Hesu mỹnguera pẽnte kuimbai hete kuru porãmbava ¹ Hesu vejy jyma yvyturusuivirã, heta kuareta oho haykue. ² Hãrã ou jykoty pẽnte kuimbai hete kuru porãmbava, ĩñesu hỹnonderã, heishu: Karai, pota opa rijohe shyhevirã, johe shyhevi. ³ Haipe Hesu pokohẽrã, heishu: Aipota rãnga, ajohepo ndyhevi! Kỹrã heirã, kuimbai hete kuru porãmba vekua opashi ñymbairasykue. ⁴ Hesu heishu: Avy mbava mbeushukui, ekua ijeshakashu paire, mẽẽkui rymẽẽ verã Ñanderu Tumpape Moise mbypara vekuape heiva rãĩmi mẽ ẽha verã, hãrã paire heshapo reta rykueramava. ⁵ Hesu iche tẽnta Cafarnaumperã, 100 ẽvã syndarore juhuvisha ñymbojahe, jurureshurã hei: ⁶ Karai, kuimbai ajokue'area rãnga shyrẽntape ĩmẽ'ẽ, opa japarã turupape'ẽ ñymbairasyiterã hetajypavete. ⁷ Hesu heishu: Ahapo amynguerakui. ⁸ Tẽvã 100 ẽvã syndarore juhuvisha heishu: Karai, mbavara she, nde riche verã shyrẽntape; ereĩshu kuera verã hãrã ajokue'area kuerapokui. ⁹ She ãĩjyve mburuvishare ipope, hãrã ĩmẽ'ẽjyve shepope syndarore, pẽnteva syndaro “ekua haishurã, vokava oho; ỹngava syndaro haishu “ei kope,” hai oupo; Ajokue'areare haishu pijapo, haire japo. ¹⁰ Hesu kova haĩrã hẽndurã, oho hãndiare heishu: “Ãñẽte hai pee, Israelvare mbytepe aheshã teri ko kuimbai rãĩmi kỹrã jyrojahea Ñanderu Tumpa. ¹¹ Hãrã haijy pee, heta ẽ ou verã kuarasy õhẽãivi, hareka kuarasy icheaivi, hãrã vapypo Abraham, Isaac hareka Jacob, karu vasu hãndi verãre Mburuvisha vasurã ara vateivi ouva; ¹² tẽvã tỹnonde Mburuvisha vasurã ara vateivi ouvape ẽẽtẽ verãre haipe, mohẽapo katuape hareka pỹntuape, haipe jaheopo, hareka hãĩre opapo pururu.” ¹³ Haivi Hesu heishu Centurión: Ekua nyrentape, ryrojava rãĩmi tiko nde. Hãrã haipe vãĩ ko kuimbai jokueharea kuera. ¹⁴ Hesu oho Pedro hẽntape, hãrã haipe hesha Pedro haisho turupape ẽ ñymbairasyrã. ¹⁵ Hãrã Hesu pokohe ipore, haipe opashi mbairasykuerã; puãraveĩ ñyngarekohe. ¹⁶ Hãrã pỹntumapo ia, Hesu õpe veruha heta mbai poshy ĩmẽreare; hãrã Hesu ĩñẽẽpẽi mohẽ mbai poshyre, hareka opa mynguera ñymbairasyva. ¹⁷ Kỹrã jehu, hekope kavi iko verãTumpa ĩñẽẽ mbeu'ia Isaias jykuatia ñẽẽ heiva: "Hai opa heky ñandyhevi ñany kangykue, hareka opa raha ñanymbai rasykue." ¹⁸ Hesu hesha heta kuaretare jatyherã, heishu mboireare mbyhasa verã yy hyvaisho kyty. ¹⁹ Hãrã pẽnte Moise mbypara vekua pyrỹmboi ihea ou Hesu ẽvaperã heishu: Pyrỹmboi'ia, she arĩmĩ'ĩrũpo mãĩpi rehovaipi. ²⁰ Hesu heishu: Avarare ĩmẽre ikua, hãrã vyrare ĩmẽre haity, tẽvã she Kuareta tay rãĩmi ai vekua ko yvy ĩãrẽ, mba'ety are aputuu verãpe. ²¹ Hãrã ĩrũ pẽnte hai mboirea heishu: Sheja, ma ẽĩ shyrehe, taha rani tañoty sheru. ²² Tẽvã Hesu heishu: Ei shimĩ'ĩrũ, ma ẽĩhe manova (Ñanderu Tumpa jyrojamba hea) tiñoty hapisha manovare. ²³ Hesu jupi pẽnte kanoaperã, mboireare oho hãndi. ²⁴ Hãrã sapy ãĩ ñupũã yvytu ñakuava, hareka yyvasu pũã iperetarã kanoape opa icheshu. Tẽvã Hesu ochemba ẽ. ²⁵ Haipe mboireare momba jyreshu Hesu hãrã heishu: Yreja, ỹrỹmondo jepemiteño, opamapo ñaña pyvyĩ! ²⁶ Hesu heishu reta: Mãrã'ĩrãra kỹrãite pykyje? Piroja ãĩtemba terihe Ñanderu Tumpa? Haipe Hesu puãrã ñyngãtashu yvytu ñakua ouva hareka yy poshyva, hãrã opa kuĩrĩri hareka yy poshyva pyta. ²⁷ Mboireare opa kyjerã ĩnjeta ijupi reta: Mãrãvarajy ko kuimbai! Yvytu ñakuava hareka yy poshyva japoshua hai ĩñẽẽ! ²⁸ Hesu vahẽma oho yyvasu hymbeipi, Gadarape õrã, mõkue kuimbai mbai poshy ĩmẽreare õhẽ jyveru tã õvere õviĩrã ñymboja Hesu ẽvãpe, shara poshyite retarã mba'ety hasashi verãre haipi. ²⁹ Mbai poshyre hỹnãtu sapuke jyrerã hei: Mbaivara ripota yryhevi Hesu, Ñanderu Tumpa tay? Reira rivare yryrehe ara ndei teri japyva? ³⁰ Mbyryã haivi heta kushire karu ñynõĩ. ³¹ Hãrã mbai poshyre, heishu Hesu: -Yrymohẽrã ma ẽĩhe ticheapy ko kushire. ³² Hesu heishu reta: Pekua pichepy! Mbai poshyre õhẽshi kuimbairã, jyraha ichepy kushire. Haipe kushire ñani jyraharã opa oapy reta yy haipe opa ñapyvyirã mano. ³³ Kushi ñyngareko ihea retany opa kyjerã, jyrahajy hẽnta kyty, haipe mbeu reta heshava mbaivara jehu hareka mõkue kuimbai mbai poshy ĩmẽre vekuare japoahe. ³⁴ Hãrã kuaretare tẽntape õre jyraha Hesu ẽvãperã, jurureshu reta õhẽ verã haire hẽntaivi.