² Hesu injeta he 10 kuñatãire ¹ Hãrã ko Mburuvisha vasurã vate araivi ouva ovapokui 10 kuñatãi hekyva ñymbai sapekare ñandype hareka oho verã Hãrã ko Mburuvisha vasurã vate araivi ouva ovapokui 10 õmenda vape, mi ĩrũ verã temerã. 2 Ko kuñatãi mbytepe 5 mba ẽ kuamba ijupeare hãmã 5 ĩrũre kua'ihaivare. ³ Ko kuamba ijupeare raha tẽvã ñymbai rendyka, rahã hipi heta ñandy ãmoikui opashirã. ⁴ Kua ijupe haiva retany raha ñymbai rendyka hareka ñandy hyru ryheve. ⁵ Voka temerã ỹrẽ ã vãhẽrã, kuñatãire hypehyrã opa oche. ⁶ Pyhare mbyteipi marã, ñyhendu sapy ãĩ pẽnte sapukerã heiva: “Ouma temerã. Pei pymãihe." ⁷ Haipe, sareko 10 kuñatãi my hendy tivisha verã ñymbai rendykare. ⁸ Ko 5 kuamba ijupevare hei 5 kua ihaiva retape: “Pimbijao jyve ore pini ñandy. Yrymbai rendyka rãnga ove serima." ⁹ Kua ijupe haivare heishu reta: “Mba'ety, kỹrãrã opaitevapo mbai mbape japytakui. Pekua peva pã ãporã." ¹⁰ Hãma 5 kuñatãi kuamba ijupevare oho heka ñandy ova verã, vãhẽ ou temerã. Ĩrũ kuñatãire kua ijupe haivare iche hãndi temerã, hãrã haivi õnche ñymboty. ¹¹ Haivi, oujyma reta kuñatãi oho mba ovava hei: “Karai, karai, pea ore õnche." ¹² Tẽvã hai heishu reta: “Ãñetẽite haipe, she apyrykuãã." ¹³ Haivi Hesu hei: “Pysareko katu pee, hareka avy peche. Shara pikuã mbaipera she aipo, kuimbai rãimi aiko vekua." ¹⁴ Kova Tumpa irreino vate õ ova pẽnte kuimbai ohopo õ ynga tẽntape, haipe hẽno jokuerea retape mẽshu verã kyrypoti ña ãpovare. ¹⁵ Pente vape mee 50 mil, hãrã ĩrũ 20 mil, yngava retape mẽ 10 mil pepentei hipity kavishu verã. Haivi oho mbyry. ¹⁶ Ko jokuea rea 50 mil imere vekua, my mba'apoka hareka hetave mimoña kyrypoti opa ovende õ hepykuevi. ¹⁷ Kyrãi jyve ĩrũ 20 mil imere vekua, heta mimoña jy kyrypoti. ¹⁸ Voka 10 mil imere vekuany, oho manaroshu karai jokue reaivirã haivi raha ñoty yvykuape. ¹⁹ Heta arama hasarã ko karai pyrokue ia oujy, hãrã jurure jyshu jokuerea oreve heshu vekuare. ²⁰ Tynonde mba vãhẽ ou 50 mil mẽ'ẽashu vekua haipe mẽẽ jyshu 50 mil ĩãrẽve hãrã hei: “Karai, 50 mil rãnga rỹmee she, hãmã ko ẽ, aru 50 mil ĩãrẽve hipiti sheva." ²¹ Karai pyrokue ia heishu: “Haikavite, nde hai jokuea rea heko kaviva hareka pya kaviva; hãmã ndy pya kavi reheĩ mĩshĩpo añonovejyndekui, iche ei javya shendie." ²² Haivi ou jokuea rea 20 mil ĩmere vekua hãrã hei: Karai, 20 mil rãnga rỹmẽ she, ko aru jy nde 20 mil ĩãrẽve hipity shea peve." ²³ Karai heishu: “Haikavite, nde hai jokuearea pya kaviva hareka jyrojava; hãmã riroja reheĩ añono vepo jy nde kui, iche javya she ndie." ²⁴ Haivi vãhẽ ou jokuea rea 10 mil mẽ'ẽãshu vekua, hei pyrokue'iape: “Karai, she rãnga aikuaa nde hai kuimbai heko pytãtava, rỹmyño rĩñotymbape hareka rỹmbaty rỹmomõhẽ mbaipi." ²⁵ “Hãmẽ rãnga akyje hareka araha añoty yvype ndy kyrypoti, ko aru jy nde na ãpova." ²⁶ Haipe ko karai hei: “Jokuearea ñarõ, ñatẽyva, rikuamba amỹñova ãĩmitymba aivaipi hareka ambaty ãmomõhẽmbaivi. ²⁷ “Kỹrãrã riñonotẽ verã kyrypoti natũhã õpe, me'ẽãjyshe verã aijymarã shyrẽtape." ²⁸ Hãrã hei haipe'õ retape: “Pyhekyshi ko 10 mil hareka mẽe 50 mil ĩme revape. ²⁹ Voka ĩme reva, mee ãve poshu hareka hembypo jyshu; voka mba'etyrea ny, hekyave poshi mishĩ ĩme reaivi. ³⁰ Ko jokuearea mã ẽrã mba iany pymõhẽ, mymondo katuape pỹntu vape jaheo hareka hãĩ opa puru verãpe." ³¹ Tapy rãimi ouvekua yvy ĩãrẽ, oujyva araperã mburuvisha rãimi hareka opaite jokue vare hãndi, vapypo ẽ vapyka timimbi vapy. ³² Opaite tẽnta reta mbatyhapo hỹnonde, hãrã hai hykypo ijuhuvi avisha ñyngareko ihea rãimi heky jy avishare kavarare mbyteivi. ³³ Ñonopo jy avishare jakata kyty hareka kavarare jasu kyty. ³⁴ Haipe mburuvisha heipo jakata kyty õpe: “Pei pee Sheru ohovasashu vekua, piche ko Mburuvisha vasurã vate araivi mỹhẽva'ẽ peva Ñanderu Tumpa japorã vãĩ ko arapy jerekue õre. ³⁵ She shi mbahyrã pee shy myngaru pi vekua,shu uherã pee shy mbyho uka pivekua ymi; aiko ai mbyryva pe shy myvahẽ vekua pyny rẽntape. ³⁶ Shy nani teirã pe shi mimonde pi vekua; shy mbairasyrã pe shiñandu pi vekua, ãime ãĩrã shy mbyperesoa vape pe peiva shy rendape." ³⁷ Haivi po heko kavivare heishu: “Karai, ¿mbaipera ore ndyreshaha nymbahyrã hareka nymyngaruha hãndi ndu uherã nymby uha? ³⁸ Ti, ¿mbaipera ore heshaha mbyry tẽvã hareka my vãhẽha ỹrỹ rẽtape hãndi nynani tei reirã, nimi mondeha? ³⁹ ¿Mbaipera ore ndyreshaha nymbai rasyrã, hareka nymby peresoarã, hãndi ohoha ma ẽã ndyreherã? ⁴⁰ Hãmã mburuvisha vasu heiposhu reta: “Ãñetevape haipee, voka pijapo vekua pẽnte kova shy ryvyre mishiveva rehe, Shy rehe opa pijapo jyve." ⁴¹ Haivi mburuvisha vasu heipo jasu kyty õ retape: “Pysyry shyhevi, pee pime pẽĩva Ñanderu Tumpa ñunũpa ipe; pekua pe tata opamba õpe myhẽvãha Aña hareka jokue reare pevarã. ⁴² Shy mbahyrã pee shy myngaruã pi,shu uherã y py me ẽã she; ⁴³ mbyryivi airã pee shymyvãhẽãpi pynyrẽtape. Shy nani airã pee shi mimondeãpi; shymbairasyrã hareka shymbyperesoarã, pee shiñanduapi." ⁴⁴ Haipe haire heiposhu retape: “Karai, ¿mbaipera ore ndy reshaha nimbahyrã, ndu uherã, ti mbyryva nderã, ti nynanirã, nymbai rasyrã, nymby peresoa vape, hãrã nymboryhã mba ikoha." ⁴⁵ Mburuvisha ny heiposhu reta: “Ãñeteĩte haipe, voka pijapo mbavekua pẽnte mishĩveva rehe, pijapoã jyve shy rehe." ⁴⁶ Hairã kovare oho pokui ñunupa opamba verãpe, hareka heko kaviva retany oho pokui tykove opamba verãpe.