Avy pimbijiche papisha ¹ Avy pimbijiche papisha, hãrã Ñanderu Tumpa poshyãpope. ² Pee papisha mbai porãmba pijapohea rãĩmipo; Ñanderu Tumpa japo jyve pyndyrehekui ³ Mãrã'ĩrãra rỹmãĩ rihe yvyrakui ndyryvy hesape õ, yvyra marẽyvã ndyresape õra ryheshãjy? ⁴ Mãrãrapo rereshu ndyryvy: “Taheky ndyhevi yvyra kui ndyresape õ, ndeave ryrekova yvyra marẽyvã ndyresape? ⁵ Tykove hapisha tamba iare! Heky rãni yvyra marẽyvã ndyresape õ ryhesha kavi verã, hãrãpo ryhekyshi yvyra kui ndyryvy hesape õ.” ⁶ Avy pymẽẽshu ñaumba mbai haikaviva, mahẽ jere pykotyrã opa pususukui, avy pymomboshu mãĩnũnga hepyva kushire hỹnonde, mahẽ oparei pyrõhekui. ⁷ Pirure hãrã Ñanderu Tumpa mẽẽpo pee; pyhekava hai heshakapo pee; pyhẽno hõchepe, hãrã hai peapopekui. ⁸ Jurureva rãnga mẽ'ẽaposhu, hekava heshapo; hareka õche nũpava pe'aposhu. ⁹ Mbara peeva, tay jurureshu pãhãra, mẽẽposhu ita pysẽvẽ? ¹⁰ Jurureshu pirarã, mẽẽra poshu mboi? ¹¹ Pee pyndyreko porãmbava, mbai haikavivãĩ pymẽẽshu pyndy rayre, ñopỹi ĩara hai pe Ru vate arapy õ, mbai haikavivapo mẽẽshu jurureshuare. ¹² Hãrã pota ỹngavare papova rãĩmi, pijapo jyve papishare. Kyrãvape opa iko Moise mbypara vekua hareka Tumpa ĩñẽẽ mbeu'iare jykuatiape heiva. ¹³ Piche õche mishĩvaipi pyryrahava Ñanderu Tumpa ẽvãpe. Shara tivisha hai õche hareka pe pyryrahava ãña ẽvãpe, javaiã javata hupi hãrã heta ẽjy icheva voka õcheipi. ¹⁴ Tẽvã õche hareka pe ohovatykove kyty mishĩ hai, javai javata hupi. Hãrã mbovyĩ'ẽ heshava kova tykove. ¹⁵ Pingareko pindijeheshi Tumpa ĩñẽẽ mbeu'ia rã'ãngarã'iare. Avisha rãĩmi jyveru pẽĩvape, tẽvã pyape avara vasu ñarõ vekua rãĩmi. ¹⁶ Hãrã pee japovareĩpo pikuashu retakui: “Po ohã uva ñanaivi, hareka igo kapiãtivi.” ¹⁷ Kỹrã opaiteva yvyra haikaviva ia kavi jyve, hãrã yvyra porãmbava ia porã jyve. ¹⁸ 18 Katuãpo yvyra haikaviva ia porã, hãrã yvyra porãmbava katuãpo ia kavi. ¹⁹ Hãrã opaiteva yvyra ia porãmbava jasyjaharã, momboha tatape. ²⁰ KỹrãpoTumpa ĩñẽẽ mbeu'iare japova japo vekuarehẽi pee pikua kavi jyve. ²¹ Ha'ẽã opaĩ heisheva: “Sheja, Sheja,” iche verã Mburuvisha vasurã ara vateivi ouva. Koñẽĩ Sheru vate arapy õ heiva japovãĩpo ichekui. ²² Vokava ara vãhẽmarã, hetapo ẽ heisheva: “Sheja, Sheja, ndyreepe ore ñimiñẽ'ẽhate ijyve, ndyreepe ore mohẽhã'i mbai poshyre, ndyreepe ore heta japoha mbaikavi heshaha verã.” ²³ Haipepo haishu reta: “Apyrykuãã rãnga. Pekua shyhevi koivi, pee mbai porãmba japo iare!” ²⁴ Hãrã ĩmẽ'ẽ hẽnduva shiñẽẽ hareka hekope kavi japova. Ova pẽnte kuimbai opa mbaikuaava, hoorã mũpũava ita'ĩãrẽ. ²⁵ Haivi ou haivirã, ysyry jitivisha, yvytu ñãkua pejurã oho ẽhe oo, tẽvã o ãã, shara ita vasu ĩãrẽ mũpu ãharã. ²⁶ Hãrã opaite hẽnduva ko shiñẽẽ, tẽvã japoãrã ova tykove mbaimba kuava, mũpuã hoorã yvy kui ĩãrẽ. ²⁷ Hãmã ou haivirã, ysyryva jitivisha, yvytu ñãkua pejurã oho ẽhe oo, haipe oarã opa ñymambaishi. ²⁸ Hesu kova mbai heirã, kuaretare hãĩrã hesha reta pyrỹmboiheva. ²⁹ Shara Hesu pyrỹmboihe Ñanderu Tumpa ĩñẽẽ, mburuvisha rãĩmi ha'ẽãmba Moise mbypara vekua pyrỹmboi'iheare.