¹ Simoni Petelo, mokobe na n'tetea nde ma Yeso Klisto, anga bobhu bande baibabeisi ndelo a lebea nde an'esombi imoti na ndasu, angaa singanisa nde Mokonga na Namisi nde masu Yeso Klisto ai ba asopi: ² Lokoo na djedje abe ati anganu aubha la Mokonga na Yeso Mokama nde masu! ³ Aekandalae inda na kobha aasopa bhulubhu inde ngebea'su a laeli au, na dhungila la sikisa, asuba ubha la mbe ai ayasokogi a bhebhalae iyi mene na lokoo ndae, ⁴ naando wasoubhisa sinde aaye meno asopi beela anja na ati kpee inde aano hangiana sinde nde bootii bato nde bana kobha, a teala lea la ketulilo nda na leengo inde aanga hobela anganu, angaa bosebose nda djede, ⁵ na ngaa indo, bobe na mohuo a talea la lebea ndanu bonja, a bonja ndanu ubha, ⁶ a ubha ndanu boolombolia, a boolombolia ndanu midila la meema, a midila la meema ndanu ngomi, ⁷ a ngomi ndanu ekondani etoba, ekondani etoba ndanu ekondani. ⁸ Ngaama ema nde bhulibhu naye aiki asubanu, na naye akanyi asubanu, aba aano toisisa kola la mobili na bota la maya, aubha la Mokama nde masu Yeso Klisto. ⁹ Che imbe ndaga na ema nde bhu asubaae ande bhuuma, indaga alenga enda(dholo), na ameno aboseli sinde budjede ndae aaye meno asi. ¹⁰ Na ngaa indo bandami, sinde nde Mokonga aaye meno aano somboli na koga lanu, bobe na mohuo kpee a kola la mobili ndae; naye bokoli bo, ndaanga bo ongbua neede. ¹¹ Ngaa naye bokoli bo, mpume eboame nda meyo nda Mokama na Namisi Yeso Klisto aba uma aeukua anganu. ¹² Na ngaa indo nebaemea kanisi la lanu yonga nde esali bhu, nangee ama ye meno bo ubhi domi nde bo dhungili. ¹³ Na nelenga sinde ande mobili, angami djudjusa lanu na kanisila lanu yonga nde bhulibhu ndambi nde neha asuba ngebe. ¹⁴ Ngaama neubha sinde elie ede nedhoa nkeke'a a kua nde, sinde Mokama nde masu Yeso Klisto aya mohangiani domi domi. ¹⁵ Ne uma nekola na kalami bhu ngaa botiga uma na bo kanisa mbusa a kua lami. ¹⁶ Inda ga nde ngaa okanea la yonga nde bakolomisi, sina gani, maibhe, ebeya che ngaa hangiana lanu ekanda na bhiala Mokama nde masu Yeso Klisto, ande sinde bei beoni au na iso asu besu baamene. ¹⁷ Ngaam'abeisi toa la nga Mokonga boumu n'ebhebho, esande ebhebho anja toa la na kobha inde ai a yongi ate: Imbe nde Nii ekondi nde mamo imbe nekondi kpee. ¹⁸ Na bei beoki anda molenge nde toa la na kobha, esande bei naaye a n'tata na mamba. ¹⁹ Na be dhungili yonga la domi nde ngaa ande nda baubhilili, bokola hele aokanea-li, sind'ebhela nde a lola elie, kidal'esala mani na lelengoa nde maa uma uma ame asuba meema nu; ²⁰ na boubha mbee benu baa mene sinde nde ndaga beyonga inda baubhilili toa la nsao nd'abhu indaga dja yonga la tekateka, ²¹ angaa ndaga nde sinde nde bato ba kondi inde ayangisa baubhilili-li babhie, che ai nde ngaa kala a Meema dh'Abhu angise bato-li ai ba yongi inde atoa anga Mokonga.