¹ An Bulus wu Naan ɗem an a lalep Yesu Kristo, a yil n-emnǝgǝn mu Timoti, gǝ gǝwur gurum Naan gǝyil Korinti, gǝ gurum Naan muop dau ngan gǝyil Akaya. ² Mang chinɗong gǝ tugat chagap Ndamu Naan gǝ Yesu Kristo lang gǝgun dip. ³ Mang Naan, Nda Yesu Kristo kat tǝgǝr. A nyi a nda wu naa chigir kǝ pee gǝ Naan wu zwaan gurum dau. ⁴ Naan bii zwaan mǝn nɗǝgǝn natwangang gǝmu ɗeh war mǝn zak mǝ zwaan gurum muop wu nɗǝgǝn natwangang yi. Bii mǝ zwaan gurum muop a shi zwaanpe wu Naan zwaan mǝn gǝnyi hǝh ⁵ Kristo sua tǝgǝrchiin a nsa mǝn, mǝn zak mǝ kat zwaanpe a nsa Kristo. ⁶ Ɗǝh mǝn mǝ kat tǝgǝrchiin ɓǝh a npe gun gu kat angkaa yi; ɗǝh mǝn mǝ kat zwaanpe ɓǝh a npe gun gu kat zwaanpe yi zak. ⁷ Ɗǝh gu zwat tǝgǝrchiin kabi nǝmuun hǝh ɓǝh zwaanpe gǝgu pǝt n-yit. Mǝ ɗǝk enmu kaa gu gwet nsa mǝ man nkwǝt kabi wu gun fu sua tǝgǝrchiin gǝpe gǝme gǝ mǝn hǝh, guu kat zwaanpe zak gǝpe gǝme gǝ mǝn. ⁸ Mǝjepnǝgǝnmu muop, mǝ ɗemkop mǝbi lan gun gǝkaa natwangang wu mǝ kat gǝyil Asiya mou. Tǝgǝrchiin dok nee mǝn ba tugat gǝyil mak mǝn. ⁹ Dok mǝ gap sheep ɗǝm nmǝn. Lat kam mǝn mǝ ɗǝk en mu shi kagam sun mou, mǝ ɗǝk en mu a kaa Naan wu gǝ apa mǝdiɗǝm hǝh. ¹⁰ A nyi dok pǝt gǝ mǝn nfu ɗem, gǝ chin npǝt gǝ mǝn. Mǝn gǝ tugurkagam nkwǝt gǝ chin npǝt gǝ mǝn shizak. ¹¹ Ɗǝh gu tǝpɓǝt mu gǝ ɗangpe ɓǝh Naan gǝ chin kam hǝh. Nkot kam ɓǝh gurum gwet gǝ mǝ ɗǝkyil nnaa Naan yi gǝ chinɗong wu kat mǝn nsa ɗangpe gurum gwet. ¹² Mǝn fu nyaap sun a shi twamshik bii wu nbǝzung mu. Nsa mǝ mwaan ɗok gǝyil gǝ naduk gǝ took mu gǝme ntagam Naan. Mǝ chin a kam gǝnaar shi chinɗong Naan, mǝ chin a shi soon gǝyil mou. ¹³ Mǝ ran mǝbi wu gu ɗyam-a-shik; a bii wu gu ma gun nbil mou. A ɗen en nǝ nkwǝt ¹⁴ kabi wu gu ɗyam shi pak jepe gǝmu hǝh, par gu nyaap su a shimu par ɓit ndamu Yesu, kabi wu mǝn zak par gǝ mǝ nyaap sun a shi gu hǝh. ¹⁵ Dok a ɗemkop a wul dǝr gu ɗǝng nsa tugur nǝ kagam kǝ ɓǝlǝp nanyi, ɗeh war gu kat kopgǝshi wul gǝnǝ vel yi. ¹⁶ Dok a ɗemkop a pǝt dǝr mwaan nMasidoniya ɓǝh a lem dǝr gu. Ɗǝh a nyit Masidoniya ɓǝh waaji chin a lem dǝr gu ɗeh war gu takdǝr nǝ yi gǝwaar Yahudiya. ¹⁷ Ɗeh dok an fu ɗyee kam ɓǝh an a fu ntankaa? Kan gǝ a chan jepe a kǝ en ɗyee gurum ɗǝh a yen "Ɛu, ǝu" ɓǝh bǝn a chin a yen "hayǝu, hayǝu" dip a? ¹⁸ Kabi wu Naan a wu naduk hǝh, gǝ mǝ yen "ǝu" bǝn chin mǝ yen "hayǝu" nau mou. ¹⁹ Nsa Yesu Laa Naan wudung Silvanus gǝ Timoti mǝ shakɓǝlǝp gǝfe ngun hǝh, nyi a "ǝu" gǝ "hayǝu" mou. Nyi a "ǝu" dat veet. ²⁰ Nsa ɓǝlǝp-laden nung Naan dip a "ǝu" dat. A waa nnyi bii mǝ lap mǝ yen "Mǝ ɗem a nyi" yi gǝ yoon Naan. ²¹ Gǝdet sǝ a Naan kwas mǝn nɗǝgǝn Kristo mǝn lep mǝn. ²² A nyi sǝp vung muup kaa mu mǝn mwǝn Mǝrip nbǝzung mu, a nyi a fukyep bii wu shee nmǝn mǝn hǝh. ²³ A yong Naan tuamshik yi n-an nkwǝt a nyang wul NKorinti a npe ɗǝh a pǝn gun yi. ²⁴ Mǝ chin kam a dǝr ɗǝh mǝ chin klǝng yi gǝ mwǝn naduk gǝgu mou. Mǝn fu ɓǝlang gǝgun a dǝř tookpya gǝgu, kabi wu gu ɗyam gwe nɗǝgǝn mwǝn naduk gǝgu hǝh.