Hesu mboireare mynõ jyre trigo putu'uava arape ¹ Voka arape Hesu hasa oho kookueipi putu'uava jy arape. Mboireare opa ñymbahyrã õñepyrõ mynõ reta trigo hãrã Voka arape Hesu hasa oho kookueipi putu'uava jy arape. hou. ² Fariseore hesha vokavarã heishu reta Hesu: Mãĩndaheno, rymboivare japova, japoamba verã putu'uava arape. ³ Hesu heishu reta: Pimbijeta mba Tumpa ĩñẽẽpe õ mbai vara pẽnte arape japo arykai David hareka ñi'ĩrũre opa ñymbahyrã vẽkua? ⁴ Iche tupaope hou pãhã Tumpa pevarã, katumba hai hareka ñi'ĩrũre hauva, pai retãite hou verã vokava pãhã. ⁵ Ti pimbijetãra Moise heiva rãimi, paire putumba verã putu'uava jy arape tupaope, vokava rekohãshu reta mbai porãmba rãimi? ⁶ Tẽvã haipe, kope ime ẽ pẽnte mbai vasuveva tupaoivi. ⁷ Pee pikuã mbaivara he'ise Ñanderu Tumpa ĩñẽẽ heivape;"She aipota pypareko papisha, mymba pijukate she verã vekuaivi". Vokava pikuarã pereãtẽposhu mbai porãmba japo iare. ⁸ She, kuareta tay rãimi ouva yvy ĩare, areko shepope hai verã mbaivara katu japoha putu'uava arape. ⁹ Hesu oho haivirã iche Judiore ñymbaty õpe. ¹⁰ Haipe ẽẽ pẽnte kuimbai ipo tiniva; pota ñono vaishu reta Hesurã Fariseore pyrandushu: Katura ñamynguera hasyva putu'uava arape? ¹¹ Hesu heishu reta: Mbara peeva ĩmere pẽnte avisha, oa pyhevi yvykuape putu'uava jy'araperã, pe hoãrapo pynohejy verã? ¹² Pente kuimbai rãnga mba'eiteveshi pẽnte avisha. Hãmeãra katu jajapo haikaviva ñandapishare putu'uava arape. ¹³ Haipe Hesu heishu kuimbai: Mysymyi nde po. Hãrã mysymyi iporã kuera. Hyvaisho rãimi. ¹⁴ Haivi Fariseore õhẽ oho, haipe õñepyrõ injeta reta marã rapo katu juka Hesupe. ¹⁵ Hesu kuama pota juka jyreshu rã õhẽ haivi, hareka heta ohova haykue. Mỹnguera heta hasy vare, ¹⁶ heishu reta potamva mbeuva mbava hỹnonde. ¹⁷ Kỹrã rãnga jehu iko verã hekope kavi Tumpa hei vekuaTumpa ĩñẽẽ mbeu'ia rupii: ¹⁸ Kova hai ajokueva apyhỹrõ vekua, ko she ahaihu hareka shymby horyva. Añonopohe she Espiritu ĩãrẽ, hai mbo'epo mbaikavikue japo verã tẽntaipi. ¹⁹ Ñyrãrõapo hareka sapukeãpo, mba´etypo hẽnduva injeta kovare vataha oĩpi. ²⁰ Mỹ'õpeãĩpo takuara hareka mboveãpo tata mishi hendy õ, opa mbijapoka peve mbaikavikue. ²¹ Opa tẽnta vasure hãropohe reta. ²² Haipe rahaha pẽnte kuimbai heshamba kỹvaipiva hareka ña´ẽngua Hesu ẽvape, mbai poshy ipope ĩmerea. Hesu mỹnguerashu hãrã ko kuimbai hesha hareka injetajy. ²³ Opavare hesha reta kova ikovarã hei reta: ¿Ha'ẽãra ko David tay? ²⁴ Fariseore hẽndu kovarã hei: Hai rãnga mõhẽ mbai poshyre juhuvisha Beelzebu ñymbaikatu rupii. ²⁵ Hesu kuaa haire hei ñynoi pyaperã heishu reta: Opaite tẽnta vasure ñimbijaova oñehundipo. Ĩmerãẽa tẽnta hareka hẽnta ijupi ñyrãrõrã, oñehundipo jyve. ²⁶ Kỹrãi jyve aña pũã ijeherã, marãrapo pỹrãta opa arape? ²⁷ Pee rãnga pere, shee amõhẽva mbai poshy reta Beelzebu mbaikatupe. Kỹrãrã, mbavara meeshu rỹmboivare mbaikatu mõheshi verã. Pymboivare japova rupii rãnga, heshaha pee pijavyva pinjeta pẽirã she amõhẽva mbai poshyre Beelzebu pyrãtã rupii. ²⁸ She ãmõhẽ mbai poshyperã Tumpa Espiritu rupii, vokava he'ise Tumpa Mburuvisha vasurã vãhẽma pee. ²⁹ Mba'etypo icheva pẽnte kuimbai ñy mbai hetava hẽntape manãrõshu verã, ñapintia hareka ypy jokua rãnirã. Kỹrã japo rãrãpo katu manarõshu. ³⁰ She ndie õĩ mbava, õñemoi shy rehe. Mỹnoo mba she ndieva, mỹsarãmbi. ³¹ Ãẽte hai pee, Tumpa heja reipo opava japo vai vekua rehe hareka injeta porã mba jyreva. Tẽvã Espiritu Santore injeta vaiva, heja reiaposhu. ³² Ñanderu Tumpa heja rei poshu injeta vai shy reheva, kuimbai rãimi aiva yvy ĩare. Ko Espiritu Santore injeta vaiva, heja reiaposhu ko yvy ĩarẽ hareka yvyre ou'ẽ verã. ³³ “Pente yvyra jypy haikavirã, ia kavipo; hãmã põrãrã, ia kaviapo jyve. Yvyra iarei ijykuaa. ³⁴ Pee mboi rayre! Mãrãrapo haikaviva pere, pee pyndyreko porãmbava. Ñandypyape jarekova, ñahẽnduka ñandijuruivi. ³⁵ Pente pya kaviva mbai haikavivai hei, shara pyape reko mbaikavi. Heko porãmba, mbai porãmbavãi hei, shara mbai porãmba imere pyapy. ³⁶ She hai pee, Tumpa oujymarã opavare mbeupo kui Ñanderu Tumpape mãrã irãra hei reta ñee porãmba vekua. ³⁷ Niñe´ẽ kue’ipo Ñanderu Tumpa pory ndyrejarei verã, hareka nehundi verã. ³⁸ Haivi Fariseore hareka Moise mbypara vekua pỹrỹmboi iare hei Hesupe: Pyrỹmboi'ia, potaha rãnga rijapo pẽnte mbai heshaha verã. ³⁹ Hesu ny heishu reta: Tykove ñarõ Tumpare jyrojamba iare jurure ñynoi mbai heshaha verã. Heshahãkapo pee mãrãva, mbai hesha verã. Tumpa heshakapo pee Tumpa ĩñẽẽ mbeu'ia Jonas rehe japova rãimi. ⁴⁰ Jonas ẽvã rãimi mbahapy ara hareka pỹtu pira vasu hyepera, kỹrã jyve she, kuareta tay rãimi ouva yvy ĩarẽ, apytapo mbahapy ara hareka pỹtu yvy py. ⁴¹ Tumpa oujyrã, opavapo Ninivepe õre piniñono vaikui Tumpa hỹnonde pijapo vai vekuare. Haireta rãnga heja porãmba japo vekua Jonas ñimiñẽẽe'ishu retarã. She hai pee, kope ime ẽ pẽnte mbai vasuveva Jonasvi. ⁴³ Pente mbai poshy õhe ĩmerãeaivi, oho iko yvy tiniaipi heka putu'u verãpe. Vãhẽashurã hei: ⁴⁴ Ãha jypo shyrẽtape, ãhẽ vekuaivi." Hãma oujyrã, hesha õhẽ vekuaivi pẽnte oo mbaimba ẽpya rãimi opa typeiha hareka mãshyãva. ⁴⁵ Haivi, oho hareka veru 7 ĩrũre mbai poshy heko teiteve vare hãrã ichepy reta hareka iko jyre haipe. Kỹrã, kuimbaire hykove pyta vaive õnepỹrõvaivi. Kỹrãpo jehukui opa heko aña vare ã'ẽvare. ⁴⁶ Hesu injeta teri ẽ vekua, vãhẽ hai ẽvãpe ishy hareka tyvyre pota injeta hãndirã. Katuapẽ ĩme ñynoi reta: ⁴⁷ Pente haipe ĩmẽ'õ heishu Hesu: Ndesy hareka ndyryvyre ĩmẽ ñynoi katuape, pota rijeta hãndirã. ⁴⁸ Hesu hei: Mbavara shesy hareka shyryvy? ⁴⁹ Haipe, pyvẽshu mboirea retarã hei: Kova reta hai shesy hareka shyryvyre. ⁵⁰ Ĩmẽ'ẽ japova sheru vate'õ arapy potava, vokava hai shyryvy, shiindy hareka shesy.