Hesu pyrỹmboi mãrãrapo rỹmbory mbai mba'etyrea ¹ Avy pijapo mbaikavi kuaretare hỹnonde, pijeshakashu verãretãi. Kỹrã pijaporã pe Ru vate arapy õ, mãĩnunga pẽapo Avy pijapo mbaikavi kuaretare hỹnonde, pijeshakashu myngoviape. ² Hãrã kỹrã rymbory mbai mba'etyrearã, avy mbeu i opa rupii. Japosea rãĩmi pyryresha tamba iare Judiore ñymbaty õpe hareka vataha õ retaipi; haire kỹrã japo ĩnjeta kavihe verãre. She hai pee kỹrã haire ñymyngoviamashu reta, myngoviashu verãre. ³ Nde rỹmbory mbai, mba'etyrearã, avy mbeushu ndapisha ryhaihuveva, ⁴ ñemiãpẽipo rijapo. Kỹrãrãpo nde Ru hesha ñemiãpẽĩ rijapova, hetavare hỹnondepo mẽẽjy ndekui. ⁵ Hãmã pirurerã, avy pirure pyryresha tamba iare rãĩmi, haireta rãnga haikavishu ñymboyvape jurure Judiore ñymbaty õpe hareka vataha õ retaipi ijeshakashu verã kuaretare. Ãñẽte hai pee, kỹrã haire ñymyngoviamashu reta, myngoviashu verãre. ⁶ Nde rirure potarã iche ndero ipe, mboty nỹrõche, hãmã jurureshu nde Ru nẽi rẽivape. Hãrã nde Ru hesha ko nẽi rijapovarã, hetava hỹnondepo mẽẽjy nde mãĩnunga. ⁷ Hãmã pirurerã avy pukurei pĩnjeta, Ñanderu Tumpare jyrojamba japosea rãĩmi. Mõate heta ĩnjetarã Ñanderu Tumpa hẽndumashu verãre. ⁸ Avypo pẽe haire rãĩmi, shara Ñanderu ndei pirurerãvãĩ opa kuaa mbaivara mba'etype. ⁹ Tẽvã pee kỹrãpo pirure: Yre Ru vate arapy rĩme rẽĩva, tirojahahe ndy ndyree haikaviva. ¹⁰ Tou ỹreãrẽ Mburuvisha vasurã ara vateivi ouva. Tijapoha nde ripotava ko yvy ĩãrẽ, vate arapeva rãĩmi. ¹¹ Mẽẽ ore ho ua verã ko ara pevãrã. ¹² Hejareii yryhevi mbai porãmba vekua, ore hejareiishia rãĩmi japo porãmba i yryreheare. ¹³ Avy ma'ẽĩhe tyvãhẽ ore iririty verã pỹrỹrãvã, tẽvã jochaĩ yryhevi. Shara nde hai Mburuvisha Vasu, nã'ãpova hai mbaikatu hareka himbipekue opamba verã. Amén. ¹⁴ Pee pyhejarei shi mbai porãmba japo pyndyrehevarã, pee Ru vate arapy õvã hejareiipo jyve pyndyhevi mbai porãmba pijapo vekua, ¹⁵ tẽvã pyhejareĩãshu mbai porãmba japo pyndyrehevarã, kỹrãjyve pee Ru vate arapy õ hejarẽĩapojyve pyndyhevi mbai porãmba pijapo vekua. ¹⁶ Hãrã pykarumbape pẽĩrã, avy pyvy'ãã vasĩpi pyryresha tamba'iare rãĩmi; kỹrã haire japo kuaretare heshahe verãre karuã ñynõĩrã. Ãñẽte hai pee, myngoviamashu reta, myngoviashu verãre. ¹⁷ Nde rykaruama rẽĩrã, jyvahe hareka ijakatu, ¹⁸ hãrãpo kuaretare kuãã rykarumbape rẽĩrã. Koñẽĩ nde Ru vate arapy'õ heshapo ñemiãpẽi rijapova: Hãrã myngoviapo nde opavare hỹnonde. ¹⁹ Avy pymbaty mãĩnunga hetava yvy'ĩãrẽ, kupii opa houvaipi, mbaire opa tujavape, hareka mãnãrõ iare icheseaipi opa ñomi verã. ²⁰ Pymbatyĩ heta mãĩnunga vate arapy, kupii ẽmbape, mãinũnga ñymbaimbape, hareka mãnarõ'iare ichembape opa ñomi verã. ²¹ Shara mãĩnunga heta ryrevape, haipepo ẽjyve ndypya. ²² Ndyresa rãnga hai ndyretepy sapeva, hãrã ndyresa haikavirã, sape kavipo ndyrete. ²³ Tẽvã ndyresa porãrã ndyretepy opapo pỹntu, hãmã ndyretepy sapeva opa pỹntu ndyhevirã, pỹntuĩtevepopy. Pẽnteĩpo jare Ñandi Ija ²⁴ Mbavẽãpo ijokuekashu mõkue karai pyrokue ia. Mỹmorãpo pẽnteva, tẽvã ĩrũpo haihuve; ti japove poshu pẽnteva heishua, tẽvã ĩrũpo mymorãã. Hãrã katuãpo Ñanderu Tumpa jairojatẽ hea jahaihujy kyrypoti. ²⁵ Hãrã she hai pee: Avy pejepy'apyhe peu verãre, hareka pymonde verãre. Ha'eãra hai mbai vasuveva ñandykove timbiuvi hareka ñandyrete mondeavaivi? ²⁶ Pymãihe vyrare haire ñimytỹa hai, myno'õavaĩjy hareka mbatyã ñonokavi. Tẽvã Pe Ru vate'õ hareka arapy'õ myngarushu reta, pee rãnga mbai vasuveshi hai reta. ²⁷ Mbavara ojepy'apyve'irã, mbupuku vepo hykove? ²⁸ ¿ Marã ĩrãra pejepy'apy pymonde verãre? Pymaihe yvoty ñuhupi õre marãra heñorã vate oho, mba'apomba ñymonde verã. ²⁹ She haipe mburuvisha Salomon opaite mbai rekovekua ryheve, mashy ãmba ñymonde yvoty rãĩmi. ³⁰ Ñanderu Tumpa kyrã mimonde ñana ñuupe puãva, parejyra hapyha tatape, pee katy mẽẽ ñoĩpope pymonde verã, pe tykove jyrojamba! ³¹ Hãmeara avy pejepy'apy pypyrandu pi pijupe: Mbaivara jaupo? Mbaivara ñambusururutẽpo? Mbaivara ñamõndetẽpo? ³² Opaitea kovare ojepy apy Ñanderu Tumpa rojambare, peeny pyreko pẽnte pe Ru vate õ, opa kuava mbaivara piko tẽvẽ. ³³ Haikaviveva ränga hai pikuaa Ñanderu Tumpa haiva Mburuvisha Vasu koñeĩ’õ hareka pijaposhu hai jurureva. Tumpa mẽẽpope opaite jy’arape mba’etypeva. ³⁴ Avy peje py apy pare verãre, shara pare verã rekojy ynga jepy apy. Opaiteva arare, reko heta jepy apy.