Pẽnte ñimity'ia ryheva ¹ Voka arape, Hesu õhẽ oovirã oho vapy yyvasu hỹmbeype. ² Hetaite kuaretare Hesu ẽẽ jurirã, jupi vapy kanoape tẽvã kuaretare yy hỹmbeypi pyta. ³ Haivĩ Hesu mboishu reta heta mbai, pory ñẽẽ ñymyhã'ãnga rupii, heishu reta: “Pẽnte kuimbai mã'ẽtỹ ia õhẽ ñimĩty. ⁴ Mã'ẽtyma ohorã, ĩmẽ'e mbai rãỹ oava pehupi, hãrã ou vyrare opa hou. ⁵ Ĩmẽ'ẽjy mbai rãỹ oava ita paũpe, yvy kui mba'etyape. Hãrã vokava areã hẽño, shara yvy pyrẽrĩshu. ⁶ Kuarasy õhẽma ourã opa hapy hareka opa jipi, shara hapo kypẽã oho. ⁷ Ĩmẽ'ẽjy mbai rãỹ oava kapiãti paũpe, hãrã hẽñorã ñana vekua opa japyraha. ⁸ Tẽvã ĩmẽ mbai rãỹ oava yvy kaviape hãrã ia kavi, ĩmẽ'ẽ iava pẽnte hãỹvi 100, ĩrũ jypyre 60, yngava jypyre 30. ⁹ Opaite japysa iare, tyhẽndu kavi. ¹⁰ Haivi, Hesu mboireare ñymbojaherã pỹrãndushu: Mãrã'ĩrãra ko kuaretare rĩnjetashu, ñẽẽ ñymyhã'ãnga rupii? ¹¹ Hesu heishu reta: Ñanderu Tumpa rãnga kuaaka pee, mbai ñemĩape õ Mburuvisha vasurã vate araivi ouva ryheva, tẽvã haire mbamba'ety. ¹² Hãrã rekova heta mbai, mẽva ẽã poshu hetave re verã. Tẽvã mbai mba'ety reva, hekyaveposhikui, mĩshĩ ĩmerevaivi. ¹³ Hãme rãnga ãĩnjetashu reta ñẽẽ ñymyhã ãnga rupii; shara haire mãĩte õre heshã ñynoĩ, hãrã hẽndutẽ õre kuã reta. ¹⁴ Kỹrã ikohe reta Tumpa ĩñẽẽ mbeu'ia Isaia heiva rãimĩ: Pee pyhẽndupo tẽvã pikuããpo, pymãĩpo tẽvã pyheshãpo. ¹⁵ Ko kuaretare pya tanta retarã, haire hesa opa ñymboty potã hesharã. Haire japysa opa ñymbotyshi potã hẽndu hareka pyape kuaa retarã, hãndi ou she ãĩvape ãmynguerashu verãre. ¹⁶ Pyvy apo pee, shara pyhesha pyndyresa rupii, hareka pyhẽndu papysa rupii. ¹⁷ Ãñẽte hai pee, hetaTumpa ĩñẽẽ mbeu'iare hareka kuareta pya kaviva potatẽ hesha ko pyheshava, tẽvã heshã; haire kyrẽỹte hẽndu ko pyhẽnduva tẽvã hẽnduã. ¹⁸ Â'ẽ pyhẽndupo, mbaivara he'ise ko ñẽẽ ñymy hã'ãnga ñimĩty ia ryheva. ¹⁹ Ĩmẽ'ẽ hẽnduva Ñanderu Tumpa ĩñẽẽ hareka Mburuvisha vasurã vate araivi ouva ryheva kuãã mbaivara he'ise, ova mbai rãỹ oa vekua pehupi; haivi ou ãña, hekyshi mbai rãỹ pyape õre. ²⁰ Ko mbai rãỹ oa vekua ita pãũpe, vokava hai Ñanderu Tumpa ĩñẽẽ hẽnduva vy'ape rojava. ²¹ Kỹrãrã hapo hareka iko pukuãpo. Iko asyma'ẽrã hareka ĩnjeta porãhe reta kova ñeẽ mykangyrã, hẽnduseveã Ñanderu Tumpa ĩñẽẽ. ²² Mbai rãỹ oa vekua kapiãti pãũpe, vokava hai hẽnduva Ñanderu Tumpa ĩñẽẽ, tẽvã oje py apy mbai yvy ĩãrẽ õvãi mbai potakue mbytavyshu. Kova mbai opa japyraha shara potã ñẽẽ ia kavi pya retaperã. ²³ Ĩmẽ'ẽ mbai rãỹ oava yvy kaviape, vokava hai hẽnduva Ñanderu Tumpa ĩñẽẽ, hareka kuaa kaviva mbaivara he'ise. Vokava ia kavi. Pẽnte hãỹvi 100, ỹngava 60 hareka ĩrũ jya 30. ²⁴ Hesu mbeujyshu reta ỹnga ñẽẽ ñymỹhã'angarã ryheva: Mburuvisha vasurã vate araivi ouva rãnga ova kuimbai mbai rãỹ kaviva ñotyva jy yvype. ²⁵ Hãrã pỹnturã iche heshatambarea, haivi mbai rãỹ porãmbava ñoty trigo mbytepe hãrã oho. ²⁶ Hãrã trigo õñepỹrõ hẽño, haivi iamarã mbytepe hẽño jyve ñana porãmbava. ²⁷ Haipe jokuehareare jyraha mbeushu koo ija: Karai, mbai rãỹ kavi ndekope rĩñoty vekua rãnga haikavi. Mãivira õhe ñana porãmba vekua, trigo pãũpe? ²⁸ Koo ija heishu reta: “Ĩme ãmo shyreshatamba ia vokava japo." Haipe jokueharea pyrãndushu: Ohoarapo po'ashi ñanava. ²⁹ Hai heishu reta: “Mba'ety, mãhe ñanava pypoorã pypoo sevekui trigo." ³⁰ Haikavi vepo pyma ẽĩ pũã hãndi mỹno õa peve, haipo kui mba'apo ia retape tynonde poo verã ñanava hareka ma mbaty verãre hapyha verã, haivipo mbatyhakui trigo natũã verã. ³¹ Hesu mbeujyshu ko ñee ñymyhã'ãnga ryheva: “Mburuvisha vasurã vate araivi ouva rãnga ova mostaza hãỹ kuimbai raha ñotỹva koope. ³² Mostaza hãyvi mishiva rãnga mba'ety, tẽvã hẽñomãrã vateve o shi opaite ñotỹavare koope, yvyra vasu rãimi vate oho hãrã vyrare ñymby haity hãkãre. ³³ Hesu mbeuve jyshu reta ynga ñymyha'angarã hei: “Mburuvisha vasurã vate araivi ouva rãnga ova kova pãhã mby ouapya taupe mbihiava 21 kilo harina opa mby'oupeve.” ³⁴ Opaite kova Hesu mbeu ñee ñymỹ hã ãnga rupii opava retape. Hai mba ẽa heishu reta poryã ñee mỹhã'anga ryhevarã. ³⁵ Kỹrã japo iko verã hekope kaviTumpa ĩñẽẽ mbeu'ia heishua jehu verã: Aĩnjetaposhu kuaretare ñẽẽ ñymỹhã'ãnga rupii; ambeuposhu mbai ñemiãpe'õ Ñanderu Tumpa japorãvãi ko yvy ĩãrẽ'õre. ³⁶ Hesu opa mondojy kuaretare hãrã iche o ipe, hãrã mboireare ñymboja ẽvaperã heishu reta: “Mbeuvejy ore mbaivara he'ise ñẽẽ ñymyhã'ãnga ñana porãmba vekua hẽñova trigo pãũpe.” ³⁷ Haipe Hesu heishu: “Mbai rãỹ kavi ñoty ia rãnga hai, Kuareta tay rãĩmi ou vekua ko yvy ĩãrẽ. ³⁸ Hãrã kookue hai opaite ko yvy ĩãrẽ õ pyare. Mbai rãỹ kavi hai Mburuvisha vasurã vate araivi ouva ryhevare rãĩmiva, ñana porãmbava hai Ãña ryhevare rãĩmiva. ³⁹ Ñana porãmbava ñotỹ ia rãnga hai Aña. Ara mỹno õha verãpe hai, ko yvy opa verã, mỹnoo ia reta hai Tumpa jokuevare. ⁴⁰ Ñanava mbatyha hareka hapyava rãimi rãngapo, ko yvy opa verã jy'arape. ⁴¹ She, kuareta rãimi aiko vekua yvy ĩãrẽ, amondo pokui ajokue vare. Haire mbatypo hareka hekypo shi opaite tẽnta vasu ryhevare, mbai porãmba japoka iare hareka hapisha ity iare porãmbape. ⁴² Ajokue vare ityposhu reta kui tatape, haipepo jaheorã hãi opa mbupururukui. ⁴³ Voka arape heko kavivare himbipe po kuarasy sapeva rãimi Sheru Mburuvisha vasurã vate araivi ouva. Opaite japysa iare, tyhẽndu kavi. ⁴⁴ Mburuvisha vasurã vate araivi ouva ova kyrypoti yvypy ñotyãva. Ou pẽnte vãhẽshu kyrypoti yvypy õ hareka haipẽĩ ñomijy. Hãma vy'ape oho opa mẽẽ imerea kyrypotirerã ou ova ko yvy. Ita mashyãva ryheva ⁴⁵ Mburuvisha vasurã vate araivi ouva ova jyve japova rãimi pẽnte mavende ia heka ita mashyãvãh. ⁴⁶ Vaheshu pẽnte mashyã vevarã oho opa mee imerearã, hãrã ou ova ko ita mashỹãva. ⁴⁷ Mburuvisha vasurã vate araivi ouva ova pẽnte pysa yypy ityava, nõhẽva heta pira. ⁴⁸ Tyny hẽmarã, pira nõhẽ iare raha y hỹmbeype, haipe vapy heka ẽpy pirare; haikakavivare ñono kanatape hãma poporãmba vekuare momboshi. ⁴⁹ Kỹrãpo jehukui ko yvy opa verã arape; Tumpa jokueva õhẽpo heky verã heko porãmba heko kavivare mbyteivi, ⁵⁰ hareka porãmba vekua itypo tatape. Haipe jaheorã hareka hãĩ mbupu purupo. ⁵¹ Haipe Hesu pyrãndushu reta: Pikuaara mbaivara he'ise kova. Haire heishu: Kuaha rãnga. ⁵² Haivi Hesu heishu reta: Hãmeara, pẽnte pyrỹmboiva Tumpa heiva rãimi hareka ñymy ãrãndu Mburuvisha vasurã vate araivi ouva, ova o ija nõheva mbai hyruivi py'ahu vare tuja vekuaivi. ⁵³ Hesu opa mbeu kova ñee ñymyhã'ãngarã, õhe oho haivi, ⁵⁴ hãrã vãhẽ oho jypyiterã iko i vekuaipi. Haipe õñepyro pyrỹmboi Judiore ñymbaty õpe hẽndu verã Tumpa ĩñẽẽ. Opaiteva hesharãrã hei: Maivira nohẽ kova mbai kuava? ¿Mbaiva rupiira japo mbaikavi hesha verã? ⁵⁵ Kova rãnga hai yvyrare mba'apo ia ray, hareka ishy hai Maria. Tyvyre Jakobo, Jose, Simon hareka Judas, ⁵⁶ hindy reta rãnga iko jyre jyve ñany mbytepe. Maivira ko kuimbai nohẽ kova mbaire? ⁵⁷ Hãmã rojãã reta. Tẽvã Hesu heishu reta: Opa rupii rãnga Tumpa ĩñẽẽ mbeu'iare injetaha kavihe, tẽvã hẽntape hareka iko iaipi mba'ety injeta kaviheva. ⁵⁸ Hãrã Hesu hetã japo haipe mbaikavi hesha verã, haire jyrojã hãrã.