Ãña pyarãshu Hesu ¹ Espiritu Santo raha Hesu yvy ikoambaipi, haipe Ãña pyarãshu verã. Haivi Espiritu Santo raha Hesu yvy ikoambaipi, haipe Ãña ² Hasa 40 ara mbaimba houva, haivi ñandu ñymbahykue. ³ Haipe Ãña ñymbojahe Hesu pyahãshu verãrã heishu: Nde hai Ñanderu Tumpa tayrã, ereshu kova ita tikoshi pãhã. ⁴ Tẽvã Hesu heishu: Ñanderu Tumpa ĩñẽẽ mbyparahavape hei: “Hã'ẽã pãhãrei iko verã kuaretare; ẽẽjyve opaite ñẽẽ õhẽva Ñanderu Tumpa juruivi. ⁵ Haivi Ãña rahashu tẽnta Ñanderu Tumpa ña'ãmpova Jerusalenpe. Haivi hupishu tupao japytere. ⁶ Hãrã Ãñã heishu: Nde hai Tumpa Rayrã, epo yvype; shara ñẽẽ mbyparahavape hei: “Ñanderu Tumpa mondopo jokuevare ñyngareko ndyrehe verã. Ndypysypo reta potã ita ndepy ryrokuahẽrã." ⁷ Hesu heishu: Ñanderu Tumpa ĩñẽẽpe hei jyve: “Avy pyahãshu Ndeja, Tumpa." ⁸ Haivi ãña rahashu yvyturusu japytere, haipe mbyheshaka opaite tẽnta yvy ĩãrẽ õre, hareka opa mbaikavikue mashyshyãva ẽpyare; ⁹ Hãmã ãña heishu: Opaitevapo ãmẽẽ ndekui kovare, rĩñesu shynonde hareka shemombairã. ¹⁰ Hesu heijyshu: Ãña, syry shyhevi, Ñanderu Tumpa ĩñẽẽ mbyparahavape rãnga hei: “Ñanderu Tumpa hỹnondepo rĩñesu, hãrã ha'ẽĩpo rẽmombai vasu.” ¹¹ Hãrã Ãña syryshi Hesu, haipe Tumpa jokuevare ou ñyngarekohe verãre. ¹² Hesu hẽnduma Juan mbyperesoarã, ohojy Galileape. ¹³ Tynonde oho tẽnta Nazaretpe, haivi oho pyta Capernaumpe, pẽnte tẽnta ẽvã yyvasu hỹmbeype, Zabulon hareka Neftali ñymoña hãndi vekuare iko jyreaipi. ¹⁴ Vokava jehu iko verã hekope kavi Tumpa ĩñẽẽ mbeu'ia Isaias jykuatiape mbypararã vekua: ¹⁵ “Tẽnta Zabulon, hareka Neftali jy yvype, pytava yyvasu kyty yysyryva Jordan hyvache, tẽnta Galilea haimba Judiovare ikovape. ¹⁶ Kuaretare ikova pỹntuape, hesha tivisha sapeva; hẽndyva sapeshu manova rãĩmi ikovare.” ¹⁷ Haivivãi Hesu õñepỹrõ ñimiñẽẽrã, hei: “Peijy Ñanderu Tumpa kyty, hareka pyheja mbai porãmba pijapo vekua, shara mburuvisha vasurã ara vateivi ouva vãhẽ serima ou." ¹⁸ Hesu vata oho yyvasu Galilea hỹmbeipirã, hesha Simón, Pedro he'iashua hareka tyvy Andres. Hai reta rãnga pira nohẽ iare, yype mombo ñynõĩ jypysare. ¹⁹ Hesu heishu reta: “Pei shimi'ĩrũ, ajapopo pyndyhevi hapisha nohẽ'i verã mbai porãmbaivi.” ²⁰ Haipevãĩ opa heja jypysare, hãrã oho hãndi. ²¹ Hesu oho poshyjyrã heshajy pẽnte ovare Jacobo hareka Juan, Zebedeo tayre. Haire tuu hãndi jakatu ñynõĩ jypysare kanoape. Haipe Hesu hẽnoshu reta. ²² Hãrã haipevãi heja reta kanoa hareka tuu, haivi jyraha hãndi. ²³ Hesu oho Galileape, Judiore ñymbatyseape pyrỹmboihe Ñẽẽ kaviva mbeu Mburuvisha vasurã vate araivi ouva ryheva, hareka kuareta ñymbairasy vekuare opa mynguera. ²⁴ Hesu kuaaha opa Siriaipi. Hãrã veruashu opaite mãrãrãgãtu ñymbairasy vekuare, mbai poshy ĩmẽreare, kuakuamba'ia hareka vatamba vekuare. Hesu opaite mỹnguerashu reta. ²⁵ Heta'ẽ kuaretare Galileaivi, Decapolis, Jerusalen, Judea hareka Jordan juri'õre ohova Hesu haykue.