¹ Aneb ikorr, tep na ukpelor ukono ayor, nor uroe ijibreh ngor abebe reh waa nya gor ngobji ne ufu. Nor ukam inonob ngor ubol Ishor. ² Lem iyaga ka wurr! uka lem neneh ibebe, uka rongho nendege-dege afi tap iyaga nendege-dege. ³ Nor nkum bong na irem nor nrongho wun, tep ne mbongho iyoga-iyogo meneh wun yorp wurr ntem, nor ukpor idi jreng fenghe nene idi-jreng. ⁴ Mkpe igboro ukono nterr ka wun, fenghe fon igboro ngaba gum wun. Meh mbu rorr ne nyamitem. Mkpe uyebitem dole jol gor akanya waa. ^{7 5} gara nti ubalor gor Macedonnia, ngobji yreh fonim uregeh asheh. Ikukulor-ji ufonor alam ngor mbarr yende-dege ne alam ngor idi gbole ne ubol ngor ateng. ⁶ Fufene Ishor, weh yor kak ane-mbaga ndege nyamitem, kak wurr nyamitem ngor mbagah Titus. ⁷ Ijolim mbaga ye nenting iwedor ka Ishor kalor wurr nyamitem. Ijolor fufene jeng ngor nyamitem nyi Titus fonor ngor idi jeneh. Ataga wurr gum igboro ikorr tineh, imork tineh, ne ikorr tineh ka meh. Tep nenor item iyebe meh jeng shaga. ⁸ Jol-ijolor mbeh nyonor yama leme item iyam wun, nimor tobor gum ijome fonor. Mfenghe tobor gum ijome fonor igara nti nyenor na nyenor yama lemor item iyamor wun, ngho, ijolor gor mon ikikibeh igara. ⁹ Ngha tiga mkpe uyebe item, ijolim na wun yenor akanya, fenghe rey na uyam-tem bineh ibeh wedka wun beh tum abebe yene shaga. Wun kpi yene akanya Ishor, fufene akanya yeneh ka wurr inimba tana. ¹⁰ Tep ne imork Ishor iyor gor nyangha gor abebe ba inyor nogor ba jolor tifon ntobor fenghe njim-jim akanya mfam, jol-ijolor nor, iyor kor iku ba. ¹¹ Breh igboro ntama nti akanya Ishor ibeh lem ngor idi jeneh. Ba igboro ntama wun fonor ji ilemor wun na wun ka nyilor ijom-jome. Na nor uyam-tem bineh ijolor, ubol bineh, na wun yolor yor cheb, ikor tineh ne nchebe yeneh nor wun yen na abaga iba jolor kpeh-kpeh! Ngor ijome njen-den-dege nji wun beh tep ijibineh na wun ka njilor ijome-jome ngha ilam nta. ¹² Ntege yonor tugor wun, nyonim tep ne ba leme abebe, afi ka nenyor meh yene akanya ibebe, ijolor nor inyor-ji inonob jeneh ka wurr iba jolor nyige ka wun ngor amerr Ishor. ¹³ Ijengho ngha yor ube fonor atunor. Kpeh bodo ne nyamitem yreh, uyor fenghe fon uyebitem dole tep ne uyebe item Titus, tep ne ufu beh ijolor mfemfe ka wun waa. ¹⁴ Fufene, jolor nkolor wun yor gaba ka-eh, nimba gbogor ntorn. Ngor mkpa nyentege, jol na ijome njenden-dege nji ubongho ka wun ijolor itembaga, ngaba yreh gum wun ka Titus tebe itembaga. ¹⁵ Ikorr teh ka wun ifulor na aboror gum nkaga yeneh waa, na wun feleh ngor ubol ne urebe-ala. ¹⁶ Item imeh yebe tep ne mkpe ukono nterr ka wun gbugbul.