¹ A mǝn gǝ mǝ chin mǝ saam sǝm sun a? Mǝ tangkkop biiyil-lep dǝr gu npe gu kabi nung pak gurum mou. Ko a kam mou yi? ² Gun gǝ kaasuk a biiyil-lep yaafu amu, mǝ yil gwe shi bǝzung mu, gurum mǝ man nsa mǝ bil. ³ Gu nyin nkwǝt gun a biiyil-lep wu tong dǝr Kristo wu lep gǝnyi nmǝn. Dok mǝ yil a shi am mou, mǝ yil a shi Mǝrip Naan wu gǝ nooklang. Dok mǝ yil a kǝ klap pang mou, mǝ yil a gǝ klap bǝzung gurum. ⁴ Wudung a tughurkagam wu mǝn genyi nɗǝgǝn Yesu ntagam Naan hǝ. ⁵ Mǝ ɓoot pe chin mǝbi wu gǝ tong nwul ɗǝr mu mou. Kagam amu tong a der Naan. ⁶ A Naan yak men me wak jep tugat nnung ɓǝlǝp-laɗen wufwoo. Ɓǝlǝp-laɗen nanyi a nung wu ǝk biiyil mou, a nung Mǝrip. Wu ǝk biiyil gǝ tǝh gurum, Mǝrip gǝ mwǝn nooklang. ⁷ Gǝɗet hǝ ɓǝlang wu gǝ wul gǝ muut (wu mǝ yil nyi a kǝ pang) hǝ dok wul nɗǝgǝn yoon ba gurum Izraila muop mǝ ɓoot fu naa Musa shi yit du mou. A waa nsa dok wul gǝ yoon, yoon nanyi dok nyi fu ling. ⁸ Dǝh wu nanyi nkwǝt kam, ɓǝ ɗe ɓǝlang mǝrip gǝ kot a na? ⁹ Ɗe ɓǝlang wu gǝ lat baan nkwǝt gǝ yoon kam ɓǝh yoon ɓǝlang wukǝr gǝ ma wu nanyi. ¹⁰ Bii wudok nyi gǝ yoon hǝ kut nyi gǝ yoon gǝɗet hǝ zak mou, nsa wu ma nyi wul. ¹¹ Ɗe bii wu gǝɗel hǝ nkwǝt gǝ yoon kam, ɓǝ bii wu nǝ gǝ nɗel hǝ gǝ kot gǝ yoon wu ma nyi. ¹² Ɗǝ mǝ kot gǝ tughurduan kam hǝ ɓǝ gǝ mǝ yigil lugut mǝbi mou. ¹³ Mǝn a kabi Musa mou, dok ogot yit shi byaat yong jep Izraila mǝ n-naa dar shi wudok yoon nanyi npe lat hǝ. ¹⁴ Dok mǝ aghat bǝzung muop. Byaat wudok ogot yit Musa hǝh kutnyi chinyi nɗǝgǝn bi-laden wu sǝgǝr. Mat mǝ shang vak gǝnyi duk mou nsa gǝ mǝ vak gǝnyi a nɗǝgǝn Kristo dat. ¹⁵ Chinyi pee wu mǝ bil ɓǝlǝp kǝ Musa ɓǝ byaat ¹⁶ nanyi dughur bǝzung mou. Ɗǝ mǝgwu nbat waaji dǝr miskagam Yesu ɓǝh lǝrpǝn nanyi yagal. ¹⁷ Gǝɗet sǝ Miskagam a nyi a Mǝrip nanyi. Pee wu Mǝrip nnǝgǝn ɓǝ shangshik nnegen. ¹⁸ Gǝɗet hǝ, mǝ shang mǝbi kǝ yit mu mou, bii mǝ naa yoon Miskagam. Mǝ bat mǝn mǝ wak kabi nyi nɗǝgǝn yoon wu gǝma-gǝma hǝ, kabi wu tong dǝr Miskagam wu nyi a Mǝrip hǝ.