Hesu mbeu tupao opa mbaia vẽrã ¹ Hesu õhẽjy tupaovirã, oho jyma ia, mboireare ou ẽvãpe mãĩ jyrehe oo vate õvã tupao. Hesu õhẽjy tupaovirã, oho jyma ia, mboireare ou ẽvãpe ² Hesu heishu reta: Pyheshara opaiteva kova? Ãñẽtẽĩte hai pee, pytãpo pẽnte ita jyvohy õ. Opaitepo oarã ñymbai. ³ Haivi oho reta yvy olivo heta õpe hãrã Hesu vapy haipe, mboireare ñymboja hai ẽvãpe. Haipe hã ẽi õpe pyrãndushu reta: Pota rãnga kuaahave mãrãra pokui vãhẽma reijy verã arape. Pota kuaahave mbaiperapo jehukui kova mbai. ⁴ Hãrã Hesu heishu reta: Pymãĩ kavi pẽĩ, avy pyma ẽihe mbava pynymby tavykui. ⁵ Shara hetapo ẽ ou hei pee verã: “She hai Mesia”, hãrã hetapo ẽ mbytavyva. ⁶ Pyhẽndu pokui iko ñyrãrõ vãsu oparupii, tẽvã avy pykyjekui. Kova mbai rãnga iko ñõĩpo, vokava ha'ẽã he'iseva vãhẽmava ara opa verã. ⁷ Pẽnte tẽnta vasu pũãpo ỹnga tẽnta vasure, hãrã opavare pũãpo ijehe. Opa rupiipo ẽẽ ñymbahy vasu hareka yvy ryry. ⁸ Kova rãnga õñepyrõ hevai. ⁹ Haivi pypysyapo pyny mbyperesoarã hetapo jyvavarea pyrehe. Pukahapo hareka pyndy reshaha tãpo, shy ryheva peerã. ¹⁰ Voka arape, hetapo ẽ jyroja shy rehevare jyroja veama shyrehe verã. Voka vare ijaihu vea mapo reta, õñe hãpo ijity verã mburuvishare ipope. ¹¹ Hetapo ẽTumpa ĩñẽẽ mbeu'ia japu, hãrã heta vapepo mbytavy. ¹² Opa rupiipo ẽ mbai porãmba vekua, hãrã mba'ety mapo ijaihuva, ijaihuva rãimi. ¹³ Hãrã ñymy hãta jyvyi õ ijeroviape ara opa peve, haipo ohojepe. ¹⁴ Kova marãndu Mburuvisha vasurã vate araivi ouva ryheva opa rupiipo mbe uha ko yvy jerekue, opa hentã õre hẽndu verã. Haipe rãpo, vãhẽ kui ara opa verã. ¹⁵ Pyhesha pokui ta anga Tumpa ho ipe,Tumpa ĩñẽẽ mbeu'ia Daniel heiva rãimi, myngyava tupao. Hẽnduva ko he'iava, tikua mbaivara he'ise. ¹⁶ Vokava pyhesha marã, Judeape iare ãrẽ ãite toho tiñemi ita vate ouvaipi. ¹⁷ O ĩãrẽ iva, avy tyvejy nohẽ verã mainunga hoo ivi. ¹⁸ Ñuu hupi ia, avy toujy raha verã mondeva. ¹⁹ Tẽngapo kui taupe purua ia voka arape, hãndi memby kambu iare. Hetapo hasa asy. ²⁰ Pirureshu Ñanderu Tumpa avy tikokui kova ro yma ivekua hãndi putu'uava jy arape. ²¹ Vokape, hetapo ijyhasa asykui, hasa asy mba teria rãimi ko yvy õñepyrorã vãi. Haereka ko rãmivã jy hasa asy maipi vẽamapo jehu kui. ²² Hãrã Tumpa mykõipiã kova ara, jyroja heare reherã, mba vẽapo oho jepe kui. Hai ña ã poare pyhyrõ vare rehe rãnga mykõipo kui. ²³ Hãrã voka arape ĩmẽ'ẽ hei peva: “Kõo ẽ Mesia” ti “Vooka i”, avy pyroja. ²⁴ Shara hetapo oupe Kristoshee, hei rã ãngava, hareka Tumpa ĩñẽẽ mbeu'ia japu. Hetapo mbaikavi hesha verã japokui, mbytavy verã Tumpare jyroja retaivive, katurã. ²⁵ Ãmbeu ãipe kova, ndei jehurã. ²⁶ Hãrã,ĩmẽ'ẽ hei peva: “Mesia ĩmẽ'ẽ yvy ikoa mbaipi”, avy pekua. Hei peerã: “Kõo rãnga ñemi i, avy pyroja." ²⁷ Verava heshava rãimi kuarasy ichea kytyve, kyrãpokui vãhẽma ara aijy verã She kuimbai rãimi aiko vekua. ²⁸ Tã õvẽ ẽvãpe, opa jaty vyrapuare. ²⁹ Ara jyhasa asy hasamarã, kuarasy ove pokui, jasy sape veama pokui, jasy tatare opapo oa kui vateivi, hãrã opa mba'e ẽvãre opa ñymbyvava rãimi. ³⁰ Haipepo, ijy hesha vate arare heshakava Tumpa Ray, kuimbai rãimi ou vekua, oumarã. Haivi kyjerã, opa tẽnta ijare jaheopo shyresha aima ãvãpỹtupyrã, mbaikatu hareka himbipe ryheve. ³¹ Ñyhẽndupo mimby hỹnatu ipuva, haivi ãmondopokui ajokuevare mbaty verãre shyryhevare opaite yvy jerekue, ara japyivi opa peve. ³² Pymaĩ igo jypyre pikua verã, hãka hoky py'ahuma ẽẽjyrã, pikuakuei ara haku vãhẽmarã. ³³ Kyrãpo jyve, pyheshama kova opa ikorã pikuapokui vãhẽ serima, She kuimbai rãimi ai vekua, aijy verãpe. ³⁴ Ãẽteiteva haipe: Kova mbai opapo jehu kui ndei opa mano ã'ẽ iko ia retarã. ³⁵ Ara hareka yvy opapo kui, She hai vany ikoñoipo. ³⁶ Mbai arapera hareka mbai peitera mba'ety kuava. ³⁷ Noe iko teri yvy ĩãrẽrã arape rãimipo, kyrãpo jehu kui She kuimbai rãimi ai vekua ko yvy ĩãrẽ, ai jymarã. ³⁸ Voka arape ndei ãma vãsũrã, opava iko karu, hou y hareka õmenda jyre, Noe iche peve varko vasupe. ³⁹ Hãrã ñymoãmba ñynoi vekua, ou ãma vãsurã opaite juka reta. Kyrãipo jyve kui She kuimbai rãimi ai vekua, aimarã. ⁴⁰ Voka arape, monkue kuimbai ĩmepo ẽ ñuupe, pẽnte po raha shi ĩrũpo hejaha. ⁴¹ Mokue taupe mba'apo ñynoi, pẽntepo rahaha shi, ĩrũpo hejaha. ⁴² Pymãi kavi pẽi, shara pukuã mbai pera oupo kui pe Ru. ⁴³ Pyreko kova pankape: Pente o ija kuaa mbaipera ichepo kui ho ipe manarõ'iarã, hai ochẽapo hareka ma ẽ iapohe ho ipe manarõshu. ⁴⁴ Hãmeara, pee pymai kavipo pẽĩ. Pimoã veama pẽirã, She kuimbai rãimi ai vekua ko yvy ĩãrẽ, aipokui. ⁴⁵ ¿Mbavara jokuearea jyroja hea hareka heko kaviva? Hai jokue õ ñono ipope opaite ĩrũ jokuea reare myngaru verãre ikotẽvema ñynoirã. ⁴⁶ Vya rãngapo jokueareva, ou jokue õrã hesha opa japo hekope kavi japo. ⁴⁷ Ãẽtẽiteva haipe, o ija opaiteapo ñono ipope ña ãpo vare. ⁴⁸ Tẽvã jokuearea heko porãmba varã, mõãte jokue õ kỹy po ohorã, ⁴⁹ õñepyrõ jyvavarehe hapishare, hareka õhẽ karu, hou hãndi kau iare. ⁵⁰ Haivi jokue õ oujypo, hai ñymoamba hareka hãrõmba ẽvẽkua, ⁵¹ jokue õ opapo ñũpa vaipashu reta hareka mombopo heko vaivare hãndi, haipepo jaheo hareka hãi mbupu purupo i.