¹ A waa nnyi, nsa mǝn gǝ ɓǝlang, kabi wu mǝ kat naachigir hǝ, kwak mu gǝ waam mou. ² Mǝ nyang war mwǝn waatkaa gǝ bii guwool. Mǝn lǝngɗok a shi soon amu mou, bii gǝ mǝ viling ɓǝlǝp Naan mou. Mǝ nyin naduk mǝn gurum mǝ ɗem mǝn ntagam Naan. ³ Mǝbi shang gǝkǝn langship amu mou, a muop wu gǝ mǝ lat baan hǝ dat mǝ naa kam. ⁴ Nǝ muop, long gǝyil nhǝ vughum yit bǝzung muop gwe. A waa nnyi, muop me ɓoot npe naa pee wusaam nung langship nɗǝgǝn yoon Kristo, wu nyi kabi Naan hǝ mou. ⁵ Bii mǝ shak a ɓǝlǝp kaa sun mou, a ɓǝlǝp Yesu Kristo wu nyi a miskagam hǝ, mǝn kuram agu nsa sǝm Yesu. ⁶ Nsa a Naan dok laa yen, "Pee ya gǝ saam nɗǝgǝn kuwoo." Nyi saampee gwe nbǝzung mu ɗe war mǝ kat bi-man nɗǝgǝn yoon Naan yi ntagam Yesu Kristo. ⁷ Mǝn gǝ biilong nhǝ a tugul wan, a waa nyi kamshik wugagam a nung Naan; a nǝmuun mou. ⁸ Mǝn fu kat tǝgǝrchiin gǝwar dǝɗyak-dǝɗyak, mǝn mǝ lap ma duk mou. Mǝn gǝnaar dat yir, mǝn mǝ nyit mou. ⁹ Muop fu twang mǝn, mǝn Naan nyang mǝn mou. Mǝ nas mǝn, mǝn mǝ ɗem mou. ¹⁰ Mǝ mwaanɗok gǝ muut Yesu nshik mu ɗe war gu kat nooklang Yesu yi nshik gu. ¹¹ Mǝ wu mǝn nkagam hǝh, mǝ waanɗok gǝ muut Yesu nshik mu ɗe war nooklang Yesu nnying yi nshik mu. ¹² Muut nyi fu ɓǝlang gǝmǝn ɗǝh gun a nooklang fu ɓǝlang gǝgun. ¹³ Mǝn dip gǝ mǝrip mwǝn naduk kabi mǝ yil ɗen hǝ: "A mwǝn naduk men a laa ɓǝlǝp." Mǝn zak mǝ mwǝn naduk mǝn mǝ laa ɓǝlǝp. ¹⁴ Mǝ man nkwǝt nyi wu ep Yesu gǝ ap mǝn zak gǝpe gǝme gǝnyi Yesu. Mǝ man nkwǝt gǝ mwaan gǝ mǝn nau gǝgun ntagam muup. ¹⁵ Jepe nhǝ dip a npe gu, ɗe war chinɗong kat gurum yi gwet mǝn mǝ nyin tookpya kaam yi nɗǝgǝn yoon Naan. ¹⁶ A waa nnyi mǝ kwak mu waam mou. Gurum mǝ nnaa mǝn shi yit ɓǝ mǝ kat mǝn fu waklat, ɗe a nɗǝgǝn ɓǝ mǝrip fu mwǝn kagam wufuo n-mǝn shibit-shibit. ¹⁷ Tǝgǝrchiin wu gǝɗet hǝ a wuchom, nyi a fu chin mǝn npe yoon wu gǝgwoo, wu ma kok kang. ¹⁸ Mǝn fu kang a bii wu gǝme naa shi yit mou, mǝn fu kang a bii wu gǝsok hǝ. Jepe wu gǝ mǝ naa shi yit gǝ lat-lat, jepe wu waa kot dǝr Naan hǝ gǝ lat-lat mou.