Jing 19

1 Apolos dok kutnyi nKorintiya mǝn Bulus ɗel war gǝdeel mǝn mwaan gǝfǝr Afisa mǝn kat pak jepgǝdǝ Yesu muop nnǝgǝn. 2 Bulus nang fu muop yen, "Dok gu lap Mǝrip Wuret shiwu gu mwǝn naduk hǝh a?" Mǝ yen, "Hayau, jet mǝ kǝlǝng mǝbi kǝ Mǝrip Wuret mou." 3 Bulus yen, "Dok mǝ kǝn gun a nɗǝgǝn mǝ dat ee?" Mǝ yen "A shi kǝnpe nung Yahaya." 4 Bulus lap yen, kǝnpe nung Yahaya a dǝh gurum mǝ bat yi nyit wubyas. Dok nyi Yahaya laa gǝ gurum muop mǝ mwǝn naduk ndagwu wu gewul ndangkong muup hǝh. Dagwu nanyi a Yesu." 5 Gurum mǝ kǝlǝng kam mǝn kǝn muop nɗǝgǝn sǝm Yesu. 6 Bulus lǝng sar kaa muop mǝn Mǝrip Wuret sam kaa muop, mǝn mǝ laa ɓǝlǝp gǝ ɗǝgǝl dǝɗyak-dǝɗyak mǝn mǝ laa bii wu ntagam hǝh. 7 Dok daas sarshika vǝl. 8 Bulus rǝh yaa nlǝwap mǝn chin tar kun nyi fu laa ɓǝlǝp gǝ tughur-dwan, nyi fu ɓǝlǝp-ɓagal gǝ ɗwakpe kǝ yil-long Naan. 9 Mǝn pak Yahudawa mǝ nyang; mǝ watyil War nanyi ntagam gurum wu kǝrgǝi. Lat mǝn Bulus nyit muop mǝn kok pak jepgǝdǝ Yesu mǝn shee muop nɗǝgǝn lǝ bi-shee nungTiranus. 10 Yii vǝl nyi fu chin kam; gurum muop wu nEsha, Yahudawa gǝ Hellenawa dip mǝ kǝlǝng ɓǝlǝp Naan. 11 Naan chan bi-ɗyeer gǝsar Bulus, 12 mǝn gurum mǝ lap byaat fwas yit muup mwaan mǝ ɓuam wugok muop gǝnyi mǝn mǝ kat kagam, damwam fwat nyit muop. 13 Mǝn pak Yahudawa muop wu pǝn damwam mǝ ɗyileng war ngan pee nanyi. Mǝ yong sǝm Yesu npe ɗǝh mǝ pǝn damwam yi mǝ yen, "Nnǝgǝn sǝm Yesu wu Bulus nyi fu kuut hǝh, mǝ sat ngun damwam gu fwat." 14 Gurum dok pogovǝl fu chan bii nakam, muop a jep mǝ mǝgwu Yahudawa, sǝm muup a Skeva, ndaawang wuyoon. 15 Me damwam lap fu muop yen, "A man Yesu, a man Bulus; ɗe gun a wuɗa muop yi?" 16 Damwam nanyi pǝt nshik dagwu wugok mǝn rǝh kaa mǝ pǝn nyi mǝn nas bar-bar. Shen gok nmuop mǝn mǝ suo fwat ngum. 17 Yahudawa gǝ Hellenawa Afisa mǝ man ɓǝlǝp nanyi. Lugut yaa muop, mǝn mǝ pyap sǝm Yesu. 18 Gurum gwet wu mǝ mwǝn naduk mǝ wul jya mǝ seer wubis gǝdu. 19 Muop wu katshi mulak mǝ waghar takarda gǝdu nuang gǝyit gurum dar. Shaghal bii wu mǝ nuang hǝh waarǝh kam paat. 20 Mǝn ɓǝlǝp Naan haan wagap fuǝǝr. 21 Bulus chin ɓǝlang gǝnyi lat nAfisa mǝn yagal gǝwar mwaan Urishalima mǝn bat war gǝyil Masidoniya gǝ Akaya, yen, "A yagal nnǝgǝn ɓǝh a mwaan gǝyil Rom." 22 Bulus lep Timoti muop gǝ Erastus mǝ mwaan nMasidoniya. Mǝn nyi ɗeeh nAfisa ɗǝng lee. 23 A shide mǝn ɗǝgǝl-nyangshak yagal ɓaan-ɓaan gǝyil Afisa gǝkaa War Yesu. 24 Mǝ wusughum sǝm muop a Damatrus chan natoon nung Diyana, mǝn bii mǝsughum mǝ kat shaghal gwet a shik. 25 Lat mǝn tǝl kǝ mǝsughum muop gǝshak mǝn yen, "Daskagam, gu man a ɓǝlang nhǝh bii mwǝn shaghal nmǝn. 26 Gǝɗet sǝ gun fu naa gun fu kǝlǝng nkwǝt bii nanyi a gǝyil Afisa dat mou, mwaan gǝrǝh gǝyil Asiya, Bulus nyi fu bat kaa gurum mǝ nyang war gǝmu yi. Nyi fu laa gǝmuop gǝtap Naan wakot wu mǝ chin shi sar mou. 27 Gu man a lǝtuk amu dat gǝ lat mai, lǝwap Diyana zak gǝ lat baan. Nyi wu gurum Asiya gǝ gǝyil nau fu wap nyi hǝh, gǝ waa wubaan." 28 Mǝsughum muop nanyi mǝ kǝlǝng kam mǝn tuub muop lee, mǝn mǝ jor ɗǝgǝl du mǝ yen, "Diyana nung Afisa a naan wuyoon!" 29 Mǝn pee yagal rǝng dat dip gǝfǝr nanyi, gurum mǝ fwat mǝt-mǝt mwaan gǝpee gyaa. Dok mǝ yak Gayus gǝ Aristakus, mǝshaar mwaan Bulus muop gwe. Muop dok mǝ tugat a nMasidoniya wul yi. 30 Bulus nyi gǝwar rǝh gǝnaar gurum wu kǝrgǝi mǝn jepgǝdǝ muup mǝ dǝn shimuup. 31 A kam shizak, pak shaarmuup wunan gǝyil Asiya mǝ lang lep laa gǝnyi nkwǝt nyi nrǝh gǝpee gyaa mou. 32 Gurum ɗeh gǝ mǝ laa ɓǝlǝp dat vuu nsa kang rǝng muop. Pak muop man bii wu wul gǝmuop mou. 33 Pak gurum wu kǝrgǝi mwaan mǝ laa gǝ Alekzanda wu dok Yahudawa mǝ tughun a nyi tak ntagam hǝh, mǝn ep sar npe ɗǝh yakdang yi ngurum wu mǝ wul jya ɗyam hǝh. 34 Gurum mǝ naa mǝ kat nyi a mǝgwu Yahudawa mǝn mǝ chin jor ɗǝgǝl du veet, mǝ fu yen, "Artemis nung Afisa a naan wuyoon!" 35 Wubii-yil sat ngurum mǝ ɗok mǝn yen, "Gun gurum Afisa, a wuɗang nyang nǝ nman nkwǝt Diyana Naan amu wuyoon, wu tong fugǝtǝng sam yi nyi a npeen yi? 36 Gu man mǝgwu gǝ ɓagal mou. A waa nnyi, ɗong nyin gu ɗok kot mǝn gu chin mǝbi gǝ dǝfil mou. 37 Gu jya gǝ daas muop hǝh gǝpee sheep, gu man mǝ mwaan wat mǝbi nlǝwap amu mou, mǝ laa wubis kǝ Naan amu mou. 38 Ɗǝh Damatrus gǝ gogot mǝsughum mǝ nkot gǝ bii laa gǝkaa Gayus muop gǝ Aristakus ɓǝh mǝ yaa war pas. 39 Ɗǝh gu kwǝt gǝ nde ɓǝlǝp ɗyik, ɓǝh mǝ laa gǝɓang gǝnaar gurum. 40 Nsa gurum em mǝ nnaa wubis gǝmu gǝ jaghar wu taa chinyi nhǝh. Ɗong ɗyin ɓǝlǝp roop ntaa ba nsa mǝn gǝ mǝbi wu gǝ mǝ laa gǝkaa mou." 41 Lat mǝn sat ngurum mǝ wak.