¹ A mang nbǝzung nǝ nkwǝt a wul dǝr gu shizak nɗǝgǝn muutla nhǝh mou. ² Ɗeh a shen muutla ngun ɓǝh a wuɗa gǝ pya took nǝ nyang nkwǝt a gun wu a dam took gu nanyi yi? ³ A ran kabi wudok hǝh nsa ɗǝh a wul dǝr gu ɓǝh ɗong ɗyin muop wu gǝ mǝ pya took nǝ hǝh mǝ ndam took nǝ mou. Tugur nǝ kagam nkwǝt gun gǝ tookpya kat nǝmaan hǝh. ⁴ Dok a ran ngun a nɗǝgǝn tǝgǝrchiin wu swet, gǝ bǝzung dam gǝ namwaa gwet n-yit nǝ. Dok a ɗemkop a dam took gu mou. A tangkop gu man nkwǝt a ɗem gun swet. ⁵ Mǝgwu nchin ɓǝlǝp dam-took, ɓǝh chin a n-an dat mou (a ɗemkop a laa dogol mou), chin a ngun dip. ⁶ Gurum gwet mǝ lǝ nogol gwe nnyi; lang kam. ⁷ Gǝdet sǝ gu nogol nyi shizak mou, gu nyit nyi, mǝn gu zwaan nyi. Gu chin kam yi ba weel nma gǝkagam muup. ⁸ A waa nnyi an fu kwas kwak gu ɗǝh gu nying ɗempe gǝgu yi nnyi gǝtal. ⁹ A nsa nyi, dok a ran ngun ɗeh war a katshii gu, ɗǝh a man kot gun a kǝlǝngpe nɗǝgǝn jepe nau oh. ¹⁰ Ɗǝh gu takbak shi wubis mǝgwu ɓǝh an zak a takbak nnyi. Ɗǝh a takbak (kan a takbak nmǝbi) ɓǝh a takbak a gǝfu gu ¹¹ ntagam Kristo. Mǝ chin kam nsa Shetan yi chis mǝn. Nsa en ɓǝlǝp-chan gǝfe lan mǝn mou. ¹² Naan dok ep war n-an gǝfǝr Trowas ɗeh war a shakɓǝlǝp langship Kristo yi nnǝgǝn. ¹³ Nau gǝ kam, dok a kat tookpya nnǝgǝn mou nsa emnǝgǝn nǝ Taitus dok nyi nnǝgǝn mou. Lat mǝn a nyit muop a waa dǝr Masidoniya. ¹⁴ Mǝn a ɗǝkyil nNaan wu bii lang tagam mu nɗǝgǝn sǝm Kristo ɗǝh mǝ mang yoon yi. Bii shap taghas manpe gǝfe dip a shimu. ¹⁵ A mǝn a taghas wuret nung Kristo dǝr Naan, gǝnaar muop wu mǝ kat angkaa gǝ muop wu mǝ lat baan hǝh. ¹⁶ Dǝr muop wu npe lat baan hǝh, a taghas muut wu tong dǝr muut. Dǝr muop wu mǝ angkaa muop hǝh a taghas nooklang wu tong dǝr nooklang. A wuɗah mak npe kat jepe muop nhǝh yi? ¹⁷ Mǝn a kabi gurum mǝ sarap gǝ ɓǝlǝp Naan npe kopgǝshi mou. Gǝ bǝzung mu gǝme, mǝ laa ɓǝlǝp nɗǝgǝn sǝm Kristo ntagam Naan, nsa a nyi Naan lep mǝn.