¹ Məjep emnaa muop, wa nsa mən gə ɓələp ɗən ɓə nit ɗaghat mə vang sun yi gə jepee shishik gə chillem wu gə dəm mən hə, mə chen gədə bii wu a wusəsaar hə. ² Gu pən pee nmən! Mə ɗam took məgwə məu. Mə vogop mə gwə məu, mə ɓak mə gwə məu. ³ A laa a wu nyang gun məu, A yaa war gwee a laa a yen gun nbuzung mu də mə duam gəmee, mə bən mə chin bərəp gəmee. ⁴ A pən naduk ngun. A bwap bəzung nəgəgun. Bəzung nə sam teer, tookpiya a nə maa lap gəkang, dip dat gə manchiin anə. ⁵ Gəsəm wu mə jaa Makidoniya hə, swoopsun kat niak məu. A man kam hə məkat weel meet-meet, kə ɗəgəl ninagshak gəɓang gə luguut nɗəgən. ⁶ Naan wu gə kang kaa ləkaa zuan mən gə lep wu lep gə Titus hə. ⁷ A wul Titus dat zuan mən məu, rəp gə lap wu gu lap ni hə. Laa ɓələp wuret yoon kaa ɗempee agu, gə manchiin agu, gə yigil də chan jepee, mən took nə piya yoon. ⁸ Langship wudung lep dəgu hə yong gə dam took gu, dip gə kam hə a naa bis afe məu. A naa bis afe a gəshi wu a kat took gu dam hə, mən a dəla zaapee dat. ⁹ Gəɗes nhə tooknə piya, a wa nsa tookdam a gu məu, a wa nsa tookdam agu saa gun gu nyit bii wubis agu. Gu kat manchiin gə kopgəshi, mən məbii wən ngun məu. ¹⁰ A wa nsa took dam nɗəgən Naan bii gə muan nyit bii wubis ndung gə kəgət an kaa wu zeet nə nkwət gə naa dangkong hə. Weel gəyil bii gə wul gə muut. ¹¹ Bə gu naa ɗongpee manchiin nɗəgən Naan wu kat gun hə. A ran a tughur kagham agu wu gə nyin kə wu gun chin bii wubis məu. A ran ɓal ɗəfil agu, lugut agu, gə ɗen bəzung gu, gə rəgət agu, də gu naa kə wukan mə chin naduk yi. Ndəgən jepbələp nhə gu chin wubis məu. ¹² Bii wu a yil hə a ɗə gurum wu chin wubis hə məu, wadə gurum wu mə chin wubis nyi hə məu, a yil a ɗeewar mə man nusaar agu gə mən yi ntagam Naan. ¹³ A wa nni mə kat tughur kagham yi. Lang kə twaghat bwai amu, mə bən mə kat tookpiya nsa took Titus piya, chillem muup bən tong chagap waa ngun. ¹⁴ A chin bagal gə gun də muup, mən kaa nə waat məu. Nɗee a nhə bə bii wu mu laa də gu hə a naduk, bə dip bagal amu də Titus kaa gu hə a naduk. ¹⁵ Ɗem gun wagap badən nsa gusam kagu ntagam muup, ka wu gu lap ni gə lugut gə naɗaar. ¹⁶ Took nə piya wa nsa an gə tughur duan kaa gu.