1 An fu pən bii-tət nhə, ntagham Naan gə Yesu Kristi, ndung ani pa gə shyep gurum wu muop n'kagham gə muop ndung mə ɗuam hə, bəncin a nsa wul afe gə yil-long afe. 2 Gə shakbəlep nani. Lə sak a shik ko ɗin gə kat pee ko ɗin gə kat pee mou. Rwang sak, ɓyaal-ɓyaalpe, kar-karpe shi moghorkung din gə shee pee. 3 Nsa pee pa gə wa nrə ndung gurum latbə mə nyang sheepee wukər hə. Nde a kam hə ɓə lat bə mə tang wushee pee muop ndung lekyit a muop gə bəzung muop gə mə tang ani hə. 4 Lat ɓə mə laa bii wu kom muop gə ɗem ɗin n'kələng ani hə. Lat ɓə mə dwaghar kom muop yong ba mə kələng shee pee naduk, de lat bə mə ləngkom muop kələng a bələp wubaan muop dat. 5 Gə nəmak, ndəghən jepee dib bə gə ya kaasak. Zwat muutlaa, chin bəlang wushakbələp, chin yit nəmak. 6 Muop fu kwələp an. Pee waarə də chak yaghal anə. 7 A yak gəsə na duk-duk: a yak fubət nəmaan gwə lat, a ɗar ɓal shi pən-naduk. 8 Vughum long wukər ɗəɗok gə kang an yi, Naan wupin naduk paa gə pən n'an paa ɓit nani. A an dat mou, naw gə muop ndung mə ɗəm wul afe hə. 9 Zwat gə ji ɗə nə bərbər. 10 Nsa Dimas gap antak. Gə ɗəm nəmuup a ɓəlep gəyil dat mwaan wakkwət gəyil Tassalonika, Kariskis mwaan wakwət gəyil Galatiya, Titus zak mwaan wakwət gəyil Dalmatiya. 11 A Luka dat gəmee ɗe shiɓət nə. Tang Markus gə ji gəni nsa yong gə kyen an ɗə bəlang nhə. 12 A lep Tikikus wakwət gəyil Afisus. 13 Gə ya də ji ɓə gəji gə ngodo wudok a nyit ni gəsar Karbus gəyil Tarusawa hə, dib gə bii-ran muop, lengtəs a bii-ran nhə. 14 Iskandari ndung a wusughum dalma hə chin nagət bətchan də nə. Nda mu yong gə yawaap bii wu ni chan hə. 15 Gə ma gə kang gəni, nsa ni gə ɗem bəlep a mu wa til mou. 16 Shideel wu a yaghal wu a yaghal a ɗar kəsan hə, məgwo lap gədə nə mou. Mak ɓə swə dib fu nə. A ɗem ɗin mə yawaap nani nkaa muop mou. 17 Naan ni gəmee gə an, ani ɓəncin ɓal kwak nə ɗeepin a an a shakbələp yi ɗong-ɗong ɗə gurum gəyil mə kələng yi dib. mə pən an nfu liit. 18 Naan yong gə pət gə an nfu bii wubis, ɓəncin ani yong gə angkana nə ɗə yil-long kəbətəng. Maa tong a mərmuup gəgwo. Mə ɗem ani. 19 Nang Biriskila, gə Akila, gə lə Onisifurus. 20 Arastus tongɗok gəyil Korinti, Turufimus zak la gog ya ni ɗen gəyil Militus. 21 Chin gə wul nɗəng shee kophom npət. Yubulus nifu nang gə, a kam hə Budis muop gə Linus ɗee Kalafidiya gə goghot gurum muop fu nang gə. 22 Mang Nda mu tong gəmee gə məriip gə. Mang chinɗong afe tong gəmee gə-gə.