¹ Kpe bodo ngho, aba gbeb nkpele ngor ugbangha aya. Fefene igorm na feb iba sheber kak, aba yel ngor ugbang ji bemeor ngol, igom ane wa iyeme ngho igbongho aya. ² Aba kpele bor abodo feb ngor ngan, ngor nkpele ye, nayor ayolor bongkabor. ³ Rangha atong, ntaga igbe bala ba jok nogor, aji ta amogote nyandege. ⁴ Na ayolor yor ta, nyandege ikpolor ngor mbarr, arok iba kpo li. ⁵ Amogor te nyandege igbor ngor idi atal ngor idi ika fonor ndege gbugbok. Idulodulor na imeror jok, tep ne na ndege ka jolor. ⁶ Ngha na njol jolor, ate fornor fonor iba wodoh tep nenan mbor kpem arok, iwangha waa. ⁷ Amogor nyandege igbolor ngor ajongho, ajonghor ye ifu ba jumbor, imam kpe fu lame ite. ⁸ Amogor ite nyagor igbolor ngor itentenghe ndege, iba lame ite ifulor, fenghe tungho amogor mkpel ngo itel ne igol, atil-ara, jolfefene atil aron". ⁹ Ngha aba bong, "ne nyor kpelor atong yuyok ayok!" ¹⁰ Igara nti Jesu jolor nenteng, mbor mba ijolor kuleh ne igol ne anebe abal, iba beber gum igan nti aber top. ¹¹ Aba bong nebor, ka wun, ibe rebe irenghe ka ikun iborr Ishor, ngha ka mba ireror ngor idi kpol, ijom nji ndege ndege iba jolor ngor ngan. ¹² Iyornji, mbor ye bre, Ay mbor ba bre, mbor nem mayen iyor nji mbor yogor Ay, mbor yok, mbor nem mba renghe, ikajolor yangha ibeneh Ishor babor bageh abebeh. ¹³ Aba bong nebor, "Nyim na igan ta ijogor? Nanor wun mal ba renghe igan yagor waa? ¹⁴ Nta ntaga amogor iteh tala ilom. ¹⁵ Nyan ndege igbolor ngor mbarr, ngor idi ilom ibe ta. Igara nti mbor yogor nim ngho idulidulor ba, tap tum ilom nti ibe ta ngho ngobji bor. ¹⁶ Ngha amogor teh nya ngor ndege atal, mbor ba igaranti mbor ye yok alom, idulidulor kor ne igereh. Fefene mbor kpem arok ka iji bor. ¹⁷ Mbor nara nterr ngor iket, igara ba jol nti akanya ne iboro nyongho ba jok tep ne ulom, ngho idulidulor mbor ba gbor jok. ¹⁸ Kpe bodo, nya gor igbolor ngor ajongho,mbor mba ireror ane mba iyogor ilom. ¹⁹ Ngha ba shor sholor, nfam ne nshumor tugor ngor inop ne ngor ntobor ka abodo nyagor nya iyor ba ngor ilom, iwedka inem kpe tunghor. ²⁰ Ngangho nya mbor talor ngor innonop ndege, mbor ba ireror ane mba ibe yok ilom, tama ilom fonor fenghe tungho amogor, itil-ne-igol, atil-ara, jol atil-aron ishenghe jol shong nor. ²¹ Jesu bong nebor, "Ayogor imolorba ngha atong itaba , nogor aba kak gor itetere afe ngor ala-ibedi?Akolor ba ga ateng ka konor ngho ite itrekang fonor. ²² Tep ne ijom jom ngor ilom nji ibe shele iji ane iti ba nyege fefene ijom jom ji iba shele, idi rebe gbol wa irem. ²³ Jolor ne we nji ndege ndege kpelor atong nogor ayok!" ²⁴ Aba bong nebor kono won nterr ngor ijom nji wun be yok tep ne nan, na aganor ka ane noyor mbor ba gana ka-e. Fefene, idol ikpe yaba bodo. ²⁵ Tep nenan ne yor kpelor ikpe yele bodo. Fefene nenyor ka kpelor, jol nji akpelor iyebe tumor shaga. ²⁶ Akpe ba bong ikun iborr irena nenom nyor talor annote ngor ndege. ²⁷ Ayor nongho ne tu lal fenghe nyeme ne jol, fefene amote imerr fenghe fu ngha akunum na ijolor. ²⁸ Ndege yor tunghor amogor neting, ngor ngbombarr iyana, ngor uton, ngor ite nji ibe fu ngor atong. ²⁹ Igara nti abodo nya atalor ibe bel ngho idulidulor aba tom nglidor nyor montumor tep ne nan igara nkpaga ibe ri. ³⁰ Nkpe bodo aba bong, ngor bajom umal ba kogor kor, kor nfongho ngor ikun iborr Ishor afi na igan uba kogor kor toror gara? ³¹ Irena mogor te nyi galor sher, nyi ngor igara nti mbor be ta ashele shenghe amote waa ngha ndege. ³² Jol ijolor atale amerr, ba fu shenghe ate waa nya iyemor igbe, fefene yor fon agboro abobor, iyorji arok ngor iborr imal ba leme atek bor ngho idi narr je. ³³ Ne ngan nyi ngha na feb aba bong ilom kabor, ngha reka na mbor mal ba irenghe, ³⁴ fefene ategem bong nebor tum igan shaga, ngor igara nti ajolor nenteng, aba rebe ijom nji ndegendege ka ba tuntulor be. ³⁵ Ngho ufonfo mbor, igara ti igorr, iba ba, aba bong nebor, "utom wun ngor ugbangha mbugor." ³⁶ Ngho mbor ba tum igom ane shaga tum ne Jesu jol na ajolor yel ngor ugbang, ifonor agbang nyagor nya utumor ngho igara ntor. ³⁷ Ngho igara ntor ishshap nfeng ba jok alep nyor ba kum iyele ngor ugbang. Tep ne ugbang fonor iyol kumor iroro ne alep. ³⁸ Ngha Jesu fonor yobor ngor ateng yor lal ngor ite bebeme, mbor ba yeme yor bong, "Nkpelenkpele, wor anumor tobor gara na wurr uyagor kpor?" ³⁹ Atum yeme, ba shede nfeng fonor, fenghe bong ne aya "tere, yeme idi njring." Ifefe iba yaga abor, idi wa iba nara. ⁴⁰ Ngha aba bong ne bor, "nan iwedor wun me be?" Wun tegem kpe ntama?" ⁴¹ Mbor ror ne igboro ubol, ba bong ne atem, "ngha ntega nyonor ngha? tep ne nan jol ifefe ne aya iyor kage?"