1 Mǝjepnaa daas gǝ nda nyi muop gu lǝngkom gu gu kǝlǝng ɓǝlǝp pǝt-gǝ-shik gǝnyi yi." 2 Gurum mǝ kǝlǝng laa lǝfu gǝ ɗǝgǝl Yahudawa mǝn mǝ ɗok kit. Men yen, 3 "An a gurum Yahudawa, mǝ laa an a gǝyil Tarsus nɗǝgǝn Silisiya, a Gamaliyel shee an npeen hǝh. ̀ Mǝshee an gǝ bi-tǝt nda mu muop. An gǝ bǝzung wap Naan kabi wu gun gǝnyi chinyi hǝh. 4 Dok a twang War wagap mǝn a tuo gurum, a ɗyan daas nau gǝ surǝp a ɗǝk nlǝɓal, 5 kabi wu ndawang wuyoon gǝ gogot gurum mǝ man hǝh. A lap bi-yil-lep fu mǝjepnaa muop nDamaskus mwaan a ɗyan gurum yi a wawul muop nUrishalima npe ɗǝh mǝ mwǝn muutla yi muop. 6 Mǝn mǝbi chin shi wu dok an gǝwar mwaan nDamaskus hǝh, nfuus-gǝnaar mǝn pee yagal saan yaa an waat. 7 A pal n-yil mǝn a kǝlǝng ɗǝgǝl mǝgwu yen, 'Shawulu, Shawulu, a na gǝ fu twang an yi?' Mǝn a lap a yen, 'Gǝ a wuda yi nda?' Mǝn lap funǝ yen, 8 'An a Yesu wu gǝ fu twang hǝh.' 9 Muop wu gǝme gǝ an hǝh mǝ naa wus wu saanpee nanyi, mǝn mǝ ɗyam shi ɗǝgǝl gwuo wu laa ɓǝlǝp gǝ an hǝh mou. 10 Mǝn a yen, "Ɗe gǝ a chin a na yi nda?' Mǝn Naan lap yen, 'Yagal gǝ mwaan nDamaskus; mwaan gǝ rǝ ɓǝh mǝ laa bii wu gǝǝ chin hǝh.' 11 Wus wu dok ɗar n-yit nǝ hǝh, ɗem naapee shinǝ mou, mǝn gurum muop wu dok mǝn gǝpe gǝme hǝh mǝ yaa sar nǝ mǝn mǝ ruo nDamaskus. 12 A nnǝgǝn mǝn a kat me dagwu, sǝm muup a Ananiyas, nyi a wu kang bi-tǝt; Yahudawa muop wu nnǝgǝn mǝ laa wuret kaa muup badǝn. 13 Ji dǝr nǝ mǝn yen, 'Emna Shawulu, ɗagat yit gǝ naapee yi.' Dat kam mǝn a naa nyi. 14 Lat mǝn laa gǝ an yen, 'A Naan mǝ ndamu shang gǝ ɗeh war gǝ man bii wu ɗemkop yi, gǝ Dagwu wu Kǝr, npe ɗǝh gǝ kǝlǝng ɗǝgǝl muup yi n-fu muup. 15 Nsa a gǝ gǝ waa wutuamshik kaa muup ntagam gurum kǝ ɓǝlǝp wu gǝ naa mǝn gǝ kǝlǝng hǝh. 16 Dǝɗet sǝ gǝ fu kang a mǝ? Yagal mǝ kǝn gǝ ɗǝh mǝ vang wubis gǝgǝ yi nɗǝgǝn sǝm muup.' 17 Waa ji a wul nUrishalima, an fu ɗang Naan dat nlǝwap wuyoon mǝn a naa mǝbi nkaafung. 18 A naa nyi fu laa gǝ an yen, Yagal bǝr gǝ nyit Urishalima nsa gǝ mǝ ɗem ɓǝlǝp gǝgǝ nnǝgǝn mou.' 19 Mǝn a yen, "Nda, mǝ man nkwǝt an dok a mwaanɗok shi lǝwap-lǝwap a yak muop wu mǝ mwǝn naduk ngǝ a nas mǝn a ɗǝk muop nlǝɓal. 20 Dok mǝ tǝh Istifanus a gǝyit nǝ, mǝn dok ɗongɓǝt nǝ; a an dok a kang gǝ byaat muop wu me zuam nyi tǝh shi pang hǝh.' 21 Mǝn laa gǝ an yen, 'Mwaan dat, nsa gǝ a lep gǝ dǝr Mǝjong.'" 22 Mǝ lǝng kom muop kǝlǝng nyi laa nau lat. Mǝn mǝ aar ɗǝgǝl muop mǝ yen, "Gu vak gǝ bii nakam, ɗong nyin nkot gǝyil gǝ nooklang mou." 23 Mǝ eer ɗǝgǝl muop, mǝ taghat byaat kulǝp, mǝ ǝgǝt orong fuu gǝtǝng, 24 mǝn lat mǝn long sojya yong Bulus mwaan gǝkǝnpee gǝnyi. Laa yong nua nang ɗǝgǝl muup gǝ nas. Chin kam ɗer war man bii wu saa muop fu eer ɗǝgǝl gǝdǝr muup yi. 25 Mǝ ɓugat nyi lat mǝ nang fu mǝ sojya wu ɗarɗok dukduk hǝh yong, "Ɗong ɗyin gu nas gurum Rom nǝ mǝ nsheep nyi a?" 26 Dagwu kǝlǝng kam mǝn mwaan gǝ laa long sojya yen, "Gǝ fu chin a mǝ kam yi? Dagwu wu mǝ ɓugat nyi a gurum Rom." 27 Lat mǝn mwaan gǝ kat nyi mǝn yen, "Lat gǝ an, gǝ a gurum Rom a?" Bulus lap yen, "A kam hǝh" 28 Long sojya nanyi yong, "Dok a kwat shaghal gaban shee mǝ lap an nRom." Bulus yen, "Mǝ laa an a nRom." 29 Gurum wu dok muop npe nang ɗǝgǝl Bulus hǝh mǝ yigil nyit muop. Long sojya muop yagal lugut nsa naa kat ji ɓugat Bulus wu a gurum Rom hǝh. 30 Ɓit ɗaar ɓang mǝn long sojya ɗemwkop ɗǝh man weel Yahudawa muop gǝ Bulus yi. Lat mǝn sat nmuop mǝ wul Bulus, mǝn yong mǝ-ndawang wunan mǝ tugat. Mǝn mang Bulus sam ɗen gǝnaar muop.