Juan Bautista ñimiñẽẽ ¹ añoma hasarã, Juan Bautista ñimiñẽẽ yvy ikoambaipi, Judeape. Heta añoma hasarã, Juan Bautista ñimiñẽẽ yvy ikoambaipi, ² Hai hei: Peijy Ñanderu Tumpa kyty, hareka pyheja mbai porãmba pijapo vekua, shara kõõĩma ẽẽ mburuvisha vasurã ara vateivi ouva. ³ Juanre rãnga ĩnjeta aryka'e Tumpa ĩñẽẽ mbeu'ia Isaias kuatiape mbypararã vekua: Ñyhẽndu yvy ikoambaipi hynãtu ĩnjetava: “Pymỹhẽvã Ñandeja haperã, pijaposhu pe symyĩ ohova.” ⁴ Juan mondeva hai kamello haakueivi japoava, ku'a jokuaka hai vakapi, tuku hareka ei ñanaipi õvãi hou'i. ⁵ Opaĩ Jerusalen, hareka Judeape õre jyraha hai ẽvãpe hẽndu verã ĩñẽẽ, kỹrã jyve Jordan hỹmbeype iare. ⁶ Opama ñymbeu reta mbai porãmba japo vekuaivirã, Juan myngaraishu reta yy syryva Jordanpe. ⁷ Juan heshama Fariseore hareka Saduceore heta ou ẽvãpe myngarai verãrã, heishu reta: Pee mboi rãĩmipia! Mbavara heipe piñemishi verã ñunũpa pohyva mbouhava? ⁸ Tijyhesha pyndy rehe peijymava Ñanderu Tumpa kyty. ⁹ Avy pimõã Abraham ray peerã mba'ẽã jehupe, she hai pee Ñanderu Tumpa katu japoshi ko ita Abraham ra'yrã. ¹⁰ Shara jyy ẽma ityha verã yvyra jypyre, opaite yvyra ia porãmbava jasyjahapo momboha verã tatape. ¹¹ Ãñetẽ yypẽĩ apyrỹmyngarai pyhejama mbai porãmba pijapo vekuarã. Tẽvã shaykue ouva pynymyngarai pokui Espiritu Santo hareka tatape, hai mbai vasuve shyhevi jypasaĩmba katu ajorashua. ¹² Ûrũpe ipopemare trigo mbova verã, hãrã ỹngaipo ñonoshi ky'akue, ñono kavipo oo ipe trigo rã'ỹkue, tẽvã ky'akue hapypo tata ovembape. ¹³ Hesu oho Galileaivi ou Juan ẽvãpe yy syryva Jordanpe, hai myngaraishu verã. ¹⁴ Juan potã myngaraire Hesu, hãrã heishu: Nde rãngatẽ shymyngarai verã! Hãmera nde rei aĩvãpe? ¹⁵ Hesu heishu: Ã'ẽãra kyrãĩpo ryheja, haikavive rãnga jajapo hekope kavi Ñanderu Tumpa potava. Hãrã Juan japo Hesu heishuva rãĩmi. ¹⁶ Hesu ñymyngaraimãrã õhẽ yyvirã jypeashu ara vate'õ, haipe Hesu hesha Ñanderu Tumpa Espiritu, pykasu rãĩmi vejy ĩãrẽ. ¹⁷ Hãrã ñyhẽndu vate araivi pẽnte ñẽẽ heiva: “Kova hai Shyray ahaihuva, hai reheĩ avyava.”