¹ Mə ɗem ɗin gu man məjepna muop, kə chinɗong wu Nan chin də dəng gurum Naan muop n Makidoniya hə. ² Ndəgən gət manchiin a muop mən tookpiya a muop gə piya amuop la nagət bilong loghot. ³ A pən naduk kə wu kan mə pən gəpee ɓoot amuop ba maa kə ɓoot a muop, ⁴ gə kaashik muop məɗang mən gəret də wu ɗin du kang kaa du yi də chin bəlang ngurum wu pən naduk muop. ⁵ Tong wagap a kamhə, maa gəkaghan wu mə ɗie hə, mə yawar pən kaa shik muop nNaan, mə bən pən kaashik muop nmən gəpee ɗen Naan. ⁶ Mu pən tughur kagam nTitus, ndung yawar bəlang hə, ɗə nni kəgət ɓəlang bii-pən tookpya agu nanyi. ⁷ Gun zak gu kaar nɗəgən jepe dip nɗəgən pən naduk, gə ɓələp laa, gə bii-man, gə ləshik, gə ɗempee agu də mu. A kam hə zak, chin gu diləng ntagam də ɓəlang chinɗong nhə. ⁸ A laa nhə a kə bii-tət məu, a laa adə kam ɓal ɗempee agu yi də mu gə natan ɓəlang nde gurum muop. ⁹ Nsa gu man chinɗong Miskagam amu yesu Kristi saa ni wu a wulong hə, baa wa a wupya ɗe war nɗəgən piya afe bə mən məlwang yi. ¹⁰ Ndəgən bit nhə ga kar gun, yii gəme wudok ɗel hə, dok gu yaa a kughur mee məbii dat məu, dok gu tang nkop chin afe wagap. ¹¹ Gəɗes hə, gu chin de yit lat, ka wudok bəzung gu mang kə wu yong gu chin hə, gu lat ni gəpee ɓoot agu. ¹² Din gu tang nkop lat bəlang nani, ɓə ɗong ba dən, a bii lap kap. Nit ɗaghat ni tong a gapee bii wu gurum gə ni, a kə bii wən afe məu. ¹³ A də yong ba bəlang nwa bii tigin nka pak gurum de pak gurum mu ɗee chak. Gu chan jepee gə ya naa. ¹⁴ Bii kat agu gəɗes hə yong gə kwat weel amuop, ɗee war nbii kat amuop zak kwat weel agu yi. A kamhə bə yaa-naa tong gəpee ni. ¹⁵ Ni a wuyiyil, "Gurum wu ni gə gak hə ɗee gə gəvər məu, gurum zak wu ni gə ni til hə kat bii wən məu. ¹⁶ Mə dək yil n' Naan wu ɗen shi bəzung Titus ɗə wu naakaa gu ka mu an gə ni fə gu gə. ¹⁷ Nsa lap a ɗang pee amu dat məu, chin wagap shi naduk kə wu kamhə nani. Ji də gu a gə ɗem afe. ¹⁸ Mə lep gə emnəgən mu wu bii mə təgər ni kə bəlang wuret nnung laa bələp Naan afe gənaar dəng gurum Naan muop gədə muup. ¹⁹ A wa nsa nhə dat məu, awa ndung gurum Naan muop mə mang ni də muan gəmee gə mən gə bəlang chinɗong wu mə ləng mədok gə ni də wu nyi yoon nnung Miskagam gə kaashik muup gə enɗiye amu də wu chin wuret hə. ²⁰ Mən fu yigil luaghat yong gə məgwə n'agas mən kə chinɗong wu mən fu chan hə. ²¹ A ɗem amu ɓə ɗin gə mə chan bi wuret a ntagam Miskagam dat məu, din mə chan də yit gurum muop zak. ²² Mə lep nde emnəgən mu gə muop. Mə kamni mən mə kat ni gə ləshik nbəlang mbəl dat, gəɗes nhə chin ləshik nkwas nsa ɗempee wu ni gə ni də gu hə. ²³ Ni Titus a wushaar muan anə, bən ni a wushaar dəng gurum Naan mə lep muop, muop a wu nyin yoon Naan. Ɓəlang anə də gu. Məjep emnəgən mu muop zak a. ²⁴ A nwa nni, gu nyin ɗempee nmuop, gu bən gu nyin ndəng gurum Naan muop bii wusaa mən mə ɓwap bəzung mu yi gə gun.