Yvyturusu õĩvĩ Hesu ñimiñẽẽ ¹ Hesu hesha heta kuareta jatyvarã, jupi yvyturusure haipe vapy. Mboireare opa ou hyvache. Hesu hesha heta kuareta jatyvarã, jupi yvyturusure haipe ² Haipe Hesu õñepyrõ mboishu retarã hei: ³ Vy apo hesha ijeheva pavete'ia pyape, haire pevãrã rãnga Mburuvisha vasurã ara vateivi ouva. ⁴ Vy'apo ã'ẽ vyamba'iare, shara Ñanderu Tumpa mẽẽposhu pyape vya verã. ⁵ Vy'apo jyrojamba ijehevare, mẽẽã poshu yvy Ñanderu Tumpa mẽẽ verã haire ña ãporã. ⁶ Vy'apo Ñanderu Tumpa heivãi pota ikoshua, haipo mẽẽshu reta Tumpa potava. ⁷ Vy'apojyre hapisha parekova, Ñanderu Tumpa parekoposhureta. ⁸ Vy'apo pyape kyambare, shara haire heshapo Ñanderu Tumpa. ⁹ Vy'apo õñehã pirĩmbi iko kaviva, haire he iaposhu: “Ñanderu Tumpa rayva.” ¹⁰ Vy'apo hasa asyva, mbai haikaviva japo irã, shara haire ña ãpova Mburuvisha vasurã ara vateivi ouva. ¹¹ Pyvy'apo he'iha'iperã, pyhasa asyrã, hareka shyree rehe heta he'iape mbai porãmba vekuarã hareka japureiva. ¹² Pyvy'a, hareka pyndy pya hory, shara vate arape ĩmẽ'ẽ mẽ'ẽãpee verã, kỹrãmba hasa asy jyve arykai Tumpa ĩñẽẽ mbeu'iare tynonde pyndyhevi vekuare. ¹³ Pee rãnga juky rãĩmi kuaretare pevarã yvy ĩãrẽ. Juky hỹmboshy veamarã, mbaivapera mỹmboshyhapojy? Porãveãma; hãmã momboha katuape kuaretare pỹrõ ẽhe verã. ¹⁴ Pee rãnga hai mbai sapeva ko yvy ĩãrẽ. Pẽnte tẽnta yvyturusu ĩãrẽ õ katuãpo heshahã. ¹⁵ Mỹ hẽndyhã lampara ñonõã verã mbai hyrupe, vateñõĩ ñonohã, sapehe verã opaite o ipe õre. ¹⁶ Kỹrã jyve pee mbai sapeva rãĩmipo pysape opavare hỹnonde, haire hesha haikaviva pijaporã, õmombai vasupo jyve Ñanderu Tumpa vate'õ. ¹⁷ Avy pimõã ai ambaiverã Moise mbypara vekua hareka Tumpa ĩñẽẽ mbeu'iare pyrỹmboihe vekua; she aiã ambaiverã. Opa kavi ajapo verãi rãnga. ¹⁸ Ãñetẽite hai pee, ndeiteri ara hareka yvy hasarã, mba'ẽãpo hekyhashi, pẽnte mbyparava Moise mbypara vekua, opa jehu peve ẽpyare. ¹⁹ Hãrã ĩmẽ'ẽ mbijicheva Moise mbypara vekua hareka mishĩmba japova, kỹrã pyrỹmboi ihea, haipo mishĩveva Mburuvisha vasurã ara vateivi ouvape. Tẽvã Moise mbypara vekua japo kaviva, hareka pyrỹmboihea, haipo vateve ñonohã Mburuvisha vasurã ara vateivi ouvape. ²⁰ She hai pee, pyhendu kaviã Fariseore hareka Moise mbypara vekua pyrỹmboi'iheare retaivirã, pee katũãpo pichekui Mburuvisha vasurã ara vateivi ouvape. ²¹ Pee pyhẽndu pynytynondevare he iambashu aryka'e: “Avy puruka; shara purukava, jahea ñõĩpohe.” ²² She hai pee, ĩmẽ'ẽ hapisha poshyshuarã jahea ñõĩpohe. Ĩmẽ'ẽ heishua hapisha “Mba'ẽã rikua”, rahapo karaire hỹnonde; hareka hapisha heishua “heko porãmba” vokava ohopo shyryry tata vasupe. ²³ Hãrã ryraha altarpe rỹmẽẽ verãrã, haipe nymanduahe ndapisha pya poshy nderã, ²⁴ heja altar hỹnonde rymẽẽ verã, ekua ndapisha'õpe ẽĩjy kavirãni hãndi. Haivi eijy altar õpe mẽẽ rymẽẽshu verã Ñanderu Tumpa. ²⁵ Ĩmẽ'ẽ pota ndyrahava Juezpe, pehupi vãĩ ẽjy kavi hãndi, mahẽ nymẽẽshukui Juez. Ko Juez nymẽẽshu syndarorã, hai ny mbyperesoka pokui. ²⁶ Ãñetẽĩnte hai nde, rẽhẽ jyvỹapo haivi, opa rỹmbyhepyjy peve Juez ñonondea. ²⁷ Pee pyhẽndu pynytynondevare he'iambashu reta arykai: “Avy ikojy handi ỹngava.” ²⁸ Tẽvã she hai pee: “Ĩmẽ'ẽ õmendava mãĩhe tauperã potarejya, ikoma i hãndi pyapẽi.” ²⁹ Ndyresa ndakata kyty õ ndirity mbai porãmbaperã; nohẽ mombo mbyry, haikavivepo mishĩ õñehũndi ndyrete, mahẽ opãi ndyrete mombohakui tata vasuape. ³⁰ Ndepo ndakata kyty õ ndirity mbai porãmbaperã; jasyja mombo mbyry, haikavivepo mishĩ õñehũndi ndyrete, mahẽ opãi ndyrete mombohakui Ãña ẽvãpe. ³¹ Pee pyhẽndu pynytynondevare he iambashu aryka'e: “Ĩmẽ'ẽ hỹreko poishiarã, mẽẽ poshu kuatia poishia ryheva.” ³² She katy hai pee: Ĩmẽ'ẽ kuimbai hỹreko poishiarã, ha'ẽã ỹnga mãĩ ijyheshirã, opa myporãshi õmendatẽ vekua; hãrã taupe poiashia rekojya japo jyve mbai porãmba. ³³ Pee pyhẽndu pynytynondevare he iambashu aryka'e: “Avy pỹrõhe niñẽẽ rỹmẽẽva Ñanderu Tumpa hỹnonde.” ³⁴ Tẽvã she hai pee: Avytei mbaimbape pymẽẽ piniñẽẽ. Avy pymẽẽ piniñẽẽ vate arare, shara Ñanderu Tumpa vapypya ẽvãpe hai vokava; ³⁵ yvypemba pymẽẽ verã, shara kova hai ipy ẽvãpe; avy Jerusalenre pymẽẽ, shara vokava hai mburuvisha vasu Ñanderu Tumpa hẽnta. ³⁶ Kỹrãijy avy pymẽẽ piniñẽẽ pãnkare, shara pẽnte tãnkahamba katu pimitĩ, hareka pumũhũjya. ³⁷ Koñei “Ẽẽ pererã, pijapo; tẽvã “Mba'ety” pererã, avy pijapo, shara kyrãã pijaporã porã vokava. ³⁸ Pee pyhẽndu he iambajy aryka'e: “Ĩmẽ'ẽ hapisha hesa mombuarã, mombuhãipo jyveshi; hapisha hãi ityshia, ityhãipo jyveshi.” ³⁹ Tẽvã she hai pee: Avy pymbyhekovia jyshu mbai porãmba japo pyndy reheva; ĩmẽ'ẽ ndyrovaipi nũpavarã, mẽẽ jyshu ndyrova hyvaisho. ⁴⁰ Ĩmẽ'ẽ pota Juez hỹnonde ndyrahava nykambisa heky ndyhevi verãrã, mã ẽihe tyraha seve ndysako. ⁴¹ Ĩmẽ'ẽ rahaka ndea mbyry katu mbai pohyvarã, mbyryve rahashu. ⁴² Ĩmẽ'ẽ mainũnga jurure ndevarã mẽẽshu, mainũnga pota pory ndyheviva porykashu, avy haihushi. ⁴³ Pee pyhẽndu he iambajy aryka'e: “Ryhaihu poshu ndyraihuvare, hãmã avy haihu ndyreshatamba iare.” ⁴⁴ Tẽvã she hai pee: “Pyhaihu pyndy reshatamba iare, pirureĩhe ñymbyvaisho i pyndy rehevare; ⁴⁵ kỹrãrãpo iko pyndyhevi Ñanderu Tumpa tay; hai rãnga mohẽ ĩãrã kuarasy heko porãmba hareka heko kavivare. Hai rãnga mbyhaivihe heko kavivare hareka heko porãmbavare. ⁴⁶ Pee pyhaihupi pyndyraihu ia retairãra, mbaivapepo mbyhekovia jype? Tẽnta Roma pevãrã okorase iaretave kỹrã jyre. ⁴⁷ Hãmã pini ĩrũ retaĩ pymarãndupirã, mãrãva mbaikavira pijapo? Ñanderu Tumpa jyrojamba hea retave rãnga kỹrã japo jyve. ⁴⁸ Pee rãnga pyndyreko kavipo, pee Ru vate arapy'õ heko kavia rãĩmi.