Kuimbai ãrãndure jyveru pohyshu sanjay ¹ Hesu oa tijupami Belen he'iashuva yvy Judeape, mburuvisha vasu Herodes jy'arape. Akuape vãhẽ jyveru Jerusalenpe kuarasy Hesu oa tijupami Belen he'iashuva yvy Judeape, mburuvisha õhẽaivi kuimbai ãrãndure. ² Hãrã pyrãndushu Jerusalenvare: “Mãpera ĩmẽ'ẽ Judiovare juhuvisha vasu oava? Ore heshaha kuarasy õhẽa kyty jasy tata sape'ẽrã, hãrã ouha omomba'eashu.” ³ Mburuvisha vasu Herodes kuamarã pya myngyje hareka opaite Jerusalenvare. ⁴ Hãrã mburuvisha vasu hẽnoka pai juhuvisharehareka Moise mbypara vekua pyrỹmboi'iheare pyrãndushu verãre: Mãpera Kristo oapo? ⁵ Haire heishu: Belen Judeape'õ, shara Tumpa ĩñẽẽ mbeu'ia kỹrã mbypara kuatiape: ⁶ “Nde Belen, Judeape rẽiva, nimishivẽãmapokui mbavaivi tẽntare mbytepe. Shara ndyhevipo õhẽ mburuvisha vasu, ñyngarekohe verã shyrẽta Israel.” ⁷ Haipe Herodes ñemiapẽĩ hẽnoka karai ãrãndure. Hãrã pyrãndushu reta mbaipeitera hesha jasy tata. ⁸ Haivi mondo Belenperã, heishu reta: “Pekua hãrã pypyrãndu kavihe sanjay; pyvãĩshurã peijy pymbeushekui, aha amombaishu verã jyve. ⁹ Hẽnduma reta mburuvisha vasu heishuarã karai arãndure jyraha. Hãrã jasy tata heshavare kuarasy õhẽaivi, hỹnonderã ohoshu reta pyta peve sanjay ẽvãpe. ¹⁰ Ko kuimbai ãrãndure heshama jasy tatarã, vy'a jyre. ¹¹ Iche reta oo iperã, hesha sanjay hareka ishy Maria hãndi. Haipe ĩñesu retarã, omombaishu sanjay, haivi mbai hyru pea retarã, mẽẽshu ita vera mashỹãva hareka hepyva, yvyra roky pishe katuva hareka yvyra mirra pishe katuva. ¹² Haivi Ñanderu Tumpa kuaakashu reta jypaihupe, potamba ohojy verãre Herodes ẽvãpe, hãrã pe ỹngavaipi jyrahajy hẽntape. ¹³ Oho jyma karai ãrãndu retarã, Tumpa jokueva Jose jypaihupe ijeshakashurã hei: “Pũ'ã, narẽ'ãĩte raha sanjay Egipto kyty. Haipe pytakui she ãrỹmarãndu peve, shara Herodes hekakapo'ẽ ko sanjay juka verã.” ¹⁴ Jose sarekorã, voka pyhare mbytepe ravĩ raha sanjay hareka ishy Egiptope. ¹⁵ Haipe pyta reta Herodes mano peve. Kỹrã jehu iko verã hekope kavi Tumpa hei vekua, Tumpa ĩñẽẽ mbeu'ia rupii, “Egiptoivi ãheno shy Ray.” ¹⁶ Herodes kuama kuimbai ãrãndure mbytavyrã, pya poshyiterã, mondo syndarore juka verã sanjay kuimbaimi nde'iave teri mõkue año mbotyva, Belenpe hareka hyvache õre, kuimbai ãrãndure mbeushua rãĩmi mbai arapera hesha jasy tata. ¹⁷ Kỹrã jehu, iko verã hekope kavi Tumpa ĩñẽẽ mbeu'ia Jeremias mbypara vekua kuatiape: ¹⁸ “Tẽnta Ramape ñyhẽndu jaheo vasu; Raquel hãpĩrõtere membyre shara opa manoshi, hãrã katuã pya haikavi ẽjy. ¹⁹ Herodes manomarã, Ñanderu jokueva ijeshakashu Jose jypaihupe Egiptoperã heishu: ²⁰ Pũã, rahajy nysanjay hareka ishy, ekuajy Israelpe shara ko sanjay pota jukareare manoma. ²¹ Jose pũãrã, rahajy sanjay hareka ishy Israelpe. ²² Jose kuama Arquelao mburuvisharã ẽjy Judeape tuu Herodes hẽndakueperã, kyje ohojy haipe. Haivi Ñanderu Tumpa mbeushu jypaihupe oho verã Galileape. ²³ Vãhẽ jyraha haiperã, oho iko jyre tẽntami Nazaret he'iashuvape. Kỹrã jehu iko verã hekope kavi Tumpa ĩñẽẽ mbeu'ia hei vekua: “Hesu mbyheeapo Nazareno.”