Hesu rahaha Pilato ẽvãpe ¹ Kõĩmajyrã pai ruvisha hareka karai Israelitavare pẽnteñẽẽpe ñynoĩ jukaka verã Hesupe. Kõĩmajyrã pai ruvisha hareka karai Israelitavare pẽnte ² Haivi ipo pokuaha ryheve rahashu retarã mẽẽ reta Poncio Pilatope, mburuvisha vasu ipope. ³ Hãmã Judas pyrypysyka vekua, heshama Hesu pysy retarã, mbyvya ãĩterã 30 kavi kyrypoti mẽẽjyshu pai ruvisha hareka karai retape, ⁴ hãrã heishu reta: Mbai porãmba rãnga ajapo, ko kuimbai heko kaviva amẽẽ jukaha verã. Tẽvã Haire heishu: Tẽvãra mbaivẽãma hai ore vokava! ¡Ndijeheima'ẽ vokava! ⁵ Haipe Judas mombo kyrypoti tupaoperã oho ijuvy. ⁶ Pai juhuvishare mbatyjy kyrypotirã hei: Katua rãnga kova ñañono Ñanderu Tumpape mẽ'ẽãva hyrupe, mbai porãmba mbyhepyapyvarã. ⁷ Hãrã pẽnte ñẽẽpeĩ ñynoĩ reta ova verã vokava kyrypoti yvy “Ñu tujure mba'apova rend, haipe ñoty verã opaite israelita mbare. ⁸ Hãmã voka yvy mbyheeha ã'ẽpeve, “Ñũũ tuvy." ⁹ Kyrã ikoTumpa ĩñẽẽ mbeu'ia Jeremias hei vekua rãimi: “Heky mba reta voka 30 ia nikere, voka py mby hepy ñono he reta israelita vare, ¹⁰ hãrã ova mba py reta voka Ñũ tujure mba'apova, Ñanderu Tumpa hei sheva rãimi." ¹¹ Raha reta Hesu mburuvisha vasu ẽvaperã hai pyrandushu: ¿Ndera hai israelita vare ju huvisha? Hesu heishu: Kỹrã rãnga, nde rereva rãimi. ¹² Hãma pai ruvisha hareka karaere ñono vai ñynoishu, tẽvã Hesu mba'ẽãmba hei. ¹³ Haivi Pilato heishu: ¿Ryhẽnduãra mbai porãmba hei ñynoi ndyreva reta? ¹⁴ Hesuny mba'ẽãmba hei, hãma Pilato hesha rãĩterã kuaa mba hei verã. ¹⁵ Arete marã ko mburuvisha vasu poimba shi kuei mby peresoa rea, haire pota poishia. ¹⁶ Ĩme mba ẽ pẽnte hỹrãkua opa rupiiva Barrabas he'iashua; ¹⁷ haire ñymbaty ñynoirã Pilato pyrandushu reta: ¿Mba vaivira pipota apoishi: Barrabas ti Hesu, Kristohe iashuara? ¹⁸ Kuaa ẽ Pilato haire heshatã reheĩ mẽeãshurã. ¹⁹ Pilato vapy teri ẽ tribunal perã, hỹreko heishu: “Avy mãi ẽ he, ndeave ko kuimbai heko kaviva, pyhare porã apaihu, hai rehe." ²⁰ Hãmã pai ruvishare hareka karaire hei jyvyĩ kuimbai retape jurure verã Barrabas ty poiha shi hãma Hesu tijukaha hai verã. ²¹ Mburuvisha injeta hareka pyrãndu jyshu reta: Mbavara kova mõkue iaivi pipota apoishivi? Haire hei: Barrabas. ²² Pilato pyrãndushu reta: ¿Mbaivara ajapo pohe Hesu, Kristohe iashuva? Opaiteva hei reta: ¡Mby savavaka kurusure!. ²³ Haipe Pilato heishu reta: ¿Mbaivara porãmba hai japo? Hãma haire hỹnãtuve mba sapuke reta: ¡Tymby savavaha kurusure!. ²⁴ Pilato hesham mba'ẽãpo japo herã, hareka sapuke vasu ikorã, veruka y hareka jypoi kuimbaire hyvacherã, hei: Shepo ky ãpo ko kuimbai heko kaviva manoivi, pi jyhesha pee. ²⁵ Hãmã kuimbaire opaite hei reta: ¡Typyta ore hareka yry rayre ĩãrẽ hai ñymanokue!. ²⁶ Haipe Pilato poi shi Barrabas vi, haivi nũpãka Hesu perã heja ipope reta mby savava verã kurusure. ²⁷ Hãma syndarore rahashu Hesu mburuvisha hẽntape hareka mbatykashu ĩrũre ẽ hãndiare. ²⁸ Haivi mondeva heky shi retarã my mondeka reta pẽnte mondeava pyntava, ²⁹ ñakare ñono pẽnte ju ñopẽãva hareka pẽnte takuara ipo jakata kyty. Hỹnỹpỹã jatyka hỹnonde reta ñymby hory ñynoi he retarã hei: ¡Tiko puku israelita vare ju huvisha!. ³⁰ Myndyvy he reta hareka ñupa jyre takuara py ñakaipi. ³¹ Kyrã hetama ñymby hory he retarã, ñohẽ jy shi reta mondea pyntava, my mondeka jy ha'ẽĩ mondeva, Haivi raha reta Hesu juka verã kurusure. ³² õhẽ jyjaha retarã, ñyvãiti hãndi reta pẽnte kuimbai Cirenepe'ia Simon he'iashua; mbyrahaka reta Hesu jukurusu. ³³ Haivi vãhẽ jyraha pẽnte tẽnta Golgota he'iashua, he'iseva tykãvẽ rẽnda. ³⁴ Haipe mby ho uka reta vino irova mbihi'ava Hesupe, tẽvã hããmãrã ho uva. ³⁵ Mby savavama kurusurerã, syndarore jyvare ñynoi Hesu monde vekua mire, ñimbijao he verã reta. Kyrã ikoTumpa ĩñẽẽ mbeu'ia hei vekua rãimi jy kuatiape: “Ñimbijao reta amondeva jyvare ñynoi herã." ³⁶ Haivi haire vapy haipe ñyngareko ñynoi he verãre Hesu. ³⁷ Hãma ñaka ĩãrẽ ñono reta mby parava heiva: “Kova hai Hesu israelita vare ju huvisha." ³⁸ Mby savavaha hãndi jyve mõkue manarõ'iare, pẽnte jakata kyty hareka ĩrũ jasu kyty. ³⁹ Hãmã hasa ohovare injetahe Hesure hareka ñaka mbyvava jyrerã, ⁴⁰ hei: Nde rity ndapo rẽĩ tapao hareka rũmũpũã ndapojy mbahapy aravape, ejesalva jyvy. Nde hai Tumpa tayrã vejy voka kurusuivi. ⁴¹ Kyrã ñymby hory jyve he reta pai ruvisha hãndi ley pyrỹmboi'iheare hareka Fariseore, karaire hãndirã hei jyre ijupe: ⁴² Ynga reta osalva ia, hai ijupeny katua ojesalva. Israelita vare ju huvisha rãnga, tyvejy akuarã voka kurusuivi hãrãpo opa jarojashu. ⁴³ Jyroja rãnga hai Ñanderu Tumpare, tosalvashu Tumpa ã'ẽ vãĩ, ãñete haihushurã; hai heiva rãimi ñande hai Tumpa Rayva. ⁴⁴ Hãmã mãnarõ'iare mbysavava hãndia kurusure jyve, injetavaima jyvehe reta. ⁴⁵ Haivi mundii opa pỹtu yvy jerekue kõĩ mbyteivive ka'aru mbahapy ora peve. ⁴⁶ Hãma mbahapy oraipi hỹnatu sapukerã hei: Eli, Eli, ¿lama sabactani?, vokava he'ise: Sheru, Sheru, ¿marã irãra sheĩ shy reja? ⁴⁷ Haipe ĩme õ reta hẽndumarã hei: Ko kuimbai hẽno'ẽ Tumpa ĩñẽẽ mbeu'ia Elias. ⁴⁸ Pente haivare ñani oho veru pẽnte esponja hareka mãky vinagrepe, pẽnte takuarare ñonorã mby ho uka reta. ⁴⁹ Ĩrũ retany hei: Mã ẽĩheno, jaheshara Elias ou osalvashukui. ⁵⁰ Hesu ny hỹnatu sapuke jyrã, haivi jeky. ⁵¹ Haipe sabana vasu pukuva tupaope õ mbyteipitei soro, vateivi hareka yvy kytyve. Yvy opa ryry hareka ita opa jeka. ⁵² Haivi tã õvẽ renda opa jypea hareka heta Hesure jyrojava, manovekua tevã kuerajy. ⁵³ Voka vare õhẽjy ñotyhã vekuaivi, haivi iche reta Jerusalenpe, heta ẽ heshashuare. ⁵⁴ Syndaro ruvisha hareka opaite haipe ẽ hãndiare Hesu ñyngareko ẽheare heshama yvy ryry hareka opaitea mbai ikovarã, kyjeite rã hei: Kova rãnga ãẽteimba Tumpa Ray rã. ⁵⁵ Haipe heta ẽjyve taupere mbyryivi mai iare, Hesu mi ĩrũ reare Galileaivivee hareka mboryreare. ⁵⁶ Voka vare mbytepe ẽ Maria Magdalena hãndi Maria Santiago hareka Jose ishy, Zebedeo rayre ishy. ⁵⁷ Ka'aruiterã pyntuma ia, vãhẽ ou pẽnte karai mbai hetareva, Jose he'iashua. Tenta Arimatea pe õ, hareka Hesu mboireare jyve. ⁵⁸ Hai oho Pilato ẽvãpe jurureshu Hesu hetekue, hãma Pilato me ẽkashu. ⁵⁹ Jose rahãrã ñomapy pẽnte sãvãna kyambava, ⁶⁰ hãma ñono ita jo'oavapy, manova ñotya verãpe ha'ei ña'ãpova, hãirã jo'okava. Mbotyma jo'oava juru pẽnte ita marẽyvã pyrã, ohojy. ⁶¹ Maria Magdalena hareka ĩrũ Maria reta ny ĩmerã vapy jyre ita jo'oava hynonde. ⁶² Voka ara kuty jyape, putu'uava jy ara marã, pai ruvisha hareka Fariseore oho Pilato ẽvãpe. ⁶³ Heishu reta: Ururuvisha, hyry mandua rãnga he tykove japu hei vekua ĩmeteri ĩrã vekua, mbahapy arape kuerajy verã mano vare pãũvi. ⁶⁴ Hãrã pota riñono ñyngareko he verã ita jo'oava mba hapy ara peve, mahẽ mboireare ou ñomi rahakui pyhare hetekue, haivi heipo retakui, pũã jymava manoare pãuvi. Kyrã jehurã, ko japova tei tevema po jykui, tynonde ñahendu vekuaivi. ⁶⁵ Haipe Pilato heishu reta: Ãmẽe po pekui oho ñyngareko verãre ita jo'oavare. Pijapo pee pikuava rãimi. ⁶⁶ Haivi oho mboty reta ita jo'oava hõshe hesha verã ĩmẽ'ẽ peavarã. Hãrã haipe heja reta ñyngareko ẽ verã.