¹ Impa, nolii imbe ba bheisi a meeme'a bato a toleli a kolane na bato a suba mobili nda Mokonga, ngaa ba hangiane boembo angaya na boembo a lolia la budjede. ² Imbe anga toa bubilia la bande ndaga ba ubha na bande dhaga ba bungi, ngaama elema-li ande go inde ba bhuili. ³ Na ngaa lindo naande ngaa elema ndo-wa aangisa adhusa boembo a budjede indae iye mene, bia inda bato-li. ⁴ Ndaga be imbe anga ebeisila boumu nde, naa ndaga te Mokonga a nkogi, bia nde aya iki Aruni. ⁵ Na Klisto indai aebeisili ebhebho adjala nolii mati, iyu goe abeisa nde ainde imbo atangodei: Onde nami, Neti neoboti ndiende! ⁶ Sinda nde a yongi nee a mpuo linda ngboo: Onde nolii esua-li bhuu, sinda toli nda Melchisedek. ⁷ Ande iye imbe, a ngobho'ae, ai a hangiani na ntato na boolakelaga anga mbe anga namisa a kua, na bai ba mokanei angaama aya tamba na ntea Mokonga, ⁸ ai a goli, nangelebe ai adji muna Mokonga, asikisa a ema nde ai a nobeli, ⁹ na imbe, tambusa a goba la meisa lae, a dhuma abadja anga bobhu bande bansikisi nkomisi a kalamo a meyo, ¹⁰ Mokonga abaya nsulia djisalae nolii mati kpee sina toli nda Melchisedek. ¹¹ Bena yonga ati inde anga be yonga a ntata indo, na yonga nde a kaligi a tomia-li, ngama bodji bodjodo a oka. ¹² Benu, angeeli ndo, a elie enga bonga bodja ba golisi, boha bokondi go bote bano golise inda mosamosa la yonga la Mokonga, bobhii a nkabo a bande na makanga elea nde ana bosike. ¹³ Che, imbe anoa mbande inda ubha kpee yonga la domi; ngaama ande nia mbedje. ¹⁴ Che elea nde a kandigi ande inda bato nde bamoti, angaa bande ekongo'abo a kolani a ema la ubha adja na inda djede.