Pai juhuvishare pota juka jyre Hesu ¹ Hesu opa ĩnjeta kova mbairerã, heishu mboireare: Pee rãnga pikuaa, mõkue ara paskua arete verãpe. Hãrã she Hesu opa ĩnjeta kova mbairerã, heishu mboireare: ² Pee Kuareta tay rãĩmi ai vekua yvy ĩãrẽ, shymẽ'ẽãpo shymby savavaha verã kurusure. ³ Hãrã pai juhuvishare, Moise mbypara vekua pyrỹmboi'iheare, hareka kuakuavare opa jaty pai vasu Caifas hẽntape. ⁴ Hãrã haipe ĩnjeta ñynõĩ mãrãrapo japu rupii Hesu pysy retarã jukaka verã. ⁵ Hãrã hei ñynõĩ: Avypo vokava aretepe, mãhekuaretare pũã ñandyrehekui. ⁶ Hesu ĩmẽ'ẽ Betaniape, Simon he'iashuva kuru porãmba'i vekua hẽntape. ⁷ Hãrã vãhẽ ou hai ẽvãpe pẽnte taupe, mbai pisheka kavi hareka hepyva ryheva verurã ñohẽ Hesu ñakare, karu'ẽrã. ⁸ Hãrã mboireare vokava hesharã poshy jyrerã hei jyre: Mãrã'ĩrãra jyvare reihe hepy vekua? ⁹ Vokava mbai pisheka kavi haikavitẽpo hepyre mẽ'ẽharã, hepykue pavetevare mẽ'ẽhashu. ¹⁰ Hesu hẽndu vokavarã heishu reta: Mãrã'ĩrãra kyrã pĩnjetahe ko taupe? Kova mbai japo shyreheva rãnga, haikavi. ¹¹ Pavetevare ĩmẽ ñõĩpo pynymbyteipi, tẽvã she ha'ẽã ãĩme ñoĩ verã pyndyvache. ¹² Kova taupe japova ñohe shyretere mbai pisheka kavi, shiñono kavi shõtỹharã verã. ¹³ Ãñete hai pee, mãĩpi mbe'uhavaipi ko ñẽẽ kaviva ryheva yvy ĩãrẽ; mbe'uhapo jyve ko taupe japova, mãndu'ahahe verã. ¹⁴ Hãrã pẽnteva 12 mboireare, Judas Iscariote he'iashuva, oho pai juhuvishare ẽvãpe, ¹⁵ hãrã heishu reta: Mbovyrapo pymẽẽshekui Hesu ãmẽẽperã? Hãrã haire mẽẽshu 30 nikere kyrypoti. ¹⁶ Haivi Judas hekama mãrãrapo hareka mbai orapera mẽẽposhu reta Hesu. ¹⁷ Tynõnde ara õñepyrõ arete pãhã jylevaduramba ryheva, Hesu mboireare ou hai ẽvãperã pyrãndushu: Mãperapo ripota mỹhẽvãha ndekui rykaruvẽrã Pascuape? ¹⁸ Hesu heishu reta: Pekua tẽnta kyty pẽnte kuimbai hẽntape hãrã pereshu: Pyrỹmboi'ia he'ika nde; shy ara vãhẽmapo, hãrã nyrẽntape amboi areare hãndi pota amby'arete Pascua. ¹⁹ Mboireare opa japo Hesu heiva rãĩmi hãrã myhẽvãshu reta Pascuape ocena verãre. ²⁰ Haipe pyntumãrã, Hesu vapy mesape 12 mboireare hãndi. ²¹ Hãrã ocena ñynõĩrã Hesu heishu reta: Ãñẽte haipee, pẽnte peeva shirity pokui. ²² Hãrã haire mbyvy'ã retarã, õñepyrõ pepẽntẽĩ pyrãndushu: Sheja, sheẽãra pokui? ²³ Hãrã Hesu heishu reta: Pãhã mãkỹ hareka mbypy'ẽvã peratupy shendie, hai kova shymẽẽvẽrã. ²⁴ Kuareta Tay rãĩmi ouva yvy'ĩãrẽ, iko ñõĩpohe Ñanderu Tumpa ĩñẽẽpe heiva rãĩmi, tẽvã pavetepo kuimbai ityshuva! Haikavive mbatẽpo'o'ã hai kova kuimbai. ²⁵ Haipe Judas ĩnjeta, piri'ityvẽrã hãrã hei: Pyrỹmboi'ia, sheẽãra pokui? Hesu heishu: nde rãnga. ²⁶ Karumapo ñynõĩretarã Hesu heky pãhã, haivi ñymboi'ĩãrẽ; pysẽãmarã mẽẽshu mboireare hãrã heishu: Peu, kova hai, shyrete. ²⁷ Haivi mỹnyhẽjy pẽnte vaso vino, haivi ñymboi ĩãrẽ, mbyhasashu mboireare hãrã hei: Jyvache pimbyupy kova vino. ²⁸ Kova hai shuruvy mỹ'ãñeteva pyrỹmby py'ahuva ryheva, ñohẽhava opava pevarãre, mbai porãmba japo vekua hejaha reishivẽrã. ²⁹ Hãrã she haijy pee, koivive hau veamapo uva tyy, haujy verã ara peve penendie py'ahuva, Sheru Mburuvisha vasurã. ³⁰ Opa pyrahe pẽnte mbyraherã, ohojyreta Olivo yvuturusukyty. ³² Hesu mbeu Pedro ñomi vẽrã ³¹ Hãrã Hesu heishu reta: Opaite pee shyreja reipokui ko pỹntu. Shara Ñanderu Tumpa ĩñẽẽpe hei: Ajukapo avishare ñyngareko'ihea haivi avisha opapo ñymomohẽ. Hãrã shykove jymarã ahapokui pynonderã Galilea kyty ³³ Hãrã Pedro heishu: Opavare ndyreja reipo tẽvã shee'aryrejãpokui. ³⁴ Hesu heishu: Ãñete hai ndee, ko pỹntu ndei teri uru ñẽẽrã, mbahapyjypo shomikui. ³⁵ Pedro heishu: Amanopo jyve nendie, tẽvã ãrĩñomiãpo. Hãrã opaiteva mboireare kỹrã pãvẽi heijyre. ³⁶ Haivi Hesu oho hãndi mboireare Getsemani he'iashuape. Hãrã heishu reta: Kopẽĩ pimekui, ahapo kuty airureshu Ñanderu Tumpa. ³⁷ Hãrã raha Pedro hareka mõkue Sebedeo tayre. Haivi õñepyrõ ñãndu'ijehe vyamba ³⁸ Hãrã heishu reta: Shy rykovepe ãĩñymbasy, añandu amano verã rãĩmi. Kopẽĩ pime pee hareka avy pechekui. ³⁹ Hãrã Hesu ohoposhy tynonderã, ĩñesu hova mboja peve yvyre haivi jurureshu Ñanderu Tumpa hei: Sheru Tumpa, katurãpo rỹmbyhasa shyhevi ko ñymbasykue. Tẽvã avy tiko she aipotava, koñẽĩ nde ripota tiko. ⁴⁰ Haivi oujy mboireare õpe hesha opa ochereta hãrã heishu Pedro: Katu ãĩteira pysarekotẽ pẽĩveche, pẽnte oraĩ pirure verã? ⁴¹ Pysareko rãngapo avy peche hareka pirure, mãhẽ pyarãpe peakui. Aikuaa pynykỹrẽy haikaviva pijapo, tẽvã pyndyro'õĩ rãnga kãngy. ⁴² Hãrã hykuãĩ mõkueheare kỹrãĩ oho jururejy: Sheru Tumpa, katũãra rymbyhasa shyhevi ko jepy apy, japo nde ripotava rãĩmi. ⁴³ Haivi oujyrã, hykũãi hesha mboireare opa ochejy reta hypehyiterã. ⁴⁴ Haipema hejashu reta hãrã ohojy mbahapyhearema jurure verã, hãrã hei vekua rãĩmi heijy. ⁴⁵ Haivi Hesu oujy mboireare'õperã heishu reta: Ã'ẽ katuĩma peche hareka puputu'u. Vãhẽma ora, Kuareta tay rãĩmi ou vekua yvy ĩãrẽ mẽ'ẽhã verã mbai porãmba japo'iare ipope. ⁴⁶ Pupũã hãrã jaha, shara ouma shymẽẽ verã. ⁴⁷ Hesu ĩnjeta teri ẽvã, vãhẽ ou Judas 12 mboireare pẽnteva, hãrã heta ou hãndi kuaretare jykyse puku'iare hareka yvyra ryheve. Pai juhuvisha hareka kuakuavare israelpe'õre mondoshuare. ⁴⁸ Judas, pyrypysykava mbeushu reta pẽnte hã'ãngavape japo verãrã hei: Hova apytevapo, pypysykui. ⁴⁹ Hãrã ñymboja Hesu ẽvãperã heishu: Pyrymboi'ia, nypỹntumara! Haipe hovape pyteshu. ⁵⁰ Hesu heishu: Shi'ĩrũ, mbaivara reru? Haipe pysyshu reta Hesu hãrã raha mbypereso. ⁵¹ Haipe Hesu ñi'ĩrũ pẽnteva, jykyse puku hekyrã jasyjashi nambi hyvaisho. ⁵² Hesu heishu: Ñonojy ndykyse puku hyrupe. Opaite kyse puku poryva, kyse pukupẽĩpo jukaha. ⁵³ Rikuãra katuĩ airure jyveshu Sheru, aipotarã hai katupo mbou 12 jokuevare ñyrãrõva Tumpa jokueva retaivi? ⁵⁴ Akuarã, mãrãrapo opa iko Ñanderu Tumpa ĩñẽẽpe heiva, kỹrã ñõĩte iko verã? ⁵⁵ Hãrã Hesu heishu kuaretare: Mãrã'ĩrãra kyse puku hareka yvyra ryheve pei shypysy verã, manarõ'ia rãimi. Opa ara rãnga avapy pynymbyteipi tupaope apyrỹmboirã, tẽvã mbairãmba shymby peresopiva. ⁵⁶ Tẽvã opava kova iko'ẽ hekope, Tumpa ĩñẽẽ mbeu'iare hei vekua Ñanderu Tumpa ĩñẽẽpe. Haivi mboireare opa hejashu Hesu hã'ẽĩ. ⁵⁷ Hãrã Hesu mbyperesovare rahashu pai vasu Caifas hẽntape. Moise mbypara vekua pyrỹmboi'iheare hareka kuakuavare ñymbatyse'õpe. ⁵⁸ Tẽvã Pedro mbyryivi oho haykue pai vasu hoo ipeve, hesha verã mãrãrapo japo reta Hesu. ⁵⁹ Hãrã pai juhuvishare hareka kuakuavare ñymbatyse'õpe, heka ñynõĩ mãrãrapo ñẽẽ ãñetemba poryhe reta, ñono vaishu verã Hesu hareka jukaka verã. ⁶⁰ Tẽvã, mba'ẽã heshahe reta hetate'ẽ japupe ou heihevare: ⁶¹ Kova kuimbai hei vekua, “Mbahapy arape opapo aity tupao hãrã mbahapy arape amũpũapojy." ⁶² Hãrã haipe pai juhuvisha vasu pũãrã heishu Hesu: Mba'ẽã rapo rere? Mbaivara hei ñynõĩ ndyreheva? ⁶³ Tẽvã Hesu jasakaĩ'i. Haipe pai juhuvisha hei jyshu: Ñanderu Tumpa hykove'ia heepe mbeu ore, ndera hai KristoÑanderu Tumpa ta'y? ⁶⁴ Hãrã Hesu heishu: Kyrã rãnga, nde rereva rãĩmi. Hãrã haijy pee, pyheshapokui Kuareta tay rãĩmi ou vekua yvy ĩãrẽ vapy, Ñanderu Tumpa ñymbaikatuveva jakata kyty hareka ouma vate araivi avãpyntupy. ⁶⁵ Haivi pai juhuvisha vasu myndoro mondevarã hei: Ko kuimbai ĩnjeta porãhe Ñanderu Tumpa, mbai rehera jahekapojy mbeu kavi verã? Pee rãnga pyhẽnduma heihe vekua Ñanderu Tumpa. ⁶⁶ Mãrãra pere jyve? Hãrã haire hei: Ĩmẽre mbai porãmba japo vekua, hãrã manopo. ⁶⁷ Hãrã myndyvy jyre hovare hareka nũpa, ĩrũ reta katy hovaipi nũpashu. ⁶⁸ Hei jyreshu: Nde haiva Kristo? Mbeu, mbavara nunũpa'ẽ! ⁶⁹ Haipe Pedro vapy'ẽ katuape, hãrã pẽnte taupe pai juhuvisha jokuerea oho hyvacherã heishu: Nde rãnga rikori jyve hãndi Hesu, Galileava. ⁷⁰ Tẽvã Pedro ñomire opavare hyvacherã hei: Aikuããny nde rereva. ⁷¹ Haivi Pedro ohojy õche kytyrã, taupe jokueharea ĩrũ hesharã heishu haipe'õre; ko kuimbai rãnga iko'i jyve hãndi Hesu Nasareno. ⁷² Pedro ñomijy hãrã ĩñẽẽ mẽẽvape hei: Ñanderu Tumpa heepe hai aikuambava ko kuimbai. ⁷³ Hãrã haipe'õre ou Pedro hyvacherã heishu: Añetẽĩte, nde hai jyve hai ryhevare, jykuaa ndyrehe niñẽẽ ryheve. ⁷⁴ Pedro õñepỹrõ jypejurã hei: Aikuãã rãngashu ko kuimbai. Hãrã haipe uru ñyrãã. ⁷⁵ Haipe Pedro mãnduahe Hesu heishu vekua rãĩmi, “Ndei uru ñyrãrã mbahapyjypo shiñomikui." Pedro õhẽ katuaperã jaheote'i, shara mbasyiterã.