¹ Mǝ man wagap nkwǝt lǝ wu mǝ tugat ɗok nnǝgǝn gǝyil nhǝ nlat ɓǝ mǝn gǝ nde lǝ dǝr Naan. A lǝ wu gurum ɗyik shisar mou, a lǝ wu gǝguwoo wu kot fugǝtǝng hǝ. ² Mǝn fu gwaar nɗǝgǝn shishik nhǝh, mǝ ɗemkop ɗyin me ɓyang byaat lǝ gǝmu wu fugǝtǝng hǝh. ³ Mǝn fu chaa byaat nanyi nsa ɗǝh mǝ ɓyang ɓǝ gǝ mǝ kat mǝn ngum zak mou. ⁴ Ɗǝ mǝ kutnyi nɗǝgǝn shishik nhǝh mǝ gwaar nsa mǝn gǝ lee wu tegen. Mǝ tangkop mǝ tagat byaat nsun mou. Mǝ tangkop mǝ ruan byaat ɗe war n-nooklang ɗal bii wu muut-muut yi. ⁵ A Naan chin mǝn npe jepe nhǝh, a nyi mwen Mǝrip nmǝn, yaawar bii kot ntagam hǝh. ⁶ A waa nnyi gu tugat gǝ tughurkagam. Gu man ɗǝh mǝ kutnyi gǝpang ndengen shishik nhǝh ɓǝ mǝ dukduk gǝ Naan mou. ⁷ Mǝ mwaandok a shi mwǝn naduk dat, a shi bii wu mǝ naa shi yit mou. ⁸ A waa nnyi mǝn gǝ tughurkagam yi. Mǝ tangkop mǝ nyit shishik nhǝh ɗe war mǝ wak yi gǝpang dǝr Naan. ⁹ Mǝ ɗen ntagam mu nkwǝt ɗǝ me kot gepang ge gewar be me chin bii wu Naan ge demkop he. ¹⁰ Par gǝ dǝɗyam, a lǝngwaar, ntagam pǝtong sheep nung Kristo npe ɗǝ gurum dip mǝ lap kopgǝshi muop yi kǝ jepe wu mǝ chan nɗeng shishik, wuret gǝ wubis. ¹¹ Mǝn wu yigl lugut Naan, mǝ gwaan gurum. Naan a man mǝn dip. A ɗen en nǝ nkwǝt bǝzung gu a kam zak. ¹² Mǝn a fu gwaan gun ɗeh war gu naa nkwǝt mǝn gǝ naduk yi mou. Mǝ ɗemkop ɗǝ gu nas bǝzung gu yi shi mu ɗe war gu kat bii laa yi dǝ muop wu mǝ nyaap shak shi bii wugǝtal ɗǝ a bii wu bǝzung mou. ¹³ Kaa mu nbat ɓǝ bat a nsa Naan, ɗǝ mǝ kot gǝ en mu ɓǝ a npe gu. ¹⁴ Ɗempee Yesu fu del mǝn, nsa mǝn man wagap: nkwǝt mǝgwu gǝme muut waa nmǝn dip mǝn gurum dip mǝ ɗǝm. ¹⁵ Nyi muut a nsa gurum dip ɗeh war wu muop wu nkagam yi me nlǝngɗok shi kaa shik muop mou, mǝ lǝngɗok a shi nyi wu muut mǝn bǝn yagal hǝ. ¹⁶ A waa nnyi mǝ kutnyi gǝ mǝ sheep mǝgwu shi bii wu gurum man mou, Yesu dok nyi a kam shi de. Gǝɗet hǝ bii mǝ sheep a kam shizak mou. ¹⁷ A waa nsa kam, mǝgwuo wu nyi nɗǝgǝn Yesu ɓǝ mǝ laa nyi a wufuo. Jepe wu sǝgǝr ɗyilǝng. Gǝɗet hǝ, a wufuo dat. ¹⁸ Jepe nhǝ nau mǝ tugat a dǝr Naan. A nyi myap gǝkang mu gǝ kaashik muup nɗǝgǝn Kristo mǝn mwǝn ɓǝlang myap-gǝkang nmǝn. ¹⁹ Wawu Naan nyi fu myap gǝkang muup gǝ gǝyil nɗǝgǝn Kristo, nǝ nkun wubyas gǝmuop. Nyit lep myap-gǝkang gǝsar mu. ²⁰ Mǝ tagat a mǝn mǝ ɗyam gǝfu Kristi, gǝyoo nyi fu ɗangpe a gǝ mǝn. Mǝ ɗang gun ndǝgǝn sǝm Kristi: Gu "Gu myap-gǝkang suk gǝ Naan!" ²¹ A nyi saa Kristi waa bi-tok npe vang wubis gǝmu. Nyi jet chin wubis mou. Chin kam ɗe war mǝ wak gurum wukǝr yi ntagam Naan.