Hesu kuerajy 1 Hasama putu'uava jy'ararã, pẽnte ara semana õñepyrõhea kõ ẽi, Maria Magdalena hareka ĩrũ Maria jyraha hesha verãre Hasama putu'uava jy'ararã, pẽnte ara semana õñepyrõhea ita jo'oava Hesu ñotyã vape. 2 Hãrã sapy ãi hynatu yvy ryry. Pente Tumpa jokueva vejyrã mbysyryshi ita jo'oava juru jochapya, hãma vapy ẽ ĩarẽ. 3 Tumpa jokueva ara verava rãimi himbipe hareka mondeva tĩĩ amanda rãimi. 4 Hãrã hesha syndaro retarã opa ryry kyjeiterã, pyta manova rãimi. 5 Haipe Tumpa jokueva injetashu taupe retarã hai: Avy pykyje. Aikuaa rãnga pyheka pi Hesurã, kurusure jukaha vekua. 6 Mba'ety kope, kuerajy hai heiva rãimi. Pei pymãihe ñonoa vekuape. 7 Ãrẽ ãite pekua pymbeushu mboireare, kuera jymava manoare pãuvi hareka ohoma pyy nonderã Galilea kyty, haipepo pyheshashukui. Kova rãnga hai je haipe verã. 8 Haivi taupere ohojy tã õvẽre õĩvi kyje ryheve, ñania vei jyraha mbeushu verãre mboireare. 9 Haipe Hesu õhẽ hỹvãiti retarã heishu: Hãmarate. Haire ñymboja Hesu ẽvape, hỹnypỹã jatyka hỹnonderã kũãva jyre shi ipy, 10 hãrã Hesu heishu reta: Avy pykyje. Pekua py mbeushu shy ruvyre toho Galileape, haipepo shy resha reta kui. 11 Taupere jyraha jyrerã, ĩmẽ'ẽ syndarore ñyngareko õre tẽntape ohova hãrã opa mbeushu pai juhuvishare jehuva. 12 Pai ruvishare oho karai kuakua vare ẽvape, pẽnte ñẽẽpe iñiñono heta mẽẽshu verãre kyrypoti syndarore. 13 Hãrã heishu reta: Pee perepokui pynturã peche pẽĩrã, ou Hesu mboireare hareka manarõhe reta hetekue. 14 Hãrã mburuvisha kova kuarã, orepo mbe uha kavishu hãrã mba'ẽãpo jehupe. 15 Haipe syndarore raha kyrypotirã jyraha japo he'iashuva rãĩmi. Hãrã israelitare ã'ẽ peve kỹrã hei reta. 16 Hãrã (11) mboireare jyraha Galileape, yvyturusu õpe Hesu heishuvape. 17 Heshama retarã ĩñesu hỹnonde, ĩmẽtẽ õ rojambavare. 18 Haipe Hesu ñymbojahe retarã heishu: Opa mẽ ẽã she mbaikatu vate arapy õ hareka yvy ĩãrẽ õre. 19 Pekua opaite tẽntaipi pijaposhi reta shimimbo ẽrã, pymỹngaraishu reta Tuu, Tay hareka Espiritu Santo heepe. 20 Hãrã pymboishu opaite tijapo reta she hai pee vekua. Pikuaapo she ãĩmẽpo penendie opa arape ko yvy opa peve. Amén.