 Dangkong kwal nanyi mǝn Bulus lep dǝr jepgǝdǝ muop nanyi, kwas kwak muop mǝn yagal waalap nMasidoniya. 2 Kwas kwak gurum Naan muop nnǝgǝn lat mǝn mwaan gǝyil Hellenawa muop. 3 Chin tar kun nnǝgǝn. Nyi dǝr mwaan nSiriya mǝn kat Yahudawa mǝ lǝng gwak nnyi mǝn waa ge gǝnook yaa nMasidoniya. 4 Muop wu mǝ takdǝr muup mwaan gǝ mǝ ruo gǝyil Asiya hǝh a Sopata laa Pirus gurum Beriya; Aristakus gǝ Sekundus muop nau a gurum Tasalonika; gǝ Gayus gurum Darbe; gǝ Timoti, gǝ Tikikus gǝ Trofimus gurum Asiya. 5 Daas muop nanyi mǝ ya war nmǝn mwaan gǝ mǝ kang mǝn gǝyil Trowas. 6 Dangkong Ɓitgapɗel nung Yahudawa muop mǝn mǝ nyit Filipi mǝ ruo nchii am, mǝ chin ɓit paat mǝn mǝ ruo nTrowas. Mǝ tugat nnǝgǝn ɓit pogovǝl. 7 Par ɓit wupel nnǝgǝn shiimues, mǝ wul mǝ tugat dǝ tarap naweh mǝn Bulus laa ɓǝlǝp gǝ muop wu mǝ mwen naduk hǝh. Laa ɓǝlǝp ba pee chaghat nsa naa kat ɓit nɓang ɓǝh ji nyit pee nanyi. 8 Dok pitila gwet nɗǝgǝn lǝ wu mǝ tugat nnǝgǝn hǝh. 9 Mǝ laaswaal sǝm muup a Yutikus tong ɗok pǝfung mǝn saam tǝh nyi. Bulus laa ɓǝlǝp ɗem lat mou mǝn dagwar pǝt-taa ngǝnookpee mǝn muut; mǝ mang nyi a kum dat. 10 Mǝn Bulus pǝt kat nyi, mǝn ɓuǝt shik kaa lalaa nanyi mǝn ogom nyi. Mǝn yen, "Gu weel mou, nyi nkagam." 11 Lat mǝn kaa yaa nlǝ wu gǝtǝng hǝh mǝn tarap nawe mǝn sǝ. Chin laa ɓǝlǝp veet, wul nkangǝɓit mǝn nyit muop. 12 Mǝ mang lalaa nanyi nkagam mǝn took muop pya. 13 Mǝn mǝ mwaan ɗekaa Bulus nɗǝgǝn chii mwaan mǝ ruo Asos npe ɗǝh mǝ mang nyi yi nchii. Nyang yen gǝ ji mwaan a gǝwar. 14 Mǝ kat sun nAsos mǝn mǝ mang nyi nɗǝgǝn chii am mǝ mwaan nMitilini. 15 Lat mǝn mǝ yigil nɗǝgǝn chii am, mǝ chin ɓit gǝme mǝn mǝ ruo ngan mǝpe wu batyit naa Kiyos wu kong yaa nyi waat hǝh. Daar mǝ fwat mǝn mǝ ruo gǝfǝr Militus. 16 Bulus dok ɗel shi Afisa ya ba nɗar nAsiya; nsa dok nyi bǝr-bǝr ɗeh war, nyin ɗem-a-kat ɓǝh, rǝ Urishalima yi npe ɓit Pentikos. 17 Nyi nnǝgǝn nMilitus mǝn tak lep mǝ yong mǝnan gǝwur gurum Naan muop nAfisa. 18 Jya mǝ wul mǝn laa gǝmuop yen, "Gun gǝ kaasuk gu man par ɓit wu a wul Asiya hǝh, bii mǝ tugat aram gǝgun. 19 A wap Naan nɗǝgǝn kaaleen gǝ namwaa nsa muutla wu a sua shi gwak wu Yahudawa mǝ lǝng n-an hǝh. 20 Gu man a sok mǝbi wu gǝ kyen gun fugu mou. A shepee gǝnaar gurum dar, gǝ shilǝ-shilǝ; 21 a tuamshik ntagam Yahudawa muop gǝ Hellenawa nkwǝt ɗyin mǝn nbat nlap ɓǝlǝp Naan mǝn mǝ nmwǝn naduk nɗǝgǝn sǝm ndamu Yesu. 22 Gu naa gǝdet sǝ an gǝwar mwaan nUrishalima, Mǝrip Naan laa gǝ an kam, a man bii wu gǝ kat an nnǝgǝn mou; 23 Mǝrip Wuret laa gǝ an nkwǝt duk pe wu a rǝ hǝh ɓǝh shaghal ɗyanpe gǝ muutla fu kang an. 24 Nooklang gǝnǝ a mǝbi dǝr nǝ mou. A ɗemkop a yak gǝsǝ ̀mǝn a chin ɓǝlang wu Yesu mwǝn an hǝh mwaan a rǝ nogot, mǝn a tuamshik kǝ langship gǝ chinɗong Naan. 25 Gu dip wu a shakɓǝlǝp yil-long gǝnaar gu, she gu naa an shizak mou. 26 An fu laa gǝgun chinyi nkwǝt sar nǝ paat, an gǝ zhirii mǝgwu nkaa nǝ mou. 27 Nsa a sok mǝbi ɓǝlǝp Naan fugu mou. 28 A waa nnyi gu naa kaa suk mǝn gu naa kaa gurum Naan wu Mǝrip Wuret ɗǝk nsar gu hǝh. Gu lǝng en gu tap gǝwur gurum Naan wu Yesu kwatkaa shi tǝgǝm gǝnyi heh. 29 A man wagap a nyit gun nlat ɓǝh as-laar gǝ mǝ ruo gǝnaar gu ɓǝh mǝ aar tǝm nanyi muop. 30 A man pak gurum gǝnaar gu gǝ mǝ yigil nbat naduk nsǝp ɗeh war mǝ nwaghar jepgǝdǝ yi nwak nǝmuop gǝnyi. 31 A waa nnyi, gu lǝng en gu grǝt. Gu man nkwǝt a chin yii kun gǝnaar gu an fu shee gun gǝ namwaa n-yit nǝ, lǝpar gǝ fuus. 32 Gǝɗet sǝ a nyit gun gǝsar Naan gǝ ɓǝl̀ǝp chinɗong wu gu fyar nɗǝgǝn gǝfe. A nyi gǝ mwǝn bi-teerkop ngun gǝnaar muop wu pǝpǝs hǝh. 33 Jet a chaa azurfa, gǝ zinariya gǝ byaat mǝgwu mou. 34 Gun gǝkaa suk gu man nkwǝt a chin ɓǝlang gǝsar nǝ mǝn a sǝ gǝ san nau gǝ gurum gǝdǝr nǝ muop. 35 Nɗǝgǝn jepe nhǝh nau, a nyit bi-ɗying ɗeh war gu epɓǝt tǝguk muop yi, ɗǝh gu ɗyee dǝr ɓǝlǝp ndamu Yesu wu yen, "Gǝ shen ɓǝh gǝ kat kopgǝshi ma wu gǝ lap." 36 Laa ɓǝlǝp lat kam mǝn dugum mǝn ɗang Naan gǝme gǝ muop. 37 Gurum mǝ mang wal mǝn mǝ ogom Bulus. 38 Took muop dam nsa yen nwa shee n-naa yit nyi shizak mou. Mǝn mǝ takdǝr muup mwaan gǝnyi gǝpe chii.