Hesu mynguera pẽnte kuimbai vatamba vekua ¹ Hesu jupi pẽnte kanoaperã yy hyvaisho kyty hasarã, vãhẽ oho tẽnta Cafernaumpe hai iko i vekuape. Hesu jupi pẽnte kanoaperã yy hyvaisho kyty hasarã, vãhẽ oho ² Haipe veruashu hupa ryheve pẽnte kuimbai vatambava; Hesu heshama ko kuaretare jyrojaherã, heishu kuimbai hasy ia: “-Yrẽĩ shy ray, mbai porãmba rijapo vekua hejaha reima ndyhevi.” ³ Haipe Moise mbypara vekua pyrỹmboi'iheare hei ijupe reta: "Ko kuimbai rãnga ĩnjeta porãhe Ñanderu Tumpa." ⁴ Hesu kuaa mbaivara hei jyre pyaperã, heishu reta: Mãrã'ĩrãra mbai porãmba pyndy pyape pyre? ⁵ Mbaivara javaĩã jaishu ko kuimbai: "Mbai porãmba rijapo vekua hejaha reima ndyhevi" Ti jaira poshu: "Pũã, hãrã vata." ⁶ Aheshakapo pee, she Kuareta tay rãĩmi ai vekua ko yvy ĩãrẽ, ĩmẽ'are mbaikatu ahejarei pyndyhevi verã mbai porãmba pijapova ko yvy ĩãrẽ. Haipe heishu kuimbai vatamba'ia: “Pũã. Hupi ndurupa, ekuajy nyrẽntape. ⁷ Haipe kuimbai vatamba ia pũãrã ohojy hẽntape. ⁸ Hãrã kuaretare hesha kovarã kyje, hãrã omombaishu Ñanderu Tumpa mẽẽshurã rehe mbaikatu kuaretare. Hesu hẽno Mateo ⁹ Hesu oho haivirã hesha pẽnte kuimbai Mateo he'iashua, kyrypoti mbatyhasea Roma pevãrã hyvache vapy õ. Hãrã heishu: “Ei shimĩ'ĩrũ.” Haipe Mateo pũãrã oho hãndi. ¹⁰ Mateo hẽntape Hesu hareka mboireare karu ñynõĩ verã. Hãrã haipe jyveru jyve karu hãndi verãre, kyrypoti mbatyse iare Roma pevarã, hareka heta mbai porãmba japo iare. ¹¹ Fariseore vokava hesharã pyrãndushu Hesu mboireare: Mãrã'ĩrãra pynymboi ia vapy hãndi kyrypoti mbatyse iare, hareka mbai porãmba japo iare karu hãndi? ¹² Hesu hẽndu Fariseore heivarã heishu: Mambaimba ia iko tẽvẽãhe pỹrỹpỹhãno iare; koñẽĩ ñymbairasy i vãĩ rãnga. ¹³ Pekua pikuaa mbaivara he'ise Ñanderu Tumpa ĩñẽẽpe heirã vẽkua: "She rãnga aipota pypareko papishare mymba jukahavaivi." She aĩã ãhẽno heko kavivape, koñẽĩ heko porãmba iare she ãhẽno opa heja verã mbai porãmba japo vekua. ¹⁴ Haipe Juan Bautista mboireare ou Hesu ẽvãpe, hãrã pyrãndushu: “Ore hareka Fariseore karumbape ikoha. Mãrã'ĩrãra rỹmboireare japoã hai reta?” ¹⁵ Hesu heishu reta: Pimoãrapo õmendaha õpe ĩmẽ õre vy ãã ñynõĩ, temerã ẽ teri hãndi retarã? Tẽvã, vãhẽpokui ara ẽ veama ñynõĩ hãndi verã; haiperãmapo karumbape ñynõĩ. ¹⁶ Mba'ety mbyvyvyva mondeava pysevẽ py'ahuva mondeava ndeshivare; shara johearã mantapo py'ahuva mondeava ndeshiva, hãrã tivishavepo mỹndoro. ¹⁷ Hãrã vino py'ahuva mbyhyruhãpo vakapi ndeshivapy; kỹrã japoarã vakapi sororã vino opapo jyvare ijehe; hãrã vino py'ahuva mbyhyrua ñõĩpo vakapi py'ahuvapy, hãmerãpo mõkuevea kỹy nantuhapy. ¹⁸ Hesu ĩnjeta teri ẽshua kuaretare vãhe ou pẽnte Judiore juhuvisha, ĩñesu hỹnonderã heishu: “Shy rajy rãnga kurite mano, tẽvã reho ndepo rĩñono ĩãrẽrã, hykojypo.” ¹⁹ Hãrã Hesu pũãrã oho hipi hareka mboireare hãndi. ²⁰ Hãrã kuaretare mbytepe ẽ pẽnte taupe hasyva tuvy vasuivi, hareka japoma (12) año, hãrã ñymboja Hesu haykueivi mondeva pokohe verã. ²¹ Shara pyapeĩmba hei: "Mondeva rẽĩ apokorã akueramapokui." ²² Hesu jererã, hesha taupe hãrã heishu: -Yrẽi shy rajy, shara riroja rãmẽĩ reho jepe.” Haipevãĩ ko taupe opashi tuvy vasu. ²³ Vãhẽma Hesu mburuvisha hẽntaperã, hesha ñimimby õre, hareka heta jaheo ñynõĩva. ²⁴ Hãrã heishu reta: Opa pẽhẽ koivi! Shara ko kuñatãi ray rãnga manoã, ocheĩ ẽ.” Hãrã haipe kuaretare joje jyre. ²⁵ Tẽvã opama mohẽhã hetava katuaperã, Hesu iche kuñatãi ẽvãperã pysy ipope, haipe kuñatãi ray pũã. ²⁶ Hãrã opaite vokava tẽntaipi kuaaha ko Hesu japova. ²⁷ Hesu õhẽjy haivirã, haykueivi ou mõkue kuareta heshamba kũvãĩpia, sapuke jyveru: Yrypareko mĩnteve David ray! ²⁸ Hãrã Hesu ichema o iperã, vãhẽ jyveru mõkue kuareta heshamba kũvãĩpia, haivi Hesu pyrãndushu reta: Pyrojara she apỹrymynguera verã? Haire heishu: Karai, rojaha rãnga. ²⁹ Hãmã Hesu hesare pokorã heishu: Tiko pee pyrojava rãĩmi. ³⁰ Hãrã hesare opa kueraherã hesha kavijy reta. Hesu hei jyvyĩshu reta: Avy mbava pymbeushukui kova ikova. ³¹ Tẽvã haire haivi õhẽĩ opa mbeushu kuaretare mbaivara Hesu japohe reta. ³² Haire õhẽjymarã, ĩmẽ'ẽ kuaretare veruva Hesu õpe, pẽnte kuimbai ña ẽnguva mbai poshy ĩmere vekua. ³³ Hesu mõhẽshi mbai poshyrã, ña ẽngu ia õñepỹrõ ĩnjeta, hãrã kuaretare haĩrã hesha heijyre: “Mapeã kỹrãva mbai jahesha Israelpe.” ³⁴ Tẽvã Fariseore hei: “Ko kuimbai mbai poshy juhuvisha ñymbaikatu rupii rãnga mohẽ mbai poshyre ³⁵ Hãrã Hesu vata opaite tẽntamire õĩpi, hareka tẽnta vãsu retaipi pyrỹmboihe ñẽẽ kaviva Judiore ñymbaty õpe mbeu Mburuvisha vasurã vate araivi ouva ryheva, hareka mynguera ñymbairasyvare. ³⁶ Hesu heshama kuareta retarã, parekoshu reta, shara haire kangyrã opa ipy reta, avishare ijamba rãĩmi jyre. ³⁷ Haipe Hesu heishu mboireare: “Ãñẽte ñotyãvare hetate õ, tẽvã mynõ iareta mbovỹĩ jyre. ³⁸ Hãrã pirureshu koo ija hareka tymboushu kuaretare mba'apo verãre.