Hesu hekapy (12) mboi vẽrã ¹ Hesu hẽno (12) mboireare, mẽẽshu verã mbaikatu, mohẽ verã mbai poshyre, hareka mynguera verãre mbairasy Hesu hẽno (12) mboireare, mẽẽshu verã mbaikatu, mohẽ mãrãrã ngatu vekua. ² Kova hai (12) Hesu mboireare hee: Tynonde ẽ Simón mbyheajyva Pedro, hareka tyvy Andres; Santiago, hãndi tyvy Juan, Zebedeo tayre; ³ Felipe, Bartolome, Tomas, Mateo kyrypoti mbaty ia Roma pevarã, Jacobo Alfeo tay; hareka Tadeo; ⁴ ĩmẽ'ẽjy Simón kananita ryheva, hareka Judas Iscariote, Hesu pysykashu vekua. ⁵ Hesu mondo kova (12) õre opa mboi kavishu retarã: Avy pekuakui haimba Judiore hẽntaipi, hareka tẽnta Samariaipi. ⁶ Pekua pyheka avishare opa kãny vekua rãĩmi, Israelre hẽnta retaipi. ⁷ Pekua, hãrã pymbeu: “Mburuvisha vasurã vate araivi ouva vãhẽ serima ou.” ⁸ Pymynguera ñymbairasyvare, pymyngovejy manovare, pymynguera kuru porãmba iare. Mbai poshyre pymohẽ. Pee rãnga mẽ'ẽha reiipe kova mbaikatu, hãrã piporyrã avy pekora ĩãrẽkui. ⁹ Avy pyraha pindi jehe kyrypoti hareka nikere reta: ita vera mashyava, ita vera tĩva hareka kovre. ¹⁰ Haereka vosa pehupi pevãrã, pymondevare pimbivohy he verã, hãrã pepy ryheva hãndi. Haereka yvyra pyvata hea. Shara mba'apo ia karu ñõĩpo. ¹¹ Pyvãhẽ tẽnta, hareka tẽntamire õĩpirã, pyheka haipe kuareta heko kaviva. Hãrã pypyta hẽntape pehẽjy peve haivi. ¹² Hãrã pichema o iperã pymarãndurã pere: “Pyndy pya vapyiño.” ¹³ Haipe õ kuaretare pynymyvãhẽ kavirã pyhejashu reta ko ñymymarãndu pya vapy, haire mba'ẽãshurã timejype. ¹⁴ Hãrã pymyvãhẽseã, hareka pyny rendusearã, pẽhẽshi voka oo, hareka tẽntamire õĩvi, hãrã pymytymoshi yvytimbo pepy ryhevare. ¹⁵ Ãñete hai pee: Ñunupã arape, haire pevarã teitevepo voka tẽnta Sodoma hareka Gomorra pevekuaivi. ¹⁸ Hesu mboireare hasa asypo ¹⁶ Pikuapo, she apyrỹmondo avisha rãĩmi avara vasure mbytepe. Hãrã piko kuaapo mboi katu ia rãĩmi, hareka pykasu mbai mba japova rãĩmi. ¹⁷ Pingareko pijehe, shara kuaretare pynymẽẽpo mburuvishare ipope, punũpa verã Judiore ñymbaty õpe. 8 Pyndy rahapo mburuvisha vasure hỹnonde, hãrã pee pĩnjetapo shyrehe, shykuaakaposhu reta, hareka jyrojambare. ¹⁹ Pyny mẽ ẽama mburuvisha ipoperã, avy pejepy apy pere verãre. Ti mãrãrapo pĩnjeta, shara Ñanderu Tumpa mẽẽpope pere verã rãĩmi. ²⁰ Hãrã peeãpo pĩnjeta, Ñanderu Tumpa Espiritu Santo rupiipo pĩnjeta. ²¹ Ĩmẽpo ẽ tyvyĩ mẽẽva jukaha verã; tuu mẽẽva tay jukaha verã; tyrayre pũapohe tuure juka verã. ²² Kuaretare pyndy reshatãpo shimimboi peerã, tẽvã jy ara opapeve jyroja shyreheva ohojepepo. ²³ Hãrã kuaretare pynymoña tẽntaivirã, ỹnga tẽntape pekuajy. Ãñẽte hai pee: She, kuareta tay rãimi ouva yvy ĩare: Aijypo ndei teri pee opa kavi pyvata tẽnta Israel perã. ²⁴ Mba'ety mbo'eharea vateve ẽ shia pyrỹmboi õ, hareka mba'ety jokueharea vateve ẽ shia pyrokue õ. ²⁵ Hãrã mbo'eharea vy apo pyrỹmboi õ rãĩmi ikorã, hareka jokueharea pyrokue õ rãĩmi ikorã. Hãrã oo ija he'iahe Beelzeburã, mãrãrapo kỹrãã he'ia jyveshu hẽnta ĩrũre? ²⁶ Hãrã avy pykyjeshi kuaretare, mba'ety ñemiãpe õ kuahamba verã, hareka mba'ety ñemi õ heshahamba verã. ²⁷ Ko she hai peeva pỹntuape, pymbeushu kuaretare ara kõĩvape; she papysapeĩ hai peva, o ĩãrãvive pysapuke pymbeu. ²⁸ Avy pykyjeshi pyndy reteĩ juka verã, shara katuãpo juka pyndy rykove. Koñeipo pykyjeshi Ñanderu Tumpa, katu jukava pyndy rykove hareka pyndy rete Ãñã ẽvãpe. ²⁹ Ovendehãrapo mõkue vyra kyrypoti mbovyĩ ia repy? Tẽvã pẽntẽapo oa yvype Ñanderu Tumpa he'ĩãrã. ³⁰ Ñanderu Tumpa opa kuaa pepetẽi pãkahaa. ³¹ Avypo pykyje, shara pee mbai vasuveshi hetava vyramire. ³² Ĩmẽ rãẽã mbeuva kuaretare hỹnonde shyrehe jyrojava, ambeupo jyveshu Sheru vate arapy õ hỹnonde. ³³ Ĩmẽ rãẽã mbeuva kuaretare hỹnonde: “Shykuambava,” she ambeupo jyve Sheru vate arapy'õ hỹnonde aikuambashua. ³⁴ Avy pimoã she aru ko yvy ĩãrẽ pyakavi, aiã aru verã pyakavi, koñeĩ ñymymorãmba ryheva. ³⁵ She ai tyray ñymbyvaishohe verã tuu, hareka kuñatãi ishy hãndi, hãrã tyreko ĩme ishy hãndi. ³⁶ Kỹrã pynyrẽnta ĩrũ retaipo pyndy reshatãkui. ³⁷ Tuu hareka ishy haihuve shyheviva, katuãpo ikoshi shimimbo'erã. Ĩmẽ'ẽ haihuve shyheviva tay hareka tajy, katuãpo ikoshi shyryheva. ³⁸ Hãrã hupimba jukurusu shĩmi ĩrũ verã, katuãpo ikoshi shyryheva. ³⁹ Hãrã hykove haihuva, hykove jyvare pohe. Shyrehe jyrojava hareka hykove haihumbava, hipitypo tykove opamba ⁴⁰ Ĩmẽ'ẽ pynymyvãhẽva, she shymyvãhẽ jyve; hãrã shymyvãhẽva, myvãhẽ jyveshu shymbouva. ⁴¹ Hãrã ĩmẽ'ẽ mỹvãhẽva ko Tumpa ĩñẽẽ mbeu'ia hairã, Ñanderu Tumpa mbykojajy ñoi poshu Tumpa ĩñẽẽ mbeu'ia mbykojahashuva rãĩmi. Ĩmẽ'ẽ myvãheva kuimbai heko kavivarã, Ñanderu Tumpa mbykojajy ñoi poshu ko kuimbai heko kaviva rãĩmi. ⁴² Ĩmẽ rãẽã mẽẽva yy rỹ ysami ko shyryheva hairã, ãñẽte hai pee Ñanderu Tumpa mbykojajy ñõĩposhu.