1 A dangkong jepe muop nanyi mǝn Bulus nyit Aten mǝn mwaan nKorintiya. 2 A nnǝgǝn mǝn kat mǝ dagwu Yahudawa, sǝm muup a Akila, gurum Pontus. Nyi gǝ mat muup mǝ tugat nItali wul yi nsa dok long Klodiyus chen Yahudawa muop nnǝgǝn. Bulus mwaan gǝ tong shibǝt muop 3 nsa dok ɓǝlang gǝfe a bii wu gǝme gǝ nǝmuop, a ɓǝlang chan kyangkyang. 4 Bii par Ɓitnyak ɓǝh Bulus ɓagalshik nlǝwap gǝ Yahudawa gǝ Hellenawa muop. 5 Mǝn yaa kaa pak muop gwet. Silas muop gǝ Timoti mǝ tugat nMasidoniya sam ruo mǝn Bulus twamshik ntagam Yahudawa muop nkwǝt Yesu a nyi a Kristo. 6 Naa kat Yahudawa mǝ nyang ba mǝ aghas nyi, mǝn Bulus taat byaat gǝfe nmuop mǝn yen, "Tǝgǝm agǝ nyi a nsar gu nsa an a wufufii. Gǝdet sǝ gǝ a waa a lap a dǝr Mejong muop." 7 Lat mǝn yagal nnǝgǝn mwaan lǝ me dagwu wu wap Naan sǝm muup a Titiyus Justus. Lǝ dagwu nanyi dok dukduk gǝ lǝwap. 8 Krispus, mǝ miskagam nɗǝgǝn lǝwap lap ɓǝlǝp Naan mǝn muop nau gǝ gurum lǝ gǝfe mǝ mwǝn naduk. Gurum Korintiyawa muop gwet mǝ kǝlǝng mǝn mǝ mwǝn naduk mǝn mǝ kǝn muop. 9 Naan laa gǝ Bulus nlǝpar yen, "Gǝ yagal lugut mou, gǝ ɗok ɓǝp mou; laa ɓǝlǝp gǝnǝ. 10 Gǝ a lang gǝdǝr gǝ, mǝgwuo gǝ mwǝn gok ngǝ mou nsa an gǝ gurum gwet npeen." 11 Bulus tong nnǝgǝn yii gǝme gǝ tar peemǝ nyi fu shee gurum gǝ ɓǝlǝp Naan. 12 Shi wu Galiyo wa long Akaya mǝn Yahudawa muop mǝ nyang yit Bulus, mǝn mǝ mang nyi mwaan gǝnyi ntagam wusheep, 13 mǝ yen, "Dagwu nhǝh nyi fu nuaar gurum npe ɗǝh mǝ wap Naan yi ɗyik gǝ bi-tet gǝmu." 14 Bulus npe laa lǝfu mǝn Galiyo laa gǝ Yahudawa muop yen, "Gun, Yahudawa, ɗyin a mǝbi rwang ko wubis ɓǝh ɗyin a man npe laa nyi. 15 Wudung a lǝfu gǝkaa sǝm gǝ bi-tǝt gǝgu, gu laa nbi gu. An gǝ a sheep bii nakam mou." 16 Galiyo sat nmuop mǝ nyit pǝtong sheep. 17 Lat mǝn mǝ yaa Sostines, miskagam lǝwap, mǝ nas nyi mǝn mǝ mwaan gǝnyi ntagam pǝtong sheep. Mǝn Galiyo weel gǝ bii wu mǝ chin hǝh me. 18 Bulus tong nnǝgǝn ɓit mak vǝl mǝn nyit mǝjepnǝgǝn muup mǝwap Naan muop mǝn waa lap nSiriya gǝpe gǝme gǝ Prisila gǝ miss muop Akila. Nyi npe nyit fukong Sengkriya mǝn sat nmuop mǝ ɗyip kaa muup nsa dok laa me ɓǝlǝp ɗen nkwǝt gǝ ji chin kam. 19 Jya mǝ ruo gǝyil Afisa mǝn Bulus nyit Prisila muop gǝ Akila nnǝgǝn, mǝn mwaan yaa nlǝwap mwaan gǝ ɓagal ɓǝlǝp-ɓagal gǝ Yahudawa muop. 20 Muop nanyi mǝ ɗwak Bulus npe ɗǝh tong yi veet nnǝgǝn mǝn nyang. 21 Nyi npe nyit muop mǝn yen, "Naan nɗem ɓǝh chin a waa awul dǝr gu." Lat mǝn yagal nyit Afisa. 22 Buklus ji wul nKaisariya mǝn mwaan gǝ tal gǝwur gurum Naan nUrishalima mǝn ɗel waalap nAntiyok. 23 Tong pogot nnǝgǝn mǝn nyit pee nanyi mǝn ɗel war ngan Galatiya mwaan yaa gǝyil Frijya nyi fu kwaskwak jepgǝdǝ Yesu muop dip. 24 Apolos mǝgwu Yahudawa wu dok mǝ laa nyi nAlezandriya hǝh wul nAfisa. Dagwu nanyi ɓoot ɓǝlǝp badǝn mǝn man Bang-ɓǝlǝpnaan dip. 25 Apolos dok kat karpee wusaan gǝkaa sheepee Yesu. Nyi a kwas ɓǝlǝp mǝn shee gurum ɗaghat n-yit gǝkaa jepe Yesu. Nyi zak dok man a kǝnpe nung Yahaya dat. 26 Apolos laa gǝ tughurdwan nnǝgǝn lǝwap. Prisila muop gǝ Akila mǝ kǝlǝng nyi mǝn mǝ yong nyi gǝ eskoghop mǝ shak ɓǝlǝp war Naan nnyi zaghat. 27 Dok ɗemkop mwaan nAkaya mǝn mǝjepnǝgǝn muop mǝwap Naan mǝ kwas kwak muup, mǝ yil dǝr jepgǝdǝ Yesu nAkaya ɗe war mǝ lap yi. Mwaan gǝ rǝh mǝn epɓǝt muop wu mǝ mwǝn naduk hǝh, chinɗong nmuop. 28 Ɓagalshik kang muop gǝ Yahudawa mǝn Apolos kok muop gwan dar; nyin nmuop nnǝgǝn Bang-ɓǝlǝpnaan nkwǝt Yesu a nyi a Kristo.