Juan Bautista mondo mboireare Hesu ẽvãpe ¹ Hesu opama (12) mboireare mboishurã. Ôhẽ haivi pyrỹmboi, hareka ñimiñẽẽ verã tẽnta retaipi. Hesu opama (12) mboireare mboishurã. Ôhẽ haivi ² Akuape Juan Bautista ĩmẽ'ẽ mbyperesoavape hẽndu opa mbai Kristojapova, hãrã mondo mõkue mboireare pyrãndushu verã Hesu: ³ Nderamba hai Kristo ou verã, ti ĩmẽra ẽjy ỹngava hãrõha verã? ⁴ Hesu heishu reta: Pekua pymbeushu Juan pee opaite pyheshava, hareka pyhẽndu pẽivã. ⁵ Pymbeushu, heshamba kũvãipia heshajy, vatamba vatajy, kuruva porãmba ia kuerajy, japysambava hẽndujy, mano vekua kuerajymba, hãrã pavetevare Ñanderu Tumpa Ñẽẽ Kaviva mbe uashu reta. ⁶ Vy'apo hesha iare mbai hetava she japova hareka shyrejamba ia. ⁷ Haire oho jymarã, Hesu õñepyrõ kuaretare hỹnonde ĩnjetaheshu Juan, hãrã hei: - Yvy ikoambaipi pehorã, mbaivara pyhesha? Pyheshara kuimbai kangyva haipe, takuara yvytu mbyvava õ rãĩmi? Mba'ety. ⁸ Mbaiva pyhesha verãramba peho? Pẽnte kuimbai ñimimonde kavi ia pera? Mba'ety. Pee pikua kavi, ñimimonde kavi iare mburuvisha vasure hẽntaipi iko. ⁹ Mbaivara akuarã pyhesha? Pẽnte Tumpa ĩñẽẽ mbeu'iara? Ãñeteite rãnga Juan ñymbaivateveshi ĩrũre Tumpa ĩñẽẽ mbeu'iaivi. ¹⁰ Juan rehe Ñanderu Tumpa kuatia mbyparavape hei: “She amondo ajokueva nynonderã, myhẽva nde verã ndyraperã. ¹¹ Añẽteva hai pee, mba'ety kuaretare mbytepe vateveshia Juan Bautista. Tẽvã Mburuvisha vasurã vate araivi ouvape kuareta mishiveva, vateveshi Juan. ¹² Juan Bautista ourãvive ã'ẽ peve, heta kuaretare pyrãtakuepe oñehã iche verã Mburuvisha vasurã vate araivi ouva, hãrã pyrãtavevare ñimbi ijahe. ¹³ Tumpa ĩñẽẽ mbeu’iare hareka Moise mbypara vekua mbeu reta Ñanderu Tumpa ñẽẽ Juan ndei teri ourãvãĩ. ¹⁴ Hãrã pota pyroja heiva retarã, Juan rãnga hai Tumpa ĩñẽẽ mbeu'ia Elias ou'ẽ verã. ¹⁵ Opaite japysa iare, tyhẽndu kavi. ¹⁶ Mbaiva rehera katu ambivache ã'ẽva kuaretare? Ova sanjayre ñimbijaru ñynõĩrã sapuke jyre ijuperã hei: ¹⁷ “Mbopua rãnga pee mimby tẽvã pirokỹã; pyrahea pee mbyrahe pavete ohova tẽvã pijahe õã.” ¹⁸ Hãrã ou Juan mbaimba houva hareka vinoĩmba houva pee pereshu: “Juan mbai poshy ĩmẽrea.” ¹⁹ Hãrã she, kuareta tay rãĩmi ouva yvy ĩãrẽ, pere shyrehe: “Akaru hareka hauva vino, akaruiteva hareka akauva, opaite hỹrãkua porãmba'iare hãndi Roma pevarã kyrypoti mbatyse iare shi ĩrũva.” Tẽvã ãrãndu Ñanderu Tumpaivi ouva, mbai jajapova rupiipo ijyheshakui. ²⁰ Haipe Hesu õñepyrõ injeta pohyshu kuaretare ko tẽntape õre. Haipe hetave mbaikavi heshaha verã japova. Shara haipe õre mbai porãmba japo vekua ñatẽy heja reta. Hãrã Hesu heishu reta: ²¹ Pavetepokui kuaretare ikova tẽnta Corazinpe! Pevetepokui kuaretare ikova tẽnta Betsaidape! Tẽnta Tiro hareka Sidonpe ajapo mbaikavi heshaha verãrã, ajapo pyny mbyteperã, kurimbate haire oujy verã Ñanderu Tumpa kyty. Hãrã kuaretare mondepo mondeava hũva, hareka ñakare tanimbu ñonorã vapy reta heshahahe verã mbai porãmba japo vekuare opama hejava. ²² Hãrã hai pee, ara ñimbivacheva, pee punũpahã pohyvepokui tẽnta Tiro, hareka Sidonpe vekuaivi. ²³ Nde tẽnta Cafarnaumpe'õ, rimoãra ndurupiiha jyve vate arapy? Mba'ety, nymombohapokui Ãña ẽvãpe. Shara tẽnta Sodomape kova mbai heshaha verã ajapo ndyrehe, ã'ẽ peve vokava tẽnta ĩmẽitẽ ẽvẽrã. ²⁴ Hãrã hai pee, ara ñimbivache vãhẽmarã, pee punũpahã pohyve pokui tẽnta Sodomape vekuaivi. ²⁵ Vokava ara vãhẽrã Hesu hei: “Ãmẽẽ nde shy vy'akue Sheru. Nde hai mburuvisha vasu, yvy ĩãrẽ õ hareka vate arapy õ Ija, rĩñomishi ñy ãrãnduvare hareka mbai kuavare, hãrã rymbykuakashu sanjaymi retape. ²⁶ Opaite Sheru, shara kỹrã nde ripota ikorã.” ²⁷ Sheru rãnga opa mbai ñono she pope. Mba'ety kuava Ñanderu Tumpa Tay, koñẽĩ Tuu kuashu. Mba'ety kuashuva Tuu, koñẽĩ Tayĩ kuashu. Hãrã she pota ambeuvape ambeupo mbavara Sheru. ²⁸ Pei she ãĩvape opaite pee pyny kangyva hareka ojepy'apyva, hãrã she apurũmbuputuupo. ²⁹ Shi ñẽẽ pyhẽndu kavi, hareka pijapo kavi she haipeva, pikua jyve shyhevi shara she shypya kavi hareka airojãã shijeherã, hãrã she apurũ mbuputuupo. ³⁰ Shi ñẽẽ pohyã. Opa ambeu peeva javaiã pijapo verã.