¹ Ai a meeme'a bato-li batomi mbino'a mbea, na ba golisi badjede ama ba ika anganu, bande bauma ba ngisa kanisa adjede, na koma la Mokonga nde ai aelamisi, bauma ba eholela gua. ² Bato bati ama ba ebaemea a bunga labo, na ahela domi-li ama udjuana angaa bo. ³ Angaa budjede, ama ba teisila anganu asuba yonga la mbea, ibo bande ba koma toa la budjede na hela labo aa mpiti'abo. ⁴ Ngaa, sinde Mokonga ndaga ae yongeli ba mangese nde bai ba koli budjede na ab ai aekobha asuba kubhu na ba bo ndeli ekale nda Mokonga; ⁵ sinde ndagaya yongeli leengo nda kala, na aba anamisa Noa, iye imbe ai nde maa lalo, a tomiala mbino'a domi, esande aya loisi mbua a leengo nde aya kombi; ⁶ aba naya kalei na sumba la Sodomo na Gomola, hangiana la sinda ''mofano'' anga bande badje nde ama ba bhia, ⁷ na abe aya namisi Loti imbe aya tonganani, iye mbe meema ae aya udjuani ngaa budjede nda bato nde ndaya batonganani, ⁸ (ngaa n'to la domi nde, imbe aya iki meeme abo, inde aya udjisa meema ae kele elie ai inde aya ona au na na okalau toa langa budjede a ola nde aya bo kola); ⁹ Mokama aubha tusala a yonga bande batonganani, na mbisila la bande badjede ekale elie la ''ukumu''-li, ¹⁰ bande ba tamba isnde nde ngobo abo ae ''tuma'' nee asuba budjede na ndaga ba sikisi imde mati. Bande bakola inda meema bo ibo'a mene na bookumba, inda bana boo hotagala bato nde N'konga, ¹¹ nengeebo ba mangese-li, ba kala kpee, ndaga ba ''tukana'' ebhebhi nda Mokama. ¹² Che bande, ba iki nde ote bande inda bana maako, bande ba boteani bia banyama nde ba edhungi na bungisa labo, na hota la yonga nde ndaga baubha, ama ba hela ngaa ketulilo ndabo, ¹³ bauma bonoba angama bai baenobisi banggoo. Badjangea kola la budjede a bosebose ndabo nda djede etonge; kida labo a kebu ndanu abhisa soni na nkutunkutu ati ndambi nde badjangea yonga ndabo inde bhobho. ¹⁴ Bana iso nde atumi na eteti, bato nde ndaga batoa doa la budjede; bande ba bombiaga meema nde ndaga adja, bande iso abo a tumi na bosebose, bande bani'a njomo. ¹⁵ Mbusa doa la ahe ndadja, babungi na ba baemea ahe nda Balama, muna Boeri, imbe aya kondi moosolo a budjede. ¹⁶ che aya bankalei a budjede ndae: mii a ponda imbe nda yonga, aba yonga molenge'a n'to, aba meisa egesila la mubhilili-li. ¹⁷ Bato ndo bande sinda ''visima'' nde ndana ibo, ebundu nde moheo abeisa: bande bai bae bhisili elie. ¹⁸ Ngaa yonga la boobhebhaga, a bosebose la ngobho abo, bato nde ba oloi toa langa bato nde ba iki asuba budjede; ¹⁹ bae beela '' uhuru'', mbeno nde ibo baamene bande bakobe a budjede, ngaa kela n'to ande mokobe a inde a kola. ²⁰ Impa tambusa toa la budjede inda na leengo, ubha la Mokama na Namisi Yeso Klisto, aba basianago mbusa, ngebe abo adjigo adjede kpee sinde nde bai ne. ²¹ Nai bela ba iki amakanga ubha la tonganana, che ba toi a domi-li, tambusa ubha-li, maano adja na abhu inde bai ne. ²² Akidi angabo inde egombo moti ayona: mboa-li a silii boloi ndae, na ngea nde atu aesosi asiani a boolimbialaga la dodo.