1 Gə man bii nhə: paa shi ɓit wutəs muop ɓə jepee mə laafu. 2 Gurum yong gə mə ɗəm kaashik muop, yong gə mə ɗam shaghal, yong gə mə ɓwap ɓəzung muop, yong gə mə tuaghat a wu kaa ɓal, yong gə mə tuaghat a wu dam səm Naan, yong gə mə nyang ɗəghəl mə Nda muop gə mə nagan muop, yong gə mə tuaghat a wu ɓak chinɗong, gə wu chan bii wubis muop. 3 Dempee naduk yong gə wən, məbii ntaa ɓə myap-kəkang leng, gurum yong gə mə dam səm shak, yong gə mə ɓoot ɓə yak kaashik moup mou. Yong gə mə kwət a wupin difil, yog gə mə nyang jepee wuret. 4 Yong gə mə tuaghat a wupin voghop pee, yong gə mə kang gə məbii mou, yong gə mə tuaghat a gurum ndung bii mə ɗiye a gə kaashik muop hə dat, yong gə mə ɗem bii wushang ɗee kə Naan. 5 A səm dat yong gə mə kwət a gurum Naan, naw kam hə yong gə mə yong gə mə nyang maa afe. Gap gə baa gə ɗə gurum muop nani nhə. 6 Nsa pak muop a gurum ndung mə rwə shi-lə shi-lə də fən swərəp wu yoghor muop yi. A swərəp ndung bii wubis garang muop bəncin mə kyem nsa tang bii wushang məmeet hə. 7 Swərəp muop nani nhə bii mə shee jepee shibit-shibit, naw kam hə mə man naduk mou. 8 A kabi ndung Yannisu muop gə Yambrisu mə nyang yit Musa hə, a kam hə zak wupin biishee wurum muop mə nyang yit naduk. Muop a gurum ndung bəzung muop a wubaan hə, mə pən naduk a shi fu moup dat. 9 Naw kam hə yong mə səngpee mou. Nsa yohor a muop yong gə pət ntak gənaar gurum dib, Kabi goghot gurum, muop nani ndung nhə. 10 Nə mak zak, gə lang a gədə biishe anə, bii wu bi a chanhɛ, enɗiye anə, pən-naduk anə, biizwat anə, ɗempe anə, biimoghor anə, twangpe muop, muutlaa muop, gəbii wu kat an gəyil Antakiya muop gə Ikoniya de Listra hə. A moghor 11 twangpe muop. Nɗəghən muop dip, Ndamu pen an. 12 Dib gəsəm gurum ndung mə yak war Naan ndəghən Kristi Yesu hə yong gə mə swa twangpe. 13 Gurum wu chan bii wubis gə muop ndung mə mang Kaashik muop a məbii hə, yong mə dam n'mwan tagham. Muop gə kaashikmuop gə pak gurum yong mə kyem war. 14 Gə zak, mwaan gədə bii muop wu gə shee hə, bən gə pən naduk gə bəzung gə gəmee. gə man gwə wu shee gə hə. 15 Man n'kwət gə dok a laa wuchom gə man bəlepnaan wuret ndung mə ran ŋbiiran muop nhə yi. Nani gə ɓoot də pən en ngə də ankaa ndung ni nɗəghən Kristi Yesu hə. 16 A naan gə bii wu mə ran ndəghən bəlep afe hə dib. Dong də sheepee, gə karpe, gə myappe wukər. 17 Ndung hə a də gurum Naan na yong n'lək mou, ni gə chin a shik nlə də dib gəsəm ɓalang naduk.